ҚР Конституциясының мерейтойына орай студенттер Алматы облысында метеоспутник ұшырды

Сәтбаев университетінде 1U AlfaSat-SU форматында студенттік метеорологиялық спутник ұшыру жөнінде ғылыми экспедиция өтті. Бұл іс-шара Қазақстан Республикасы Конституциясының 30 жылдық мерейтойына орай ұйымдастырылды. Аталмыш оқиға ғылыми тәжірибе ғана емес, сонымен қатар осы айтулы мерейтой қарсаңында еліміздің ғылымы мен біліміне университет қосқан үлесінің символына айналып отыр.

Экспедицияны Сәтбаев университетінің ұжымдық қолданыстағы Ақпараттық және ғарыштық технологиялар Ұлттық ғылыми зертханасы мен әл-Фараби атындағы ҚазҰУ бірлесе отырып ұйымдастырды. Тәжірибе тамыз айының соңында Алматы облысы, Іле ауданы, Ақши ауылында өткізілді. Бұл Қазақстанда спутниктік технологияларды дамытуда маңызды қадам болмақ.

Тәжірибе барысында AlfaSat-SU метеоспутнигі қолданылды. Бұл спутникті әскери мақсаттарда да, атап айтқанда, төмен биіктіктегі ұшуларды қамтамасыз ету, баллистикалық траекторияларды есептеу және байланыс жүйелерін оңтайландыру үшін де қолдануға әлеуеті жетеді. Метеоспутник температура, қысым және ылғалдылық датчиктерімен жабдықталған, ол метеорологиялық мәліметтерді жинайды. Спутник 6,5 километр биіктікке көтеріліп, парашюттің көмегімен сәтті түрде жерге қонды.

Ұшыру барысында бірегей деректер жиналып қана қоймай, олар компьютерлік модельдеу нәтижелерімен салыстырылды, сондай-ақ бұл оқиға спутниктік технологияларды меңгеріп жүрген студенттер үшін маңызды тәжірибелік мектеп болды. Жиналған деректер оқу бағдарламаларында пайдаланылып, болашақ ғылыми жарияланымдар мен гранттық зерттеулерге негіз болады.