Елордада тұрғын үй секторындағы қауіпсіздікті күшейту шаралары талқыланды

     Астана қаласы полиция департаменті ғимаратында елорданың ПИК және МИК төрағаларының қатысуымен көпқабатты тұрғын үйлерде құқықтық тәртіп пен қауіпсіздікті қамтамасыз ету мәселелеріне арналған жұмыс кездесуі өтті.

     Талқылаудың негізгі тақырыбы тұрғын үй секторында қауіпсіздікті қамтамасыз ету бойынша қабылданып жатқан шаралар, сондай-ақ құқық бұзушылықтардың алдын алу саласындағы жаңа заңнама нормаларын түсіндіру болды.

     Кеңеске ҚР ІІМ Әкімшілік полиция комитетінің төрағасы Мұрат Қабденов, Астана қаласы әкімінің бірінші орынбасары Нұрлан Нұркенов және Астана қаласы полиция департаментінің бастығы Марат Төлебаев қатысты.

     "Заң мен тәртіп" қағидатын іске асыруға ерекше назар аударылды. Бұл қағидат жауапкершіліктің бұлтартпастығын қамтамасыз етуге, қоғамдық тәртіпті нығайтуға және қауіпсіз қалалық ортаны қалыптастыруға бағытталған.

     Құқық бұзушылықтардың тиімді алдын алу тек полиция, жергілікті атқарушы органдар, мүлік иелері бірлестіктері мен пәтер иелері кооперативтері арасындағы тығыз өзара іс-қимыл арқылы жүзеге асатыны атап өтілді.

     Ашық диалог барысында аулалар мен кіреберістердегі қоғамдық тәртіпті сақтау, есірткі құқық бұзушылықтарына қарсы іс-қимыл, ұрлық пен вандализмнің, тұрмыстық құқық бұзушылықтардың алдын алу, сондай-ақ полиция мен ПИК және МИК арасындағы өзара әрекеттестік мәселелері қаралды.

     Кездесу талқылау форматында өтті. ПИК және МИК төрағалары өздерін толғандырған сұрақтарын қойып, проблемалық мәселелерді атап өтіп, бірлескен жұмысты жетілдіру бойынша ұсыныстарын білдірді.

     Іс-шара барысында Астана қаласы ПД бастығы қоғамдық қауіпсіздікті қамтамасыз етуге қосқан үлесі және белсенді ынтымақтастығы үшін өкілдерге алғыс хаттар табыстады.

     Кездесу қорытындысы бойынша қала әкімдігі, полиция департаменті, ПИК және МИК арасындағы өзара іс-қимылды күшейту туралы келісімге келді.