Қазақстан полициясы күніне орай Алматы қаласында қызметтік міндетін атқару кезінде қаза тапқан ішкі істер органдары қызметкерлерін еске алуға арналған тағзым рәсімі өтті.
Іс-шараға Алматы қаласы полиция департаментінің басшылығы мен жеке құрамы, Генералдар кеңесінің мүшелері, ішкі істер органдарының ардагерлері және қаза тапқан қызметкерлердің отбасы мүшелері қатысып, ел тыныштығы мен қоғамдық қауіпсіздікті қамтамасыз ету жолында ерлікпен қаза болған әріптестерінің рухына құрмет көрсетті.
Жиналғандар марқұмдарды бір минут үнсіздікпен еске алып, заң мен тәртіпті қорғау жолында жанын қиған полиция қызметкерлеріне арналған мемориалға гүл шоқтарын қойды.
Алматы қаласы полиция департаментінің бастығы Айдын Кабдулдинов бұл күннің мән-маңызы ерекше екенін атап өтті.
- Полиция күні – бұл тек кәсіби мереке ғана емес, сонымен қатар қызметтік борышын абыроймен атқарып, антқа адал болған әріптестеріміздің рухына тағзым ететін күн. Біз олардың жарқын бейнесін әрдайым жадымызда сақтаймыз. Ерлігі мен жанқиярлығы ішкі істер органдарының тарихында мәңгілік орын алады, – деді ол.
Сондай-ақ департамент басшысы қаза тапқан қызметкерлердің отбасыларына қамқорлық көрсету мен ұрпақтар сабақтастығын сақтаудың маңыздылығына тоқталды.
- Заң үстемдігі мен ел қауіпсіздігі жолында жанын қиған әрбір әріптесіміздің есімін ұмытпау – біздің қасиетті парызымыз. Қаза болған қызметкерлердің отбасыларына қолдау білдіру, ардагерлерімізді құрметтеу және осы құндылықтарды жас буынның санасына сіңіру – қызметіміздің ажырамас бөлігі, – деп атап өтті Айдын Кабдулдинов.
Еске алу рәсімі ерекше құрмет пен тағзым рухында өтіп, Қазақстан полициясы күніне арналған іс-шаралардың маңызды әрі мазмұнды бөлігіне айналды. Қатысушылар ерлікпен қаза тапқан тәртіп сақшыларының есімі мен өнегелі жолы халық жадында мәңгі сақталатынын атап өтті.
Қарағанды облысы полиция департаментінде Қазақстан полициясы күніне арналған салтанатты шара ұйымдастырылды.
Іс-шара бірнеше буын өкілдерінің басын қосты: залда ішкі істер органдарының ардагерлері, қызмет атқарып жүрген полиция қызметкерлері және "Жас сақшы" бейіндік сыныптарының тәрбиеленушілері жиналды. Жеке құрам мен қонақтарға Қарағанды облысы полиция департаментінің бастығы Негмет Исмагулов құттықтау сөз сөйледі.
– Азаматтарымыздың қауіпсіздігі мен тыныштығын қмтамасыз ету жолындағы жанқиярлық еңбектеріңіз үшін әріптестеріме шынайы алғысымды білдіремін. Сіздердің кәсібиліктеріңіз бен Отанға деген адалдықтарыңыз – құқық қорғау органдарына қоғам сенімін нығайтатын басты негіз, – деп атап өтті ведомство басшысы.
Кездесуде қызметтік борышын атқару кезінде қаза тапқан қызметкерлердің отбасыларына ерекше құрмет көрсетілді. Өңірлік ведомствоның бүкіл тарихында құқық тәртібін қорғау барысында 86 полиция қызметкері қаза тапқан. Олардың рухына тағзым етіліп, естеліктері құрметпен еске алынды.
Кәсіби мереке қарсаңында қылмысқа қарсы күреске және қоғамдық қауіпсіздікті қамтамасыз етуге қосқан елеулі үлесі үшін 248 тәртіп сақшысы марапатталды. Салтанатты жағдайда жеті қызметкерге кезекті арнаулы атақтар берілсе, тағы 10 қызметкер төсбелгілермен марапатталды. Сондай-ақ үздік қызметкерлерге Құрмет грамоталары мен алғыс хаттар табысталды.
