Ғылым мен агробизнестің синергиясы: ғылыми-технологиялық сессияның қорытындылары

28-29 қараша аралығында Ualikhanov University-де ҚР Ғылым және жоғары білім министрлігімен бірлесе отырып «Қазақстан Республикасының агроөнеркәсіптік кәсіпорындары мен өңірлерінің ғылыми-технологиялық дамуы» атты ғылыми-технологиялық сессиясы өткізілді. Іс-шара ауыл шаруашылығы саласын жаңғыртуға бағытталған технологиялық шешімдерді әзірлеу үшін отандық және шетелдік зерттеушілерді, ғалымдарды, сондай-ақ агробизнес өкілдері мен агроөнеркәсіптік кәсіпорындарын біріктірді.

Ғылыми сессия сараптамалық пікірталастар, брейншторминг, шешімдердің прототиптерін әзірлеу бөлімдерінен тұрды. Агрохакатонның бірінші күнінде қатысушылар аграрлық сектордың негізгі сын-қатерлерін айқындап, басым R&D міндеттерін белгіледі. Екінші күні ғылыми-технологиялық шешімдердің прототиптері әзірленіп, таныстырылды. Іс-шараға 72 зерттеуші мен 17 тапсырыс беруші кәсіпорын қатысып, 9 прототип бағалауға ұсынылды.

Агрохакатонға ҚР Ғылым және жоғары білім министрі Саясат Нұрбек, Ualikhanov University ректоры Марат Сырлыбаев, Ақмола облысы әкімінің орынбасары Мұрат Балпан қатысты.

Министр өз сөзінде қазіргі ғылымның қолданбалы бағыттылығын арттырудың маңызын атап өтті.

«Нақты сектор мен ғылымды ұштастырыратын, бизнес өкілдері мен өндірістік компанияларды, жергілікті атқарушы билік өкілдерін бір алаңға жинайтын осындай сессиялардың өткізілуі маңызды», – деді ол.

Министр сондай-ақ ғылым мен бизнестің өзара әрекеттесуі еліміздің агроөнеркәсіптік кешенінің технологиялық дамуының басты шарты болып қала беретінін атап өтті.

Агроөнеркәсіптік кәсіпорындардың басшылары агроөнеркәсіптік кешен үшін басым міндеттің мал шаруашылығын дамыту, аграрлық секторға жасанды интеллект енгізу, өсімдік шаруашылығы мен егін шаруашылығы жүйесін жетілдіру екенін атап өтті. Хакатон қатысушылары ғалымдардың өз зерттеулерінде ескеруі қажет жаһандық проблема – климаттың өзгеруі мәселесіне ерекше назар аударды.

Екі күндік жұмыстың қорытындысы бойынша агроөнеркәсіптік кешен үшін 10-нан астам басым R&D міндеттері айқындалып, 9 техникалық прототип әзірленді. Сонымен бірге коммерцияландыру әлеуеті жоғары бірқатар жобалар белгіленді.

Сессия ғылым мен нақты сектор арасындағы ынтымақтастықты нығайтуға арналған маңызды алаңға айналды. Бұл – агроөнеркәсіптік сала мен бизнес өкілдерінің өзара тиімді диалог жүргізуіне мүмкіндік берген платформа. Мұндай іс-шаралар өңірдің тұрақты дамуы мен Қазақстанның агроөнеркәсіптік саласының технологиялық бәсекеге қабілеттілігін арттырудың маңызды тетігі болып саналады.