Қазақстан мен Пәкістан ғылым және жоғары білім саласындағы ынтымақтастықты кеңейтеді
Исламабад қаласында (Пәкістан Ислам Республикасы) ҚР Президенті Қасым-Жомарт Тоқаевтың Пәкістан Ислам Республикасына мемлекеттік сапары аясында ҚР Ғылым және жоғары білім министрі Саясат Нұрбектің Пәкістан Ислам Республикасының бейінді министрлерімен екіжақты кездесулері өтті. Сондай-ақ екі елдің жоғары оқу орындары арасында ынтымақтастық туралы құжаттарға қол қою рәсімі және бірлескен ғылыми-білім беру орталықтарының ресми ашылу салтанаттары ұйымдастырылды.
Аллама Икбал университетінде (AIOU) ҚР Ғылым және жоғары білім министрі Саясат Нұрбек Пәкістан Ислам Республикасының Федералдық білім және кәсіптік даярлау министрі Халид Макбул Сиддикимен екіжақты кездесу өткізді. Келіссөздер барысында тараптар жоғары білім мен ғылым саласындағы қазақстандық-пәкістандық ынтымақтастықтың қазіргі жағдайы мен даму перспективаларын, студенттер мен профессор-оқытушылар құрамының академиялық ұтқырлығын кеңейту, бірлескен білім беру бағдарламалары мен ғылыми-зерттеу жобаларын іске асыру, сондай-ақ жоғары оқу орындары арасындағы тікелей байланыстарды нығайту мәселелерін талқылады.
Кездесу қорытындысы бойынша Қазақстан Республикасы мен Пәкістан Ислам Республикасының жоғары оқу орындары арасында өзара түсіністік туралы меморандумдарға қол қою рәсімі өтті. Атап айтқанда, ынтымақтастық туралы құжаттар төмендегі ұйымдар арасында жасалды:
- әл-Фараби атындағы Қазақ ұлттық университеті мен Пәкістан Ислам Республикасының Білім және кәсіптік даярлау министрлігі;
- әл-Фараби атындағы Қазақ ұлттық университеті мен Қайд-и Азам университеті;
- Satbayev University мен Ұлттық ғылым және технологиялар университеті (NUST);
- Қожа Ахмет Ясауи атындағы Халықаралық қазақ-түрік университеті мен Исламабадтағы Халықаралық ислам университеті;
- Астана медицина университеті мен Король Эдвард атындағы медицина университеті;
- Астана медицина университеті мен Лахор медициналық ғылымдар университеті;
- Шоқан Уәлиханов атындағы Көкшетау университеті мен Заманауи тілдер ұлттық университеті (NUML);
- Astana IT University мен Ғұлам Исхақ Хан атындағы инженерлік ғылымдар және технологиялар институты.
Қол қойылған құжаттар инженерлік-техникалық, медициналық және ақпараттық технологиялар, гуманитарлық және тілдік бағыттар бойынша ынтымақтастықты дамытуға, сондай-ақ бірлескен білім беру бағдарламаларын, ғылыми зерттеулерді және академиялық алмасуды жүзеге асыруға бағытталған.
Ұлттық ғылым және технологиялар университетінде ҚР Ғылым және жоғары білім министрі Саясат Нұрбек пен Пәкістан Ислам Республикасының Федералдық ғылым және технологиялар министрі Халид Хуссейн Магси арасында кездесу өтті, сондай-ақ Қ.И. Сәтбаев атындағы орталықтың ресми ашылу рәсімі ұйымдастырылды. Орталық қызметінде Қ.И. Сәтбаевтың ғылыми мұрасын зерделеуге, бірлескен ғылыми-зерттеу жобаларын жүзеге асыруға және академиялық алмасуды дамытуға ерекше мән берілетін болады.
Сонымен қатар Каид және Азам университетінде әл-Фараби атындағы орталықтың ашылу рәсімі өтті. Орталықтың қызметі гуманитарлық ынтымақтастықты дамытуға, қазақ мәдениетін ілгерілетуге және білім беру бастамаларын, оның ішінде қазақ тілін оқытуды жүзеге асыруға бағытталады.
Кездесулердің қорытынды іс-шарасы ретінде Исламабадтағы Халықаралық ислам университетінің Ислам зерттеулері институты базасында Қожа Ахмет Ясауи атындағы Орталық Азияның ислам мәдениеті мен өркениетін зерттеу жөніндегі ғылыми-зерттеу орталығы ашылды. Аталған орталық исламтану және өңірлік зерттеулер саласында бірлескен ғылыми ізденістер жүргізуге, ғылыми пікірталастар мен академиялық диалогты дамытуға арналған алаң болады.
Өткен іс-шаралар Қазақстан Республикасы мен Пәкістан Ислам Республикасы арасындағы ғылым және жоғары білім саласындағы екіжақты өзара іс-қимылдың жоғары деңгейін, сондай-ақ тараптардың академиялық және ғылыми әріптестікті одан әрі нығайтуға деген ұстанымын растады.