ІІМ: Алтын ұрлығына жол бермеу бойынша жүйелі шаралар қабылдануда

     Ішкі істер министрлігі Мемлекет басшысының тапсырмалары аясында қала құраушы кәсіпорындардың, соның ішінде алтын өндіру секторындағы кәсіпорындардың тұрақты жұмыс істеуін қамтамасыз ету бойынша шаралар қабылдауда.

     Өткен жылдан бері республиканың бірқатар өңірінде алтын ұрлығына және заңсыз кен өндіруге қатысы бар 1400-ден астам адам жауапкершілікке тартылды, сонымен қатар заңсыз айналымнан 12 тоннадан астам алтын құрамды материал тәркіленді.

     Мысалы, биыл полиция Жамбыл облысындағы “Ақбақай” тау-кен байыту комбинаты аумағынан алтын құрамды кенді заңсыз өндіру, өңдеу және ұрлаумен айналысқан ұйымдасқан қылмыстық топқа қатысты сотқа дейінгі тергеп-тексеруді аяқтады. Қылмыстық іс сотта қаралуда.

     Келіп түскен ақпаратты мониторингтеу барысында аталған кәсіпорын аумағына заңсыз кіру дерегі жедел түрде тоқтатылды.

     Жедел әрекет нәтижесінде Жамбыл, Ұлытау және Қарағанды облыстарының тұрғындарынан құралған, алтын құрамды материалды ұрлау арнасын жолға қоюға әрекеттенген топ ұсталды. Қару-жарақ, ірі көлемдегі қаражат, байланыс құралдары және автокөліктер тәркіленді. Тергеу жүргізіліп, келтірілген залал анықталып жатыр.

     Кәсіпорынның күзет және қауіпсіздік қызметінің қызметкерлері заңсыз әрекеттерге қатысы бар-жоғы тексеріліп жатыр.

     Аталған шаралар алтынның көлеңкелі айналымын азайтуға, заңсыз кен өндірудің жолын кесуге және елдің экономикалық қауіпсіздігін нығайтуға ықпал етті.

     Ішкі істер министрлігі заң мен тәртіпті барлық салада қамтамасыз ету бойынша жұмысты жалғастырады.