Ресми бөлімнің қорытындысы ретінде мереке иелеріне арнап дайындалған әсерлі концерттік бағдарлама ұсынылды.
Атырау облысында 19-23 маусым аралығында жолаушылар мен жүктерді тасымалдау қауіпсіздігін қамтамасыз етуге бағытталған "Автобус" жедел-профилактикалық іс-шарасы өткізілуде.
Іс-шара барысында полиция қызметкерлері қоғамдық көліктердің техникалық жай-күйіне, жүргізушілердің жол қозғалысы ережелерін сақтауына және жолаушылар тасымалы саласындағы заңнама талаптарының орындалуына бақылауды күшейтті.
Жедел-профилактикалық іс-шараның алғашқы үш күнінің қорытындысы бойынша 700-ден астам әкімшілік құқық бұзушылық анықталды. Оның ішінде жолаушылар мен жүктерді тасымалдау қағидаларын, сондай-ақ қауіпсіздік белбеулері мен мотошлемдерді пайдалану талаптарын бұзудың 329 дерегі тіркелді.
Сонымен қатар техникалық регламент талаптарына сәйкес келмейтін көлік құралдарын пайдаланудың 160 фактісі анықталды. Заң талаптарын өрескел бұзғаны үшін 30-дан астам автокөлік арнайы айып тұрағына қойылды.
Полиция қызметкерлері жол қозғалысы қауіпсіздігін қамтамасыз ету бағытындағы профилактикалық жұмыстарды тұрақты негізде жалғастыруда. Мұндай шаралардың негізгі мақсаты – жол-көлік оқиғаларының алдын алу, жолаушылардың өмірі мен денсаулығын қорғау және тасымалдау саласындағы заң талаптарының сақталуын қамтамасыз ету.
Полиция департаменті барлық жол қозғалысына қатысушыларды заң талаптарын қатаң сақтауға шақырады. Әрбір жүргізуші мен тасымалдаушының жауапкершілігі – жолдағы қауіпсіздіктің басты кепілі.
Отыз жылға жуық уақытын қылмыстарды ашуға арнаған полиция полковнигі Асан Мейрамов жүздеген қылмыстық істің ақ-қарасын анықтауға атсалысты. Адам өлтіру фактілерін тергеуден бастап, аудандық полиция бөлімін басқаруға дейінгі қызмет жолында ол кәсіби біліктілігімен, адам психологиясын терең түсіне білуімен және шәкірт тәрбиелеудегі еңбегімен ерекшеленді. Қазақстан полициясы күні қарсаңында тәжірибелі тәртіп сақшысы өзінің қызмет жолы, есте қалған қылмыстық істері мен мамандыққа деген көзқарасы туралы бөлісті.
Тіпті жүйкесі әбден шыныққан жедел уәкілдердің де арада қанша жыл өтсе де ұмыта алмайтын оқиғалары болады. Полиция қызметкері Асан Мейрамов үшін сондай ауыр естеліктердің бірі – Есіл өзенінен көптеген пышақ жарақатымен табылған кішкентай баланың мәйіті.
Мектеп жасына жетпеген бүлдіршін бастапқыда із-түзсіз жоғалғандар санатында болған. Анасы көз жасына ерік беріп, баласының серуенге шығып, қайта оралмағанын айтып, оған белгісіз біреулер шабуыл жасауы мүмкін деген болжам жасаған. Бір ай бойы Асан Мейрамов пен оның әріптестері қылмыстың барлық ықтимал нұсқаларын мұқият тексерді. Жүздеген куәгерден жауап алынып, ондаған күдікті бақылауға алынды. Бұл қатыгез қылмыстың ашылуын облыстық полиция басшылығы ғана емес, Қазақстан Республикасы Ішкі істер министрлігі де жіті бақылап отырды. Алайда ұзақ уақыт бойы ешбір нұсқа өз дәлелін таппады.
Кейін тергеу барысында бұрын сотты болған ананың алибиі күмән тудырып, ақыры расталмайтыны анықталды. Нәтижесінде полицейлер тіпті талай қылмысты көрген тәжірибелі жедел уәкілдердің өзіне сену қиын болған шындықты дәлелдеді: әйел алты жасар ұлын тіл алмағаны үшін өзі өлтірген.
– Жедел уәкілдің жұмысындағы ең маңызды қасиет – адам психологиясын түсіну. Мұны маған ең алдымен аға буын әріптестерім үйретті. Ол кезде қылмысты ашудың бүгінгідей заманауи технологиялары жоқ еді. Қылмыстық іздестіру қызметінің негізгі құралы – адамдармен жұмыс болатын. Олар күдіктінің ішкі дүниесін түсінуге, куәгердің сеніміне кіруге көмектесетін тәсілдерді көрсетті. Мәселен, егер куәгердің балық аулауға қызығатынын білсең, сол тақырыпты жақсы меңгеруге тырыс. Сонда оның сеніміне кіру оңайырақ болады. Адам сені өзіне жақын көрсе, саған көбірек сенеді әрі ашыла түседі. Ең бастысы – алдамау. Оның қызығушылықтарына шынайы көңіл бөліп, өз адамыңдай қарау қажет, – дейді Асан Мейрамов.
Асан Мейрамов жедел қызметке 1996 жылы келді. Бұл шешім бір жағынан тосын болғанымен, оның өміріндегі маңызды таңдау еді. Себебі ол кезге дейін құқық қорғау органдарындағы қызмет туралы көпшілік секілді аз білетін. Құқық қорғау саласы жөніндегі түсінігі көбіне детективтік шығармалар арқылы қалыптасқан болатын. Мемлекеттік тергеу комитетіне қызметкерлер қабылданып жатқанын естіген соң, өз күшін сынап көруге бел буады. Спортпен шұғылданған жас жігіт сынақтардан сәтті өтіп, қызметке қабылданады.
– Кадр бөлімінің бастығы Әлібек Жансейітов менен: "Саған қайсысы жақын – қағазбен жұмыс істеу ме, әлде адамдармен жұмыс істеу ме? Кабинетте отырғанды ұнатасың ба, әлде кез келген ауа райында көшеде жүргенді ме?"– деп сұрады. Қозғалысты жақсы көретін әрі адамдармен тез тіл табысатын мен еш ойланбастан екінші нұсқаны таңдадым, – деп еске алады ол.
Тәжірибеден өту кезеңінде тәжірибелі жедел уәкілдердің жұмысын бақылап жүрген жас маман Петропавл қаласының шет аймақтарындағы өмірдің көлеңкелі тұстарын көрді. Черемушки, Ойқала және Былғары зауыты аудандарында ол кезде притондар да, полиция есебінде тұрған азаматтар да, түрлі құқық бұзушылықтар болатын қолайсыз отбасылар да аз емес еді.
Қаланың басқа бөліктерімен ол кейінірек, 2006 жылдан бастап басшылық қызметтерге тағайындалған кезде тереңірек танысты. Алдымен "Тайга" базарынан бастап қаланың шетіне дейінгі аумаққа қызмет көрсететін Бірінші полиция бөлімінің бірінші орынбасары болды. Бұл қызметте жедел бағыттағы жұмыстарды үйлестіріп, 25 жедел уәкілдің қызметіне жетекшілік етті. Кейін теміржол вокзалы мен Жұмысшы кенті орналасқан Екінші полиция бөлімін басқарды. Бұдан соң облыстық ішкі істер департаментінде жеке адамға қарсы қылмыстарды ашу бөлімінің бастығы және қалалық полиция басқармасы бастығының бірінші орынбасары қызметтерін атқарды.
Биыл 28 маусымда Асан Мейрамовтың алғашқы қызметтік бұйрық алып, адам өлтіру қылмыстарын ашу бөлімінде еңбек жолын бастағанына тура 30 жыл толады. Осы уақыттың басым бөлігі жедел қызметпен тығыз байланысты болды.
– Мен өмір бойы дерлік адам өлтіру қылмыстарын ашумен айналыстым, – дейді ол әзіл аралас.
Оның кәсіби жолында көптеген марапаттар бар. Солардың бірі – тапсырыспен жасалған резонансты кісі өлтіру қылмысын ашқаны үшін берілген ҚР ІІМ Құрмет грамотасы. Бұл іс бойынша Солтүстік Қазақстан облысына арнайы келіп, облыстық қаржы полициясы бастығының орынбасарын өлтіруді жоспарлаған Ресей Федерациясының екі азаматы әшкереленіп, Алматы қаласында ұсталған.
– Дегенмен мен үшін ең үлкен мақтаныш – марапаттар емес. Менің басты мақтанышым – шәкірттерім. Қызмет жолын менің қарамағымда бастап, тәжірибемді үйренген көптеген қызметкерлер бүгінде басшылық лауазымдарда еңбек етіп жүр. Демек, олардың бойындағы әлеуетті дер кезінде көре білгенмін, – дейді ол.
Бүгінде Асан Қайдарұлы Жамбыл аудандық полиция бөліміндегі қызметінен кейін Мағжан Жұмабаев ауданы полиция бөлімінің бастығы қызметін атқарады.
Қоғамдық және жол қауіпсіздігін қамтамасыз ету, көші-қон саласын бақылау, табиғатты қорғау бағытындағы жұмыстар – аудандық полиция бөлімінің басшысы жауап беретін ауқымды міндеттердің бір бөлігі ғана. Ауылдық жердің өзіндік ерекшеліктері де бар. Мұнда мал ұрлығының алдын алу, браконьерлікпен күрес секілді мәселелер өзекті. Кейде полициядан жасырынып, жеркепеде жүрген пәтер ұрыларын да ұстауға тура келеді.
Қылмыстарды ашумен қатар олардың алдын алу да маңызды. Бұл бағыттағы жұмыстарды Асан Мейрамов заманауи тәсілдер арқылы жүзеге асырып келеді. Әлеуметтік желілердің мүмкіндіктерін тиімді пайдалана отырып, профилактикалық жұмыстарды жүйелі жолға қойған. Мәселен, алдын алу мәселелеріне арналған чатқа ауданның жүзден астам басшысы біріктірілген. Оның бастамасымен "Stop мошенник" Telegram-арнасы да іске қосылған.
– Кезінде өз күшімді сынап көріп, полиция қызметін таңдағаныма еш өкінбеймін. Осы отыз жыл бойы өзімді қоғамға қажет адам ретінде сезініп келемін. Қазақстан полициясы күні қарсаңында әріптестеріме осы сезімнен ешқашан айырылмауды тілеймін. Өйткені мамандықты дұрыс таңдағанымызды дәл осы сезім дәлелдейді, – дейді Асан Мейрамов.
Баланың қауіпсіздігі – ортақ жауапкершілік. Бүгінде балалардың өмірі мен денсаулығына қауіп төндіруі мүмкін жағдайлардың алдын алу, олардың қараусыз қалуына жол бермеу мәселесі ерекше маңызға ие. Осы тақырып аясында Polisia.kz сайтының тілшісі ІІМ Әкімшілік полиция комитеті ювеналдық полиция басқармасының аға инспекторы Ботагөз Жалекешовамен сұхбаттасты.
Ішкі істер министрлігі кәмелетке толмағандар арасындағы құқық бұзушылықтардың алдын алу мақсатында "Заң мен тәртіп" идеологиясы және "Заң мен тәртіп – қауіпсіз балалық шақ кепілі" іс-шаралар жоспары аясында жүйелі жұмыстар жүргізіп келеді.
Баланы қауіпті жағдайда қалдыру – ата-ананың немесе заңды өкілдің баланың өмірі мен денсаулығына қауіп төнуі мүмкін жағдайларда тиісті бақылау жасамауы.
Мұндай жағдайларға:
- баланы үйде немесе қоғамдық орындарда қараусыз қалдыру;
- кішкентай балаларды ересектердің бақылауынсыз қалдыру;
- жасөспірімдердің түнгі уақытта ата-анасының қарауынсыз жүруіне жол беру;
- балалардың су айдындарына, құрылыс нысандарына немесе қауіпті аумақтарға бақылаусыз баруына мүмкіндік беру;
- алкогольдік немесе өзге де масаң күйдегі адамның балаға қарауы жатады.
Ата-аналардың заң бойынша міндеттері қандай?
ҚР заңнамасына сәйкес ата-аналар баланың өмірі мен денсаулығын қорғауға, тәрбиесіне жауап беруге, оның дамуына жағдай жасауға және құқықтары мен мүдделерін қорғауға міндетті.
