Елордада полицейлер ІІО құрметті ардагерін 80 жас мерейтойымен құттықтады

     Астанада полицейлер ішкі істер органдарының құрметті ардагері Қалмағамбет Төлеуовтің 80 жас мерейтойын ерекше ілтипатпен атап өтті.

     Бұл — жай ғана мерейтой емес, бұл — заң мен тәртіпке, халық пен Отанға адал қызмет еткен тұтас ғұмырдың айқын көрінісі. Мұндай тұлғалар — ішкі істер органдары жүйесінің шынайы мақтанышы, кәсіби беделі мен рухани тірегі.

     Қалмағамбет Төлеуов еңбек жолын 1972 жылы Целиноград қаласында бастап, саналы ғұмырын құқық қорғау саласына арнады. Қызмет жолында ол әділдігімен, талапшылдығымен және ісіне деген адалдығымен әріптестерінің құрметіне бөленді. Зейнеткерлікке ІІБ жедел бөлімінің бастығы қызметінен шығып, соңына өнегелі із қалдырды.

     Мерейтой иесін Астана қаласы полиция департаментінің бастығы Марат Төлебаев арнайы құттықтап, оның қоғамдық тәртіпті қамтамасыз етуге қосқан зор үлесін, мінсіз қызметін және жас буынға үлгі болып жүрген еңбегін ерекше атап өтті.

     Ардагер үшін ең үлкен байлық — оның отбасы. Жұбайымен бірге үш бала тәрбиелеп өсірген: екі ұл және бір қыз. Бұл күні мерейтой иесіне зор денсаулық, ұзақ ғұмыр мен отбасылық бақ-береке тілеген ақжарма лебіздер айтылды.

     Елорда полиция департаменті ардагерлермен сабақтастықты әрдайым жоғары бағалайды. Себебі қызметтің бүгіні мен келешегі — осындай тәжірибе, даналық және адалдық сынды құндылықтарға негізделеді.