Маңғыстау облысында полицейлер мектеп оқушыларының қауіпсіздігін қамтамасыз ету шараларын күшейтті

     Маңғыстау облысында полицейлер мектеп оқушыларының қауіпсіздігін қамтамасыз ету шараларын күшейтті.

     Жаңа оқу жылының басталуына байланысты Маңғыстау облысының полиция қызметкерлері жолдарда мектеп оқушыларының қауіпсіздігін қамтамасыз ету жұмыстарын күшейтті.

     Күн сайын балалардың сабаққа баратын және үйлеріне қайтатын уақытында полиция жасақтары білім беру ұйымдарының маңында кезекшілік атқарады. Жаяу жүргіншілер өткелдері мен көлік қозғалысы қарқынды учаскелерге ерекше назар аударылады.

     Полиция қызметкерлері балалардың жолдан қауіпсіз өтуіне көмектесіп, жүргізушілердің жол қозғалысы ережелерін сақтауын қадағалайды және оқушылардың қауіпсіздігіне қатер төндіретін құқық бұзушылықтардың алдын алады.

     Кезекшілік қозғалыс барынша қарқынды уақыттарда ұйымдастырылған: сағат 07:30-дан 08:10-ға дейін, 12:30-дан 13:30-ға дейін және 18:30-дан 19:30-ға дейін.

     Бұл жұмыстың басты мақсаты – балалардың қатысуымен болатын жол-көлік оқиғаларына жол бермеу және олардың мектепке барып-қайту кезінде қауіпсіздігін қамтамасыз ету.

     Маңғыстау облысының полиция департаменті жүргізушілерді мектептерге жақындағанда жылдамдықты төмендетуге, көлік жүргізу кезінде алаңдамауға және жаяу жүргіншілер өткелдерінде барынша мұқият болуға шақырады.

     Баланың жолдағы қауіпсіздігі – әрбір ересектің жауапкершілігінен басталады.