– Қазақстан Республикасы Әкімшілік құқық бұзушылық туралы кодексінің 127-бабына сәйкес, кәмелетке толмаған баланы тәрбиелеу, оның қауіпсіздігін қамтамасыз ету және құқықтары мен мүдделерін қорғау жөніндегі міндеттерді орындамаған заңды өкілдер әкімшілік жауапкершілікке тартылады, – деп түсіндірді ІІМ Әкімшілік полиция комитетінің аға инспекторы Б. Жалекешова.
Аталған бап бойынша:
- бірінші жағдайда – ескерту немесе 10 АЕК мөлшерінде айыппұл;
- құқық бұзушылық қайталанған жағдайда – 15 АЕК дейін айыппұл немесе 5 тәулікке дейін әкімшілік қамақ көзделген.
Қазіргі таңда ӘҚБтК-нің 127-бабы бойынша 16,8 мыңнан астам заңды өкіл әкімшілік жауапкершілікке тартылып, тиісті шаралар қабылданған. Сонымен бірге кәмелетке толмағандардың істері жөніндегі бөлімшелердің профилактикалық есебінде балаларды тәрбиелеу және қауіпсіздігін қамтамасыз ету міндеттерін тиісінше орындамайтын 5,9 мыңнан астам ата-ана профилактикалық бақылауда тұр.
Полиция тәжірибесінде қандай жағдайлар жиі кездеседі?
- түнгі уақытта ата-анасының бақылауынсыз жүру;
- ұсақ бұзақылық;
- қоғамдық тәртіпті бұзу;
- буллинг;
- бопсалау;
- төбелес;
- ұрлық фактілері бар.
Сонымен қатар жаз мезгілінде балалардың қауіпсіздігіне байланысты қайғылы жағдайлар, оның ішінде терезеден құлау және су айдындарындағы оқиғалар жиілейді.
Мамандардың айтуынша, баланың қауіпсіздігі ең алдымен отбасындағы дұрыс бақылаудан басталады.
– Ата-аналарға баланың қайда жүргенін бақылау, интернеттегі қауіпсіздігіне назар аудару, бос уақытын тиімді ұйымдастыру, баламен ашық сөйлесу, оның достары мен ортасын жақынырақ білуді ұсынар едім. Бұл бағыттағы жұмыс тек полицияның немесе білім беру ұйымдарының ғана міндеті емес. Баланың қауіпсіздігі – ата-ана, қоғам және мемлекеттік органдардың бірлескен жауапкершілігі, – дейді өз сөзінде Ботагөз Жалекешова.
Бүгінде құқық бұзушылықтар саны төмендеу динамикасын көрсетіп отыр
2026 жылдың ақпан айының қорытындысы бойынша кәмелетке толмағандар жасаған қылмыстар саны 12,5% төмендеген.
Маманның айтуынша, көрсеткіштер өңірлерге байланысты өзгеріп отырады. Дегенмен профилактикалық шаралардың нәтижесінде жалпы динамика оң бағытты көрсетіп келеді.
– Көбіне бақылаусыз қалатын жас санаты – 15-18 жас аралығындағы жасөспірімдер. Бұл кезеңде балалардың өз бетінше шешім қабылдауға ұмтылысы артып, ата-аналық бақылау әлсіреуі мүмкін. Сонымен қатар басқа өңірлерге білім алуға кеткен жастардың қауіпсіздігіне ерекше назар аудару қажет, – деп атап өтті аға инспектор.
Кәмелетке толмағандардың қауіпсіздігін қамтамасыз ету мақсатында полиция қызметкерлері тұрақты түрде түнгі профилактикалық рейдтер өткізеді.
Нәтижесінде:
- ӘҚБтК-нің 442-бабы бойынша 68,8 мыңнан астам заңды өкіл әкімшілік жауапкершілікке тартылған;
- ӘҚБтК-нің 132-бабы бойынша балалардың түнгі уақытта ойын-сауық орындарында болуына жол берген 1,6 мыңнан астам мекеме иесі мен әкімшілігі жауапқа тартылған.
Бұл жағдайда ескерту немесе 3 АЕК мөлшерінде айыппұл қарастырылған. Қайталанған жағдайда айыппұл көлемі 7 АЕК дейін ұлғаяды.
