Таразда 500-ден астам жасөспірім есірткіге қарсы фестивальға қатысты

     Тараз қаласындағы Оқушылар сарайында 500-ден астам жастың басын қосқан "Есірткіге қарсы жастар. Би толқыны – 2026" атты заманауи би бойынша қалалық фестиваль-байқау өтті. Іс-шара нашақорлыққа және есірткінің заңсыз айналымына қарсы күрестің халықаралық күніне орай ұйымдастырылған айлық аясында өткізілді.

     Фестивальдің басты мақсаты – салауатты өмір салтын насихаттау, өскелең ұрпақтың шығармашылық әлеуетін дамыту және кәмелетке толмағандар арасындағы есірткіге қатысты құқық бұзушылықтардың алдын алу.

     Іс-шараны Жамбыл облысы полиция департаментінің есірткі қылмысына қарсы іс-қимыл басқармасы, Жамбыл облысы әкімдігі білім басқармасына қарасты "Тараз қаласы білім бөлімінің Оқушылар сарайы" КММ, Тараз қаласы әкімдігінің ішкі саясат бөлімінің Жастар ресурстық орталығы, сондай-ақ есірткі құқық бұзушылықтарының алдын алу жөніндегі кеңестің мүшесі – "Елу жылда – Ел жаңа" қоғамдық бірлестігі бірлесіп ұйымдастырды.

     Фестиваль аясында қаладағы шығармашылық ұжымдар мен би студиялары сахнаға шығып, көрермендерге заманауи бидің түрлі бағыттарындағы жарқын әрі ерекше хореографиялық қойылымдарын ұсынды.

     Өз өнерлерін Оқушылар сарайының тәрбиеленушілері, сондай-ақ "Bronx", "Noeazy", "Energy Girls" би студиялары мен өзге де шығармашылық бірлестіктердің қатысушылары көрсетті.

     Қатысушылардың өнерін құқық қорғау органдарының, білім беру саласының және кәсіби би қауымдастығының өкілдерінен құралған білікті қазылар алқасы бағалады.

     Байқау қорытындысы бойынша үздік ұжымдар дипломдар мен кубоктармен марапатталды. Ұйымдастырушылар қатысушылардың жоғары дайындық деңгейін, шығармашылық ізденісін және белсенді азаматтық ұстанымын ерекше атап өтті.

     Фестиваль талантты жастарды салауатты өмір салты, шығармашылық және есірткісіз болашақты саналы түрде таңдау идеялары төңірегіне біріктірген жарқын мәдени шараға айналды. Осындай іс-шаралар жас ұрпақтың бойында есірткіге деген теріс көзқарасты қалыптастыруға ықпал етіп, жастардың шығармашылық пен спорт арқылы өз мүмкіндіктерін жүзеге асыруына жағдай жасайды.