Жасанды интеллект дәуіріндегі инклюзивті даму: Ualikhanov University-де V Халықаралық педагогикалық форум өтті

Ualikhanov University қабырғасында Педагогикалық институттың ұйымдастыруымен V Халықаралық педагогикалық форум өтті. Биылғы форум Қазақстанда және өңірде инклюзивті білім беруді дамытудың стратегиялық бағыттарын айқындауға, инновациялық тәсілдерді талқылауға және кәсіби тәжірибе алмасуға арналған диалог алаңына айналды.

Форумның өткізілуі мемлекеттік білім беру саясатының басым бағыттарымен тікелей үндеседі. Президент Қасым-Жомарт Тоқаевтың Жолдауында цифрландыруды дамыту, жасанды интеллектіні енгізу және адами капиталды нығайту елдің бәсекеге қабілеттілігінің негізгі факторлары ретінде айқындалған. 2026 жылдың жасанды интеллект пен цифрландыру жылы ретінде белгіленуі педагогикалық форумның стратегиялық мазмұнын айқындады. Форум жұмысына педагогтер, ғалымдар, халықаралық және отандық сарапшылар, білім беру ұйымдарының өкілдері, үкіметтік емес ұйымдар, жұмыс берушілер, сондай-ақ ерекше білім беру қажеттіліктері бар балалардың ата-аналары қатысты.

Іс-шара барысында инклюзивті білім беру саласында тікелей тәжірибесі бар, осы бағытта жүйелі ғылыми-практикалық қызмет жүргізіп жүрген жетекші сарапшылар мен мамандар баяндама жасады. Олардың қатарында Ақмола облысында инклюзивті білім беруді дамыту жөніндегі үйлестіру кеңесінің төрағасы Марат Ибраев, инклюзивті практика бойынша оқытушы-тренер Қаракөз Мукушева, «Инклюзивті білім беру және нейроәртүрлілік» ғылыми-зерттеу зертханасының қауымдастырылған профессоры Күлдархан Оразбаева бар.

Сондай-ақ форумға халықаралық сарапшылар да қатысты. Атап айтқанда, халықаралық жоғары білім саласының сарапшысы, PhD Эндрю Вахтель, Шыңжаң педагогикалық институты жанындағы Орталық Азия кәсіптік оқу-ағарту және индустрияны дамыту институтының арнаулы зерттеушісі, PhD Дарынбек Летор, «Арнайы және инклюзивті білім беруді дамытудың Ұлттық ғылыми-практикалық орталығы» РММ-нің жетекші ғылыми қызметкері Ирина Елисеева, «Экономика жоғары мектебі» ҒЗУ Ми және сөйлеу орталығының аға ғылыми қызметкері Светлана Дорофеева баяндама жасады. Сонымен қатар өңірлік деңгейдегі білім беру және инклюзия саласының мамандары, университет профессорлары Дмитрий Лепешев пен Айнагүл Исмагулова өз тәжірибелерімен бөлісті.

Форум барысында қазіргі білім беру жүйесін дамытудың негізгі бағыттары жан-жақты талқыланды. Негізгі назар өңірде инклюзивті білім беру ортасын қалыптастыруға, ерекше білім беру қажеттіліктері бар балаларды отбасы мен қоғам деңгейінде қолдауға, колледждер мен жоғары оқу орындары түлектерін жұмысқа орналастыру мәселелеріне, қоғамдық ұйымдардың инклюзивті мәдениетті дамытудағы рөліне, сондай-ақ жасанды интеллект қарқынды енгізіліп жатқан жағдайда мектеп, колледж және университет арасындағы серіктестікті нығайтуға аударылды.

Сарапшылар білім берудің барлық деңгейлері арасындағы жүйелі өзара іс-қимылдың маңызын атап өтті. Сонымен қатар цифрландыру мен жасанды интеллекттің оқытуды жекелендіруде, ерекше білім беру қажеттіліктері бар білім алушыларды қолдаудағы әлеуеті кеңінен талқыланды. Нейроәртүрлі оқушыларды анықтау мен сүйемелдеудің заманауи тәсілдері, бейімделген әдістемелер мен білім беру платформаларын енгізу мәселелері де күн тәртібіне шығарылды.

Форум қорытындысы бойынша инклюзивті білім беруді және білім беру деңгейлері арасындағы серіктестікті дамытуға бағытталған стратегиялық ұсынымдарды қамтитын резолюция қабылданды. Сондай-ақ педагогтер мен білім беру ұйымдарына арналған практикалық материалдар жинағын әзірлеу жұмыстары басталды. Іс-шара білім беру жүйесінің барлық деңгейлері арасындағы ықпалдастықтың маңызын тағы бір мәрте дәлелдеп, мемлекет, университеттер, мектептер, колледждер және қоғамдық институттардың күшін біріктіру қажеттігін көрсетті.

Осылайша, V Халықаралық педагогикалық форум кәсіби пікір алмасу алаңы ғана емес, ұлттық басымдықтарды іске асыруға бағытталған нақты қадам болды. Форум инклюзивті, технологиялық және болашаққа бағдарланған білім беру жүйесін қалыптастыруға, әрбір балаға сапалы әрі қолжетімді білім беруді қамтамасыз етуге бағытталған маңызды тетік ретінде бағаланды.