2024 жылы балаларға қатысты зорлық-зомбылықтың алдын алуға және жауапкершілікті күшейтуге бағытталған заңнамалық түзетулер енгізілді. Атап айтқанда:
- балаларға қатысты зорлық-зомбылық бойынша татуласу мүмкіндігі алынып тасталды;
- кәмелетке толмағандарды зорлағаны үшін енді тек өмір бойына бас бостандығынан айыру жазасы қарастырылған (бұрын 20 жылға бас бостандығынан айыру түріндегі балама жаза болған);
- кәмелетке толмағандарға сексуалдық сипаттағы тиіспеушілік пен суицидті насихаттағаны үшін қылмыстық жауапкершілік енгізілді;
- денсаулыққа қасақана жеңіл зиян келтіру және ұрып-соғу қылмыстық жауапкершілікке өзгертілді (ҚК-нің 108-1 және 109-1 жаңа баптары енгізілді).
Сонымен қатар буллинг үшін де әкімшілік жауапкершілік белгіленді:
бірінші жағдайда – ескерту немесе 10 АЕК айыппұл;
қайталанған жағдайда – 30 АЕК мөлшерінде айыппұл көзделген.
Қазіргі таңда әрбір білім беру ұйымына учаскелік полиция инспекторлары, ювеналдық және криминалдық полиция қызметкерлері бекітілген. Жалпы саны 8 мыңға жуық қызметкер жасөспірімдер арасындағы құқық бұзушылықтардың алдын алу бағытында жұмыс атқаруда.
Сонымен қатар Оқу-ағарту министрлігімен бірлесіп мектептерде құқықтық сауаттылықты арттыруға бағытталған түсіндіру жұмыстары тұрақты жүргізілуде.
ІІМ үндеу жасайды: Баланың қауіпсіздігі – отбасыдан басталады. Ата-ана мен қоғамның бірлескен әрекеті ғана әр бала үшін қауіпсіз әрі қолайлы орта қалыптастыруға мүмкіндік береді.
Өз кезегінде Ішкі істер министрлігі балалардың қауіпсіздігін қамтамасыз ету бойынша барлық қажетті шараларды қабылдайды.
Егер балаға қатысты құқық бұзушылық фактілері белгілі болса:
102 нөмірі бойынша полицияға немесе
111 сенім телефонына хабарлау қажет.
Петропавл қаласында ҚР ІІМ Ұлттық ұланының үлгілі-көрсетімді оркестрі Қазақстан полициясы күніне арналған салтанатты шеру мен мерекелік концерт өткізді. Музыкалық бағдарлама GuardNext жобасы аясында ұйымдастырылып, қала тұрғындары мен қонақтарын тәнті етті.
Әуелі қаланың ең танымал орындарының бірінде әскери музыканттардың салтанатты шеруі өтті. Одан кейін оркестр концерттік бағдарламасын ұсынды. Онда әскери-патриоттық шығармалар мен отандық эстраданың танымал туындылары орындалды. Музыканттар мерекелік көңіл-күй сыйлап, Отанға қызмет етудің маңызын, халық бірлігін және мемлекеттік құндылықтарға құрметті дәріптеді.
Әскери өнерпаздар ашық аспан астында тұрғындарға рухани демалыс сыйлап, Қызылжар аспанын әуезді әуенге бөледі. Жұртшылық оркестрдің өнерін тамашалау үшін бір сәт аялдап, әсерлі көріністі ұялы телефонға таспалады. Көпшілікке таныс әуендерді бірге орындап, ұландықтарға өз алғыстарын білдірді.
Іс-шараны өткізу орны оның мән-маңызын одан әрі айшықтай түсті. Концерт Қазақстан Конституциясы көшесіндегі жаяу жүргіншілер аймағында өтті. Бұл көше ең ұзын Арбат ретінде танымал және бүгінде әлемдегі ең ұзын жаяу жүргіншілер көшесі ретінде Гиннестің рекордтар кітабына енуге үміткерлер қатарында.
Концерт Ұлттық ұланның қоғам өміріндегі маңызды орнын тағы бір мәрте айқындап, әскери-патриоттық мәдениеттің азаматтық бірлік пен қоғамдық келісімді нығайтудағы рөлін көрсетті.
GuardNext музыкалық жобасы Ұлттық ұланда тұрақты түрде жүзеге асырылып келеді. Жоба әскери-оркестрлік өнерді дәріптеуге, жастардың патриоттық тәрбиесін нығайтуға және әскери қызметшілер мен қоғам арасындағы мәдени байланысты дамытуға бағытталған.
