Ойынға тәуелділік және оның мемлекеттік қызметке салдары

Мемлекеттік қызметтің негізгі қағидаттарының бірі – адалдық пен жауапкершілік. Алайда, қазіргі қоғам жаңа сын-қатерлерге тап болып отыр, олардың ішінде лудомания ерекше орын алады.

Бұған дейін Қазақстанда құмар ойындарға қатысуға тыйым салынған тұлғалардың тізімі кеңейтілген болатын. Енді бұл шектеу Бірыңғай қарыздар тізілімінде тұрған адамдарға ғана емес, жауапты мемлекеттік лауазым атқаратын қызметшілерге де қатысты.

Құмар ойындары көбінесе бейқам ойын-сауық ретінде қабылданғанымен, іс жүзінде олар қаржылық тұрақсыздыққа және қарызға батуына, қызметтік міндеттерді сапасыз орындауға, сыбайлас жемқорлық тәуекелдерінің артуына, мемлекеттік қызметтің беделіне нұқсан келтіруге әкеледі.

Қазақстан Республикасының мемлекеттік қызметшілерінің Әдеп кодексі әрбір қызметшіге адалдық пен заңға бағынудың үлгісі болуды жүктейді. Құмар ойындарға әуестену бұл қағидаттарға қайшы келеді және қызметтік әдеп нормаларының бұзылуына алып келуі мүмкін.

Мемлекеттік қызметшіге арналған жадынама

1. Тәуекелдерді бағалаңыз – құмар ойындары әрқашан қаржылық шығындармен және тәуелділіктің қалыптасуымен байланысты.
2. Абыройыңызды сақтаңыз – ойынханаларға және онлайн-казиноларға барудан бас тартыңыз, күмәнді жағдайлардан аулақ болыңыз.
3. Қаржыңызды ұтымды басқарыңыз – шығындарыңызды жоспарлап, қарызға батпаңыз, жеке жағдайларыңыз қызметтік міндеттерді орындауға әсер етпеуі керек.
4. Заңды және әдеп нормаларын сақтаңыз – мүдделер қақтығысының алдын алыңыз және әр қабылданған шешім үшін жауапкершілікті есте сақтаңыз.
5. Мәселемен жалғыз қалмаңыз – тәуелділіктің алғашқы белгілері байқалса, кәсіби көмекке және қолдауға жүгініңіз.
   
   
   Төрағаның орынбасары -                                                                                     Е.Жәутікбаев
   Әдеп жөніндегі уәкіл
   ҚР СИМ Сауда комитеті