KARAGANDA BUKETOV UNIVERSITY 20 ЖАС ҒАЛЫМЫ ҚЫТАЙДА ТАҒЫЛЫМДАМАДАН ӨТЕДІ

Қазақстан мен Қытай арасындағы стратегиялық әріптестік аясында Karaganda Buketov University 20 жас ғалымына Қытайда халықаралық тағылымдамадан өтуге арналған сертификаттар табысталды. Тағылымдама 2025 жылғы қыркүйек айында Шихэцзы университетінің базасында өтеді.

ҚР Президенті Қасым-Жомарт Тоқаевтың Қытайға жасаған ресми сапары барысында жан-жақты стратегиялық әріптестік мәселелеріне, соның ішінде академиялық алмасу мен ғылыми ынтымақтастықты дамытуға ерекше назар аударылды. Karaganda Buketov University бұл бағыттарды белсенді қолдап қана қоймай, оны жаңа деңгейге көтеріп келеді. Биыл күзде университеттің жас ғалымдары осы жолды бастап, екі ел арасындағы ғылыми байланысты одан әрі нығайтуға алғашқы қадам жасамақ.

Университет ректоры Н.Дулатбеков жас ғалымдардың Қытайдағы тағылымдамаға қатысуын халықаралық ынтымақтастықты дамытудағы маңызды қадам деп атап өтті.

«Кеше ғана ШЫҰ-ның отырысы өтті, қатысушы мемлекеттер қатарында Қазақстанға ерекше құрмет көрсетілді. Бұл – еліміздің халықаралық аренадағы беделінің айғағы. Қытаймен қарым-қатынаста білім мен ғылым саласы ерекше орын алады. Бұл – өте маңызды ынтымақтастық бағыты. Осы тұрғыда тұрақтылық пен қолайлы географиялық жағдайы бар Қазақстан білім алу үшін тартымды алаңға айналып келеді. Бүгінде шетелдік талапкерлер Қазақстанға оқуға келіп жатыр. Бұл біздің университеттер үшін жаңа мүмкіндіктер ашады», – деді ректор.

Сондай-ақ жас ғалымдарды ҚР Президенті жанындағы ҚР Ұлттық ғылым академиясының академигі, педагог, техника ғылымдарының докторы, профессор, қоғам қайраткері Бағдат Телтаев құттықтады. Ол тағылымдамаға қатысушыларға сәт сапар, жемісті тәжірибе алмасу және жаңа ғылыми жетістіктер тіледі.