Айта кету керек, шығармашылық жоба ауқымын кеңейтіп, еліміздің түкпір-түкпіріндегі көрерменнің ықыласына бөленуде. Ашық аспан астындағы концерттер өңір тұрғындарының ерекше қызығушылығын тудырып келеді. Осыған байланысты Петропавлдағы концерт жергілікті тұрғындардың өтініші мен шақыруы негізінде ұйымдастырылды.
Бүгінде Қазақстанның бірнеше қаласының тұрғындары да өз өңірлерінде осындай концерттердің өтуіне қызығушылық танытып, GuardNext жобасының қатысушыларын шақыру жөнінде бастама көтеруде.
Соңғы уақытта логистикалық платформалар арқылы автокөліктер мен түрлі жүктерді тасымалдау кезінде алаяқтық фактілері кездесуде.
Қаскөйлер "Della" және "Fa-Fa.kz" сияқты сервистерді пайдаланады. Көбінесе автокөліктер мен жүктерді Алматы қаласы мен Алматы облысынан еліміздің басқа өңірлеріне жеткізу туралы хабарландырулар орналастырылады.
Хабарландыру жарияланғаннан кейін алаяқтар тапсырыс берушілермен және жүргізушілермен WhatsApp мессенджері арқылы байланысады. Тапсырыс берушілерге өздерін тасымалдауды ұйымдастырушы немесе жүргізуші ретінде таныстырса, жүргізушілерге өздерін жүк иесі ретінде көрсетеді. Екі тараптың да сеніміне кіргеннен кейін тасымалдау шарттары жөнінде келісім жасайды.
Алматы қаласынан шыққаннан кейін алаяқтар ұрланған автокөлік немесе жүкті басқа көлікке ауыстырып тиеп, оны өз қалауларынша пайдаланады.
Мысалы, 7 маусымда Алматы қаласының тұрғыны полицияға өзінің қымбат автокөлігінің ұрланғаны туралы арызданған. Екі күн бұрын белгісіз тұлғалар алдау арқылы оның көлігін иемденіп, 60 миллион теңге көлемінде материалдық шығын келтірген.
Уақтылы жүргізілген жедел-іздестіру іс-шараларының нәтижесінде полиция қызметкерлері ұрланған автокөлікті тауып, заңды иесіне қайтарды.
Қылмыс жасады деген күдікпен үш адам ұсталды. Қазіргі уақытта сотқа дейінгі тергеп-тексеру жүргізілуде, оқиғаның барлық мән-жайы мен басқа да ықтимал сыбайластары анықталуда.
Осындай қылмыстардың алдын алу мақсатында ІІМ азаматтарға қауіпсіздік шараларын ұстануды ұсынады:
- жүргізушінің жеке куәлігін және көлік құжаттарын мұқият тексеру;
- тасымалдаушының телефон нөмірін хабарландыруда көрсетілген нөмірмен салыстыру;
- жүру бағыты мен жеткізудің соңғы нүктесін алдын ала жеке талқылау;
- интернеттен тасымалдаушы мен жүргізуші туралы пікірлерді зерделеу.
Құжаттарда сәйкессіздіктер байқалса, күмән туғызатын басқа да жағдайлар анықталса, тасымалдаушының қызметінен бас тартып, бұл туралы дереу 102 нөміріне хабарлау немесе жақын жердегі криминалдық полиция бөліміне жүгіну ұсынылады.
Уақтылы қырағылық таныту және полицияға жүгіну қылмыстың алдын алып, кінәлілерді жауапкершілікке тартуға көмектеседі.
Теміртауда ҚР ІІМ "Заң мен тәртіп" қағидатын іске асыру аясында қоғамда есірткіге қарсы мәдениетті қалыптастыруға, салауатты өмір салты құндылықтарын насихаттауға және жастарды қоғамдық пайдалы қызметке тартуға бағытталған ауқымды есірткіге қарсы іс-шаралар кешенін өткізді.
Іс-шаралар жергілікті атқарушы органдармен бірлесіп өткізілді. Оған мемлекеттік органдардың, қоғамдық бірлестіктер мен жастар ұйымдарының өкілдері, сондай-ақ мәдениет және спорт саласының өкілдері қатысты.
