Түлектерге диплом табыстау рәсімі өтті

ҚР Президенті жанындағы мемлекеттік басқару академиясының түлектеріне диплом табыстаудың рәсімі салтанатты түрде өтті. Академияны сәтті аяқтаған 9 докторантура және 122 магистратура бағдарламаларының түлектеріне дипломдар табысталды. Соның ішінде 29 түлек президенттік жастар кадрлық резервіне өтті. Түлектің көк мантиясын киген барлық бітірушілер ресми түрде ҚР Президенті жанындағы мемлекеттік басқару акадамиясының түлегі болып аталды.

Салтанатты шараға Қазақстан Республикасы Президенті Әкімшілігі, Қазақстан Республикасының Мемлекеттік қызмет істері агенттігі, Қазақстан Республикасының Сыртқы істер министрлігі және Қазақстан Республикасы Мемлекеттік қызмет хабынан қонақтары қатысты.

Агенттік төрағасының орынбасары Берік Серікұлы түлектерді құттықтап, алдағы ел игілігіне асырылатын қызметтеріне сәттілік тіледі.

Дәстүр бойынша түлектерге арнап Академия ректоры Әбіл Ерлан Қуанышұлы құттықтау сөзін сөйледі: «Академияның миссиясы ел мен әлем игілігі үшін білімді қалыптастыру, сақтау және тарату болып табылады. Біз ашық болу және қоршаған ортаға деген сүйіспеншілік пен өз еліңді сүю құндылықтарын үнемі дәріптеп келеміз. Өздеріңіз білетіндей, «Халық үніне құлақ асатын мемлекетте» ашық болу бүгінгі күннің талабы. Алаш қайраткері Әлихан Бөкейханов «Ұлтқа қызмет білімнен емес, мінезден» деп айтқандай, осы аталған құндылықтарды үнемі ұстанып және одан әрі өз қызмет жолдарыңызда іс жүзінде қолданып, кәсібиліктің жоғары деңгейін танытатындарыңызға, сондай-ақ экономикалық тұрғыдан дамыған Жаңа Қазақстанды құруға өз үлестеріңізді қосатындарыңызға кәміл сенімдімін».