ҮАААЖ құрылысы 2018 жылы тәулік сайын шамамен 200 мың көлік құралы кіретін Алматы қаласының көше-жол желісіне көлік жүктемесін азайту үшін басталды.
ҮАААЖ ұзындығы 66 шақырымды құрайды. Жол Алматы облысының Қарасай, Іле және Талғар аудандарының аумағы арқылы өтеді, Алматы қаласынан шығатын 7 негізгі жолды: Ұзынағаш, Бішкек, Нұр-Сұлтан, Комсомол, Қапшағай, сондай-ақ, Құлжа мен Талғар трактілерін кесіп өтеді. Жоба аясында 7 көлік айырығын салу көзделген. ҮАААЖ бойында 1 шақырым радиуста 57-ге жуық елдімекен мен бау-бақша серіктестіктері орналасқан.
Алматы және Алматы облысының әкімдіктері 6 радиалды жолды (Абай, Рысқұлов, Ақын Сара, Сайын, Тілендиев, Солтүстік жарты айналма жол) іске асыруда, бұл Алматы қаласынан ҮАААЖ-ға шығуды қамтамасыз етеді.
Алматы облысы Талғар ауданы Қызылту 1, 2 және Бейбітшілік ауылдарының тұрғындары жолды бір деңгейде қалдыруға ниет білдірді. ҮАААЖ алты жолақты қозғалысы бар жоғары жылдамдықты күре жол болып табылатынын ескере отырып, "Автомобиль жолдары" ҚНжЕ 3.03-09-2006ж. сәйкес бір деңгейде қиылыстар орнатуға жол берілмейді. Осы орайда ағымдағы жылдың 19 тамызында Талғар ауданы әкімінің орынбасары Е.Толқынов және "Аларко – Макйол – СК" мердігерлік ұйымының өкілдері Бейбітшілік және Қызыл-Ту ауылдарының тұрғындары үшін жергілікті жол жүруді қамтамасыз ету бойынша түсіндіру жұмыстарын жүргізді.
Бейбітшілік кентінің тұрғындарына Байсерке-Агро агрофирмасының аумағы бойынша Қызыл-Ту 2 ауылына дейін ұзындығы 2 шақырым (құны – 177 млн.тг) болатын жергілікті өтпежол құрылысының нұсқасы ұсынылды. Кейін ҮАААЖ арқылы қиылысу ҮАААЖ жолының астында салынған екі жолақты қозғалысы бар тоннель арқылы жүзеге асырылады (габариттері: ені 12,4 м х биіктігі 5,5 м). Онда көше жарығымен қамтамасыз етілген жаяу жүргіншілерге арналған тротуарлар болмақ.
Болашақта ұзындығы 4 шақырым болатын ұсынылған бағыт бойынша көлік құралдары ҮАААЖ-ға Құлжа трактіндегі көлік айырығы арқылы шыға алады.
Қашықтық шамамен 6 шақырымды құрайтын болады
Қазақстанның өңірлерінде жергілікті жолдар желісін жөндеу жұмыстары жалғасуда. Қостанай облысында биыл 227 шақырым жол қамтылған. Бүгінге дейін жоспардың 126 шақырымы немесе 56 %-ы орындалған.
Өңірде жергілікті желіні салу, реконструкциялау және орташа жөндеуден өткізу бойынша 21 жоба жүзеге асырылуда. Атап айтқанда, жолшылар облыстық маңызы бар "Қостанай қаласына кіреберіс" жолындағы, сондай-ақ Ұлыжыланшық өзені арқылы Ақкөл және Қарасу ауылдары арасындағы көпірлердің құрылысын жүргізуде. Бұдан бөлек, "Тарановское-Варваринка-облыс шекарасы" облыстық маңызы бар жолы реконструкцияланып жатыр.
