Таза Қазақстан: Baitursynuly University магистранттары аймақтық бизнеске бағытталған экологиялық жобаларды әзірледі

Ахмет Байтұрсынұлы атындағы Қостанай өңірлік университетінің геоэкология мамандығының магистранттары аймақтық кәсіпорындармен орнатылған ынтымақтастық аясында «Tehnopark kz» ЖШС үшін әзірленген экологиялық жобаларын таныстырды. Ұсынылған жобалардың барлығы өндірістік қалдықтарды қайта өңдеу мәселелеріне арналды.

Қостанай өңірлік университетінде академиялық білім мен нақты өндіріс секторын ұштастыруға бағытталған жобалық оқыту әдісі сәтті жүзеге асырылады. Бұл тәсіл аясында магистранттар теориялық емес, өндірістік серіктестердің нақты сұраныстары мен міндеттеріне негізделген тапсырмалармен жұмыс істейді. Университеттің серіктесі көлік қызметтері, логистика және арнайы техникаға қызмет көрсетуге маманданған аймақтағы жас әрі инновациялық кәсіпорын – «Tehnopark kz» ЖШС болды.

«Өндіріс қалдықтарының энергиясын ұтымды пайдалану және энергияны үнемдеу» білім беру бағдарламасы бойынша білім алатын магистранттар қысқа мерзім ішінде компанияның өзекті экологиялық мәселелерін талдап, оларды шешуге бағытталған нақты ұсыныстар әзірледі. Жобаларға университеттің тәжірибелі профессор-оқытушылар құрамы ғылыми жетекшілік жасады.

Кездесу барысында магистранттар экспресс форматта дайындалған жобаларын ұсынды. «Қалдықтарды қайта өңдеу бағыттарын дамыту» тақырыбы аясында желім мен майлардан түзілетін қалдықтарға аудит жүргізіп, оларды жүйелеудің кешенді тәсілін, қайта өңдеу әлеуетін бағалауды, сондай-ақ экономикалық және экологиялық тиімділікті ескере отырып оңтайлы технологияларды таңдауды ұсынды.

Компания қызметінің инновациялық бағытына ерекше назар аударған магистранттар 3D басып шығару қалдықтарының ерекшеліктерін зерттеді. Атап айтқанда, 3D-принтерлерден шыққан пластик қалдықтарын жинау, сақтау және оларды қайта өңдеуге арналған ықтимал технологиялық тізбекті ұйымдастырудың нақты алгоритмі ұсынылды.

Сонымен қатар тағы бір жоба экструдталған полистирол көбік тақталары қалдықтарын басқару тәсілдерін әзірлеуге арналды. Магистранттар құрылыс және орау салаларында кеңінен қолданылатын бұл материалдың қалдықтарын қайта өңдеу мәселесін зерттеп, көбікті полистиролды өңдеудің заманауи механикалық, химиялық және термиялық әдістеріне талдау жасады. Жобада аталған әдістерді кәсіпорын жағдайында қолдану мүмкіндіктері мен алынатын өнімнің тиімділігі жан-жақты қарастырылды.

Ұсынылған жобалар университет пен аймақтық кәсіпорын өкілдерінен құралған сараптау комиссиясының қарауына ұсынылды. «Tehnopark kz» ЖШС өкілдері тақырыптардың тереңдігіне, ұсыныстардың тәжірибелік бағыттылығына және презентациялардың сапасына жоғары баға берді. Сондай-ақ өнеркәсіптік кәсіпорындардың тұрақты даму стратегиясы үшін таңдалған бағыттардың өзектілігі ерекше атап өтілді.

Сарапшылар ұсынылған әзірлемелерді «Tehnopark kz» платформасы аясында пилоттық жобалар ретінде іске асыру немесе болашақ ғылыми зерттеулер мен магистрлік диссертациялардың негізі ретінде пайдалану мүмкіндігін қарастыруды ұсынды.

Өткізілген іс-шара университет пен бизнес арасындағы тиімді өзара іс-қимылдың айқын үлгісі болды. Жобалық оқыту теориялық білімді нығайтумен қатар геоэкология және тұрақты қоршаған ортаны басқару салаларындағы нақты мәселелерді шешуге қабілетті білікті мамандарды даярлауға мүмкіндік беретінін көрсетті. Baitursynuly University мен «Tehnopark kz» Қазақстанда «жасыл» технологияларды дамытуға бағытталған ынтымақтастықтың жаңа бағыттарын айқындап отыр.