«МЕН КОНСТИТУЦИЯНЫ ЖАТҚА БІЛЕМІН!» КОНКУРСЫ ӨТТІ

Х.Досмұхамедов атындағы Атырау университетінде 30 тамыз – Қазақстан Республикасының Конституциясы күніне орай студенттер арасында дәстүрлі «Мен Конституцияны жатқа білемін!» конкурсы өтті. Байқаудың мақсаты – Ата Заңды ұлықтау және жастардың құқықтық мәдениетін жүйелі түрде арттыру.

Бұл дода университеттің ақылы бөлімінде білім алатын студенттер үшін ұйымдастырылды. Себебі конкурс нәтижесінде жеңімпаз студент тегін оқуға мүмкіндік алады. Бұл өз кезегінде құқықтық сауат пен азаматтық жауапкершіліктің нақты әлеуметтік қолдауға айналғандығына дәлел болмақ.

Биыл әртүрлі мамандықта оқитын 40-тан астам студент бақ сынауға ниет білдірді. Бірінші кезеңде қатысушылар Қазақстан Республикасы Конституциясының нормаларын қаншалықты меңгергенін тексеретін 25 сұрақтан тұратын тест тапсырды. Екінші кезеңде іріктелгендер Ата Заң баптарын жатқа айтып, құқықтық мәтінді дәл, анық және сауатты жеткізу қабілеттерін көрсетті.

Конкурс қорытындысы бойынша ІІІ орын иегері – 30% жеңілдік, ІІ орын иегері – 50% жеңілдік, І орын иегері – оқу ақысына 100% жеңілдік иеленді.

Х.Досмұхамедов атындағы Атырау университетінде тегін оқуға мүмкіндік алған 3-курс студенті Дана Қуат:

«Ата Заңның 30 жылдық мерейтойы қарсаңында бұл жеңіске жету – мен үшін үлкен мәртебе. Оқу ақысына 100% жеңілдік – білімге деген сенімім мен еңбегімнің бағасы. Ұйымдастырушыларға және ұстаздарыма алғыс айтамын. Бұл – мен үшін және менің отбасым үшін үлкен қуаныш», – дейді.

Айта кетейік, аталған байқау жоғары оқу орнында биыл сегізінші рет ұйымдастырылып отыр. Осы уақыт ішінде ақылы бөлімде оқитын 20-дан астам студент түрлі деңгейдегі жеңілдіктерге қол жеткізген. Бүгінде конкурс құқықтық сауаттылықты қалыптастыратын «білім – бәсеке – әлеуметтік қолдау – жаңа мотивация» деген ұзақ мерзімді экожүйені құрайды.