Сонымен бірге, мұнда "Әулиекөл - Жалдама", "Қойбағар – Қарасу – Севастопольское", "Красная Пресня – Звериноголовское", "Пресногорьковка – Белоглинка – Воскресеновка", "Арқалық қаласының солтүстік айналма жолы", "Амангелді-Үрпек-Рахмет-Әліби", "Шұбалан-Қарасу-Көкалат", "Тоғызақ-Бөрлі-Михайловка-Бозкөл станциясы", "Өлеңді-Буревестник" және "Рудный-Қашары-Лесное" автожолдарының учаскелеріне орташа жөндеу жүргізілуде. Сондай-ақ, 5 елдімекенге кіреберіс жолдар да орташа жөндеумен қамтылған.
Айта кету керек, Қостанай облысының жергілікті маңызы бар автомобиль жолдарының желісі – республикадағы ең ұзын жолдардың бірі және 7681 шақырымды құрайды. Биылға жоспарланған жұмыстардың қорытындысы бойынша өңірдегі нормативтік жағдайдағы облыстық және аудандық маңызы бар автомобиль жолдарының үлесі 80%-ға артып, өткен жылғы көрсеткіштен 5%-ға жоғары болмақ.
ҚР Индустрия және инфрақұрылымдық даму бірінші вице-министрі Қайырбек Өскенбаев Үкімет отырысында Ақтөбе облысын дамытудың кешенді жоспарын іске асыру аясында ҚР ИИДМ атқарып жатқан іс-шаралар жөнінде баяндады.
Министрлік осы жоспардың 36 тармағының 7-і бойынша жауапты орындаушы. Олардың 5-еуі автожол құрылысына, 2-і құрылыс және тұрғын үй -коммуналдық шаруашылық саласына қатысты.
Автожол құрылысы
2025 жылға дейін кешенді жоспар шеңберінде республикалық маңызы бар 505 шақырым автожол ("Ақтөбе-Хромтау-Қарабұтақ-Үлгілі" және "Ақтөбе-Атырау-Астрахань" бағыттарында) және жергілікті жолдардың 20 шақырымдық 2 учаскесі ("Ақтөбе-Орск 8-16 шақырым" және "Оңтүстік айналма жол" 21-ден 35 шақырымға дейін) жөнделіп, реконструкцияланады.
Орындалған жұмыстар есебінен Ақтөбе облысында республикалық маңызы бар жолдардың нормативтік жай-күйінің көрсеткіші 100%, жергілікті маңызы бар жолдар көрсеткіші 95%-ке жетеді.
Бұдан басқа, 2025 жылға дейін өңірдің жол бойындағы қызметтің барлық объектілері ұлттық стандартқа сәйкестендіріледі.
Бүгінгі таңда облыста жол бойындағы қызмет объектілерінің 72% (109-дан 77-сі) ғана ұлттық стандартқа сәйкес келеді.
Биыл инвесторлар есебінен Ақтөбе облысында 2 жаңа жанар-жағармай стансасы (GasEnergy және QazaqOil) және 3 санитарлық-гигиеналық торап орнатылады. 2025 жылдың соңына дейін барлығы 12 жанар-жағармай стансасы және 15 санитарлық-гигиеналық торап қызмет ете бастайды.
Құрылыс және ТКШ саласы
Облыс әкімдігі жаппай тұрғын үй құрылысына бөлген аудандарда 11,5 мың жер учаскесі қажетті инженерлік инфрақұрылыммен қамтамасыз етіледі. Бұл жұмысты 2025 жылға дейін аяқтау жоспарланып отыр. Коммуникациялардың жалпы ұзындығы - 2 мың шақырым.
ҚР ИИДМ сумен жабдықтау және су бұру секторында Мемлекеттік-жекеменшік жобаларын іске асыру бойынша жол картасын бекітті. Ақтөбе облысының әкімдігіне субсидиялау тетігі шеңберінде кәріз-тазарту құрылысы жобаларын іске асыру жоспары жіберілді.
Қайырбек Өскенбаев Ақтөбе облысының әлеуметтік-экономикалық дамуының кешенді жоспарын уақытылы және сапалы іске асыру үшін ҚР ИИДМ барлық қажетті шараларды қабылдайтынын атап өтті.
Министрлік мүмкіндігі шектеулі адамдар үшін кедергісіз ортаны қамтамасыз етуге көп көңіл бөледі. Бұл - ҚР ИИДМ-нің бақылауында тұрған маңызды міндеттердің бірі.
Қазіргі таңда Министрлік ғимаратында көтергіштер орнатылып, есту және көру қабілеті төмен жандар үшін арнайы құрылғылар сатып алынды.
Бүкіл ел бойынша инклюзивтілікті қамтамасыз ету бағытында ауқымды жұмыстар жүргізілуде.
2021-2023 жылдар аралығында мүгедек жандар үшін көлік инфрақұрылымының толықтай кедергісіз қолжетімділігі қамтамасыз етіледі.
Министрлік жобалау және құрылыс, сондай-ақ қайта жоспарлау кезінде халықтың қауқары аз топтары үшін қолайлы орта құру үшін заңнамаға және қажетті нормативтерге бірқатар өзгерістер енгізді.
Нормативтер мынандай талаптарды белгілейді:
* елді мекендер құрылысы,
* тұрақтар,
* жүргіншілер жолдары,
* пандустар мен баспалдақтарды қамтитын кіреберістер,
* лифтілер
* басқа да көтергіш құрылғыларға, құрылыстың барлық кезеңінде ортақ пайдалану орындарына.
Автокөлік.
Елімізде 38 автовокзалдың 36-сы және 113 автостанцияның 100-і мүгедектер үшін қолжетімділік талаптарына сай келеді.
Тұрақты қалалық автобус бағдарларында 10,5 мың автобус жүреді. Оның ішінде 3,2 мыңы мүгедек адамдарды тасымалдауға бейімделген.
Өңірлерде жалпы 375 мамандандырылған көлігі бар 119 инватакси қызметі етеді.
Әуежайлар.
Биыл Қызылорда, Көкшетау, Ақтөбе және Семей әуежайларында жолаушыларды әуе кемесінің бортына дейін көтеретін жабдық сатып алынды.
Ақтөбе және Көкшетау әуежайларында көру қабілеті нашар адамдарға арналған тактильді плиткалар орнатылып, арнайы арбалар сатып алынды.
"Нұрсұлтан Назарбаев халықаралық әуежайы" қосымша арбалар сатып алып, Брайль қарпі бойынша жазулар орнатты. Сондай-ақ, әуежай "Autism Kazakhstan Ұлттық қауымдастығы" ЗТБ-мен бірлесіп аутистік спектр және ментальдық дерті бар жолаушыларға қызмет көрсетуге арналған технологиялық нұсқаулық әзірледі.
Осы санаттағы жолаушыларға және оларды алып жүретін адамдарға тіркеу, тексеру, төлқұжат және кедендік бақылаудың қажетті рәсімдерінен өту үшін арнайы әзірленген ланьярд беріледі.
Астана және Алматы әуежайларында мүмкіндігі шектеулі жолаушыларға қызмет көрсететін арнайы мамандар жұмыс істейді.
Теміржол.
302 вокзалдың 136-сы толығымен ұлттық стандарт талаптарына сәйкес келтірілді. Оларда жүріп-тұруы шектеулі адамдар үшін жағдайлар қарастырылған.
Осы жылдың соңына дейін тағы 159 вокзалды сәйкестендіру жоспарланған.
Мұндай жолаушыларды тасымалдау үшін 44 бағытта жүретін пойыздарда 98 арнайы вагон-купе бар.
Теміржолдарда ерекше мұқтаждықтары бар жолаушыларға жеңілдіктер қарастырылған.
Айталық, "Тұлпар-Тальго" пойыздарында арнайы орындарға билеттер 70% жеңілдікпен рәсімделеді.
