Ақтөбе облысындағы "Жайсан", Солтүстік Қазақстан облысындағы "Жаңа жол" және Атырау облысындағы "Бөкей хан" шекаралық бекеттерінде ондаған жүк көліктер мен рейстік автобустар Ресей Федