САУРАН АУДАНЫНДА БАСКЕТБОЛДАН АУЫЛ ЖАСТАРЫ АРАСЫНДАҒЫ ЧЕМПИОНАТ БАСТАЛДЫ

Сауран ауданының Қарашық ауылдық округінде Қазақстан Республикасының ауыл жастары арасындағы баскетболдан жазғы чемпионаттың ашылу салтанаты өтті. Жарыстың ресми ашылуына аудан әкімі Мақсат Таңғатаров қатысып, спортшыларға сәттілік тіледі.

Бұл чемпионат – ауыл жастарының басын қосып, спортқа деген қызығушылығын арттыратын, достық пен татулықты нығайтатын маңызды спорттық шара. Өз құттықтау сөзінде аудан әкімі баскетболдың жастардың бойында шапшаңдық пен ұйымшылдықты ғана емес, намыс, жігер және отансүйгіштік қасиеттерді қалыптастыратынын атап өтті.

Биылғы додаға еліміздің 5 облысынан 50 команда қатысып отыр. Бұл – ауыл спортының қарқынды дамып келе жатқанын және баскетболға деген жастардың қызығушылығының артып келе жатқанын айғақтайды. Чемпионат барысында спортшылар өзара әділ бәсекеде бақ сынап, жанкүйерлерге тартысты ойын сыйлады.

Сауран ауданы әкімдігінің баспасөз қызметі