Сондай-ақ, барлық топтағы мүгедектер үшін, сондай-ақ ерекше балаларға әлеуметтік маңызы бар бағыттарда билеттер 50% жеңілдікпен сатылады.
Жыл басынан бері 100 мыңнан астам жеңілдетілген жол жүру билеттері сатылғанын айта кету керек.
Қазақстанның өңірлерінде жергілікті жолдар желісін жөндеу жұмыстары жалғасуда. Атап айтқанда, Павлодар облысында биыл облыстық және аудандық жолдардың 300 шақырымға жуығы жұмыстармен қамтылған. Бүгінге дейін 190 шақырымға тарта жол немесе желінің 65%-ы жөндеуден өткен.
Облыста жергілікті маңызы бар автомобиль жолдарын күрделі және орташа жөндеу бойынша барлығы 41 жоба іске асырылуда. Бұдан бөлек, жергілікті жолдардың 100 шақырымының жабындысы қиыршық тастан асфальтқа алмастырылмақ.
Қазір Қызылтаң ауылына барар жолға күрделі жөндеу жүргізілуде. Ал келесідей жол учаскелері орташа жөндеуден өткізілуде: «Ивановка-Трофимовка-РФ шекарасы», «Ақтоғай-Шолақсор», «Чернорецк- Шарбақты», «Беловка-Қалқаман», «Шақат-Шалдай», «Павловка-Галицкое», «Ивановка-Трофимовка», «Екібастұз-ГРЭС 2», «Қарашат-Жаңа Жайма», «Голубовка-Қызылқақ». Бұдан бөлек, облыстың келесідей елдімекендеріне барар жолдарда да жөндеу жұмыстары жүргізіліп жатыр: Ағашорын, Ақжар, Новоямышево, Березовка, Галкино, Сахновка, Алғабас, Бірлік, Зеленая Роща және Красиловка.
Айта кетейік, Павлодар облысында жалпыға ортақ пайдаланылатын автомобиль жолдарының жалпы ұзындығы 3709 шақырымнан асады. Биыл жүргізілген жөндеу жұмыстарының қорытындысы бойынша нормативті жағдайдағы жолдардың үлесін 90% пайызға дейін жеткізу көзделген.
Бүгін құрылысшы күні қарсаңында ұйымдастырылған республикалық салтанатты жиналыс барысында жолшылардың еңбегі еленді. Оларға марапаттарды ҚР Индустрия және инфрақұрылымдық даму бірінші вице-министрі Қайырбек Өскенбаев табыстады.
Карантиндік шаралардың күшейтілуіне байланысты биылғы жылы еңбегімен ерекшеленген мамандарды марапаттау рәсімін онлайн-режимде өткізуге тура келді.
Жол құрылысшыларын кәсіби мерекесімен құттықтай отыра жетекші олардың көлік инфрақұрылымын дамытудағы сүбелі үлесі мен айрықша жауапкершілігін баса айтты:
«Сіздердің еңбектеріңіздің арқасында республикалық тасжолдар, облыстық және аудандық маңызы бар жолдар жаңартылып, жақсара түсуде. Жол саласы біздің еліміздің экономикасының нағыз локомотивіне айналуда. Жаңа және сапалы жөнделген тасжолдар мыңдаған адамның өмірін жақсартып, шағын және орта бизнестің дамуына жайлы жағдай жасап келеді» - деп атап өтті Қайырбек Өскенбаев.
Жол салушыларға – ғылым қызметкерлері мен жобалаушыларға, күре жолдарды салып, жөндейтін, олардың сапасын бақылайтын, қыс пен жазда оларға қызмет көрсететін, біздің үлкен еліміздің әр бұрышында қауіпсіз және үздіксіз қозғалысты қамтамасыз ететіндерге вице-министр мықты денсаулық, отбасылық амандық, өркендеу мен толағай жетістіктер тіледі.
Көпжылдық адал еңбегі үшін автожол саласының ардагері Байсат Атаев «Еңбек ардагері» медалімен марапатталды.
«Құрметті жолшы» төсбелгісі «ҚазАвтоЖол» ҰК» АҚ басқарма төрағасының орынбасары Талғат Смағұловқа, «АBK-SAPA" ЖШС директоры Арман Жәкеновке, «Сине Мидас строй» ЖШС атқарушы директоры Бану Иманқұловаға, «Жол активтерінің ұлттық сапа орталығының» Ақтөбе және Жамбыл облыстық филиалдарының инженерлері Талғат Бижанов пен Марат Балқыбековке, Ахметжан Бименовке, «Алсим Аларко» АҚ директорының орынбасары Гюнай Гокалпқа, «Қазақавтожол» ЖШС Ақмола облыстық филиалының бөлім басшысы Валентина Ковальжиге, «Қазақавтожол» ЖШС Ақмола облыстық филиалының аға шебері Леонид Гобузовқа, «Қазақавтожол» ЖШС Павлодар облыстық филиалының бас механигі Евгений Гофке және «Қазақавтожол» ЖШС Павлодар облыстық филиалының жол шебері Ирина Козинаға табысталды.
ҚР ИИДМ Автомобиль жолдары комитетінің еңбегімен ерекшеленген 6 маман министр Б.Атамқұлов қол қойған алғыс хаттармен марапатталды. Қалған ведомстволық наградалар ардагерлер мен үздік жұмысшыларға өңірлерде табысталатын болады.
Қазақстан Республикасы Индустрия және инфрақұрылымдық даму министрлігі Автомобиль жолдары комитетінің төрағасы Төлеген Абдуллин Шығыс Қазақстан облысында автожол жобаларының іске асырылу барысын тексерді.
Атап айтқанда, Комитет басшысы «Талдықорған – Қалбатау – Өскемен» автожолының 615-1073 шақырымындағы реконструкциялау учаскесінде болды. Онда жұмыстардың 64%-ы орындалған.
Биыл «CITIC Construction Co., LTD», «К-Дорстрой» АҚ және «Todini Central Asia» ЖШС компаниялары 445 шақырымды аяқтауды көздеп отыр. Бүгінде жолдың 287 шақырымында қозғалыс ашылды. Құрылыс-монтаждау жұмыстары үшін учаскелерде 850 адам және арнайы техниканың 664 бірлігі жұмылдырылған. 10 асфальтобетон зауыты мен 14 ұсақтау-сұрыптау қондырғысы жұмыс істеуде. Жоба аясында 26 көпір мен 390 су өткізу құбыры салынбақ.
Жұмыс сапарының барысында, сондай-ақ, «Қалбатау-Майқапшағай» автомобиль жолының 906-1321 шақырымындағы реконструкциялау учаскесіндегі жұмыс барысы да қаралды.
Жұмыстарды «КазГерСтрой» және «Синьсин» компаниялары орындауда. 1093 адам мен жол-құрылыс техникасының 568 бірлігі тартылған. Жоба аяқталғанда жол екі жолақты қозғалысы бар 2 техникалық санатты болмақ.
ҚР ИИДМ Автомобиль жолдары комитетінің төрағасы мердігер ұйымдармен жиналыстар ұйымдастырып, қойылған міндеттерді уақтылы орындап, учаскелердегі қозғалыстарды ашу бойынша бірқатар тапсырма берді. Бұдан бөлек, Төлеген Абдуллин айналма жолдарды күтіп ұстауға басты назар аударуды жүктеді.
Ағымдағы жылдың екінші жартысында жолшылар Ақтөбе мен Атырау облыстарын байланыстыратын республикалық маңызы бар «Қандыағаш-Мақат» автомобиль жолын реконструкциялауды аяқтауды жоспарлап отыр.
Аталған жол өткен ғасырдың 60-жылдарында салынған болатын. 50 жылдан астам уақыт бойы мұнда тек ағымдағы жөндеу жұмыстары жүргізіліп келген. Сондықтан соңғы уақытта автокөлік жүргізушілері тас жол бойындағы ауыл арасындағы жолдармен жүруге мәжбүр болды.
Реконструкция жобасы жалпы ұзындығы 304 шақырым болатын жеті учаскені, сондай-ақ теміржол арқылы 11 көпір мен екі жол өтпесін салуды қамтиды.
Реконструкция жұмыстары басталғанға дейін Қандыағаштан Мақат ауылына дейінгі жол уақыты кем дегенде 11-12 сағатты, ал Атырау қаласына дейін 14 сағатты құрағанын айта кету керек. Жұмыстар аяқталғаннан кейін Қандыағаштан Мақатқа дейінгі жүру уақыты шамамен 4 сағатты, ал Атырауға дейін 6 сағатты құрайтын болады.
Бас мердігерлер: «Тодини», «Шанхай Констракшн», «Аккорд» БК / «Ақ жол құрылыс» және «Ант Иншаат».
Биыл ұйымдарға 1 353 мың тонна асфальтбетон төсеу қажет. Бүгінге дейін соның 1008 мың тонна төселді.
Жобаны іске асыруға шамамен 1000 адам мен техниканың 680-нен астам бірлігі жұмылдырылған.
Бұдан бөлек, жоба аясында Атырау облысы Мақат ауданының Доссор ауылына айналма жол салынуда.
Бұл Доссор тұрғындары үшін қауіпсіз жағдай жасайды.
Жалпы, жобаны іске асыру көлікке қол жетімділікті арттырады, сондай-ақ, жол бойындағы қызмет көрсету нысандарын дамыту және демалыс орындарын ұйымдастыру арқылы жергілікті халықтың кәсіпкерлік қызметіне оң әсер етеді.
«ҚазАвтоЖол» ҰК» АҚ Басқарма Төрағасы А. Мұратұлы және Қазақстан Республикасы Парламентінің мәжіліс депутаты Е. Саиров республикалық маңызы бар «Қалбатау-Майқапшағай» автомобиль жолының қайта жаңарту жұмыстарымен танысты.
"Қалбатау-Майқапшағай" бағыты бойынша жол учаскелерін қайта жаңартуға "ҚазГерСтрой" ЖШС мердігерлік ұйымдары және "Синьсин" құрылысы бойынша қытайлық Компания тартылған.
2021 жылы 54,5 шақырымды пайдалануға беру, қалған 360,5 шақырым бойынша асфальтбетон жабыны бойынша қозғалыс ашу жоспарлануда. Қазіргі уақытта қатты төсемі бар жолдың 104 шақырым құрайтын учаскесінде қозғалыс ашылды.
Қайта құру учаскелерінде сәуір айынан бастап құрылыс-монтаждау жұмыстары басталды, қазіргі уақытта 1 093 адам (оның ішінде 1046 адам жергілікті тұрғындар) тартылды және 568 бірлік жол-құрылыс техникасы жұмылдырылды.
Құрылыс жұмыстарына 8 қосалқы мердігерлік ұйым тартылды, 7 асфальтбетон зауыты және 7 ұсақтау-сұрыптау қондырғылары жұмыс істейді. Жол-құрылыс материалдарының жылдық қажеттілігінің 42%-ы (қиыршық тас 936 мың м3, темір-бетон бұйымдары 10 мың м3), жоспарланған 79 мың тн. битумның 12,7 мың тоннасы дайындалды.
Күн сайын жер төсемін орнату және ойықтарды әзірлеу, асфальтбетоннан жасалған негіздерді орнату және қабаттарды төсеу бойынша жұмыстар жүргізілуде: жер төсемін орнату – 7 063 мың м3, қосымша негіз қабатын орнату – 192 шақырым, негіздің төменгі қабатын орнату С4 – 143 шақырым, негіздің жоғарғы қабатын орнату – 104 шақырым, асфальтбетоннан жасалған төсемнің төменгі қабатын орнату - 97 км, ЩМА – 10 шақырым жабынның жоғарғы қабатын орнату басталды.
906-1321 шақырым "Қалбатау-Майқапшағай" жобасында 33 көпір және 351 су өткізу құбыры бар. Оның ішінде 8 көпір мен 240 су өткізгіш құбыр жасалған. Жұмыста 7 көпір және 172 құбыр бар.
Басқарма төрағасының сапарының қорытындысы бойынша "ҚазГерСтрой" ЖШС жұмысы қанағаттанарлықсыз деп танылды. Аталған компания бекітілген кестедегі мерзімнен қалып қойған. Қоғам филиалына айналма жолдарды қанағаттанарлықсыз күтіп ұстағандығы үшін ескертулер жасалды. Синьсин компаниясының учаскелері бойынша құрылыс-монтаждау жұмыстарының әлсіз қарқынына қатысты шағымдар айтылды. Сондай-ақ жыл қорытындысы бойынша жаңа жол жабыны бойынша қозғалысты ашуды тапсырды. "ҚазГерСтрой" ЖШС-мен қалыптасқан жағдайды одан әрі жалғастыру, сонымен қатар, алдағы қысқы кезеңге дайындық мәселелері талқыланды
ҚР Премьер-Министрі Асқар Мамин биыл 1 шілде күні Алматы қаласына жұмыс сапары аясында Үлкен Алматы айналма автомобиль жолының (ҮАААЖ) салыну барысын тексерді. ҮАААЖ – Қазақстан мен Орталық Азиядағы мемлекеттік-жекешелік әріптестік саласындағы жол құрылысының ірі инфрақұрылымдық жобасы. Құрылыс-монтаж жұмыстарының құны 150 млрд теңгені құрайды. Жобаны Еуропа қайта құру және даму банкі, Ислам даму банкі, Еуразия даму банкі қаржыландырады. Концессия шартына 2018 жылы 20 жыл мерзімге қол қойылды. Концессионер – «Алсим Аларко», «Макйол Иншаат», «СК Экоплант», «Корея Экспрессвэй» секілді Түркия және Оңтүстік Корея компаниялары құрған «ҮАААЖ Инвестициялар және Операциялар» ЖШС.
Алматы қаласының төңірегіндегі ұзындығы 66 км және алты жолақты қозғалысты үлкен айналма автомобиль жолы I техникалық санат параметрлеріне сәйкес келетін болады. Автожол құрылысымен қатар жаңа көпірлер, көлік жол айрықтары мен эстакадалар салу көзделген. Жобаны іске асыру көлік қызметін көрсету сапасын арттырады, жол қозғалысы қауіпсіздігін қамтамасыз етеді, автомобиль көлігінің қоршаған ортаға теріс әсерін азайтады. ҮАААЖ пайдалануға берілгеннен кейін барлық транзиттік ағын – тәулігіне шамамен 38 мың автомобиль Алматы қаласын айналып өтетін болады. Бұл ретте Қытай мен Еуропа арасындағы жүк тасымалдау көлемі өседі деп күтілуде. Құрылыс алаңына шамамен 1600 адам мен 600 бірлік техника жұмылдырылған. Құрылыс аса белсенді жүргізілетін кезде 3 мыңға жуық адамды тарту жоспарланып отыр.
Үкімет басшысы құрылыс-монтаждау жұмыстарының қарқынын арттыруды және барлық сапа стандарттарын қамтамасыз ете отырып, кестеден 2 жылға ертерек, жұмысты 2022 жылдың соңына дейін аяқтауды тапсырды. «ҮАААЖ құрылысы Алматы агломерациясын ғана емес, сондай-ақ жалпы елдің транзиттік-көлік әлеуетін дамыту үшін де маңызды», — деді А. Мамин.