Ақтөбе облысында 11 автожол жобасы жүзеге асырылмақ

Биыл Ақтөбе облысында республикалық және жергілікті маңызы бар автомобиль жолдарын реконструкциялау, күрделі және орташа жөндеуден өткізу бойынша бірқатар жобаны іске асыру көзделген. Жолшылар барлығы 11 жобаны қамтымақ.

 

Олардың қатарында «Ақтөбе-Қандыағаш» автожолының 89 шақырымы, сондай-ақ, «Қандыағаш-Мақат» тас жолының 204 шақырымдық учаскесі бар. Бұдан бөлек, «Ақтөбе-Орск» жолындағы «Әлімбет» өткізу пунктін жарақтандыру бойынша жоба-сметалық құжаттама әзірлеу жоспарланған.

Өңірде жергілікті жолдар желісін дамытуға баса көңіл бөлінуде. Мәселен, «Ақтөбе қаласының оңтүстік айналма жолының» 21,5-35,3 км мен «Ақтөбе-Орск» автожолының 8-16 км учаскелерін реконструкциялау көзделіп отыр. Күрделі жөндеу облыстық маңызы бар «Қобда-Мартық» автожолының 30 шақырымына жүргізілмек. Ал орташа жөндеумен «Ойыл-Қараой», «Ақтөбе-Родниковка-Мартық», «Вознесеновка-Жаңажол-Мартық-Полтавка», «Табантал ауылына барар жол», «Көптоғай ауылына барар жол» жолдарының учаскелері қамтылады.

Айта кетейік, өңірдегі жақсы және қанағаттанарлық жағдайдағы жергілікті жолдар желісі 61 %, ал республикалық маңызы бар жолдар желісі 78%-ды құрайды. Автомобиль жолдарының жалпы ұзындығы – 6 921 шақырым.