Есірткіге қарсы айлық аясында қала тұрғындары мен қонақтары үшін арнайы мақсаттағы бөлімшелер қызметкерлерінің көрсетілімдік қойылымдары, танымал қазақстандық өнерпаздардың қатысуымен концерттік бағдарлама, қолданбалы өнер бойынша шеберлік сабақтары, спорттық жарыстар, сондай-ақ белсенді және салауатты өмір салтын дәріптеуге бағытталған интерактивті алаңдар ұйымдастырылды.
Іс-шара барысында Ішкі істер министрлігінің өкілдері мен Теміртау қаласының әкімі жастармен кездесіп, олардың назарын білім алуға, спортпен айналысуға, өзін-өзі дамытуға және салауатты өмір салтын ұстануға шақырды. Сондай-ақ есірткіге қарсы күрес тек мемлекеттік органдардың ғана емес, бүкіл қоғамның ортақ міндеті екені атап өтілді.
26 мамыр мен 26 маусым аралығында өтіп жатқан нашақорлыққа қарсы айлық аясында Ақтау қаласында рейдтік және ақпараттық-профилактикалық іс-шаралар ұйымдастырылды.
Іс-шараға Маңғыстау облысы полиция департаментінің есірткі қылмысына қарсы іс-қимыл басқармасы мен профилактикалық жұмысты үйлестіру басқармасының қызметкерлері, еріктілер және қоғам белсенділері қатысты.
Рейд барысында есірткі құралдарын жарнамалайтын және интернет-дүкендердің мекенжайлары көрсетілген заңсыз наркограффити жазбаларын анықтау және жою жұмыстары жүргізілді. Нәтижесінде тұрғын үйлердің қабырғалары мен қоғамдық орындардағы ондаған заңсыз жазбалар өшірілді.
Сонымен қатар қала тұрғындары арасында түсіндіру жұмыстары жүргізіліп, есірткінің зияны, оның заңсыз айналымы үшін көзделген жауапкершілік туралы ақпарат берілді. Сондай-ақ салауатты өмір салтын насихаттауға бағытталған ақпараттық брошюралар таратылды.
Іс-шараның басты мақсаты – жастар арасында есірткінің таралуына жол бермеу, есірткі қылмыстарының алдын алу және қоғамда салауатты өмір салтын қалыптастыру.
Полиция азаматтарды есірткіге қатысты құқық бұзушылықтар мен заңсыз жарнамалар туралы ақпаратты құқық қорғау органдарына дер кезінде хабарлауға шақырады.
Ішкі істер министрлігі қоғамдық орындарда азаматтардың бет-жүзді тануға кедергі келтіретін киімдерді киюге тыйым салу талабын сақтауын қамтамасыз етуді жалғастыруда.
Бұл норма "Құқық бұзушылық профилактикасы" заңының 75-бабы 3-тармағында көзделген.
Адамның түр-сипатын көзбен тануға кедергі келтіретіндей дәрежеде бетті жабатын киімдерді кию құқық бұзушылық болып саналады.
Тыйым ауа райы жағдайларына және медициналық ұсынымдарға қатысты қолданылмайды. Сондай-ақ қызметтік міндеттерді атқару, спорттық және мәдени іс-шараларға қатысу кезінде де тыйым салынбайды.
Жауапкершілік Әкімшілік құқық бұзушылық туралы кодекстің 434-3-бабында белгіленген. Атап айтқанда, алғашқы құқық бұзушылық үшін ескерту қарастырылған. Бір жыл ішінде қайталанған жағдайда 10 айлық есептік көрсеткіш мөлшерінде айыппұл салынады. Қазіргі уақытта аталған құқық бұзушылық бойынша 1613 азамат әкімшілік жауапкершілікке тартылды.
- Тыйым тек қоғамдық қауіпсіздікті қамтамасыз етуге бағытталғанын және бет-жүзді жасыратын кез келген киім түріне қатысты қолданылатынын атап өтеміз. Ішкі істер органдары Заң мен Тәртіпті қамтамасыз ету жұмыстарын жалғастырып, азаматтарды қоғамдық орындарда белгіленген ережелерді сақтауға шақырады, - деді ІІМ.