СҚО-да болашақ полицейлерге арналған тағы бір "Жас сақшы" сыныбы ашылды
Саумалкөл қазақ орта мектебінде 18 оқушыны біріктірген жаңа "Жас сақшы" сыныбы жұмысын бастады. Жоба полиция, аудан әкімдігі және жергілікті кәсіпкерлердің бірлескен күш-жігерінің нәтижесінде жүзеге асты.
Енді мектеп бағдарламасымен қатар оқушылар тәжірибелі офицерлердің жетекшілігімен саптық және дене дайындығын тереңдетіп, құқықтық сауаттылығы мен тәртібін арттырады.
Алдағы уақытта мұндай дайындық түлектерге Ішкі істер министрлігі, Қорғаныс министрлігі және басқа да күштік құрылымдардың жоғары оқу орындарына түсу кезінде елеулі артықшылық береді.
Салтанатты рәсімге СҚО ПД бастығы Руслан Назаров, Айыртау ауданының әкімі Мейрам Мендібаев, ардагерлер, педагогтер мен ата-аналар қатысты. Іс-шара мектеп фойесінде ұйымдастырылған полицияның қару-жарағы мен арнайы құралдарының көрмесінен басталды.
Мұнда балалар жылжымалы көрме галереясының roll-up стендтері арқылы өңірдегі ішкі істер органдарының тарихымен де танысты. Мектепте оқушыларға арнайы кабинет жабдықталып, онда Халық Қаһарманы Ғазиза Байтасоваға арналған естелік бұрышы, ведомстволық оқу орындары туралы ақпараттық стендтер және еліміздің халық қаһармандарының портреттері орналастырылды.
Мерекенің басты сәті – ант қабылдау рәсімі болды. Мектеп оқушылары "Жас сақшы" атағын абыроймен алып жүруге, оқуда үлгі болуға, үлкендерді құрметтеуге және салауатты өмір салтын ұстануға салтанатты түрде ант берді. Құрметті қонақтар оқушыларға ақжолтай тілектерін айтып, сондай-ақ ауданның белсенді тұрғындарына, ардагерлерге, полиция қызметкерлері мен олардың ата-аналарына алғыс хаттар табыстады.
Ант қабылдау рәсімінен кейін кәсіби бағдар беру бағытын СҚО ПД арнайы жедел әрекет ету жасағы қызметкерлерінің саумалкөлдіктерге жауынгерлік тәсілдерді көрсеткен көрсетілімдері және облыстық полиция мәдениет орталығының вокалдық тобының өнер көрсетуі толықтырды.
Облыстық полиция ведомствосының басшысы Руслан Назаров атап өткендей, мұндай сыныптардың басты мақсаты – болашақ қызметкерлерді ғана даярлау емес, жасөспірімдерге ерте жастан "Заң мен тәртіп" қағидаты аясында саналы көзқарас, жауапкершілік және ережелерді құрметтеу құндылықтарын қалыптастыру. Оқушылар қауіпсіздіктің негізгі қағидаларын түсінуге, өз әрекеттерінің салдарын бағалауға және түрлі қауіп-қатерлерге дұрыс әрекет етуге үйренеді. Бұл – өскелең ұрпақтың құқықтық мәдениетін қалыптастыруға қосылған маңызды үлес.
Саумалкөлдегі сынып Солтүстік Қазақстан облысындағы тоғызыншы "Жас сақшы" сыныбы болды. Жуырда Мағжан Жұмабаев атындағы ауданда – Булаево, Возвышенка және Қарақоға ауылдарында оқушыларға арналған осындай сыныптар ашылды. Өңірде ІІМ жобасын кеңейту бойынша мемлекеттік органдардың бірлескен жұмысы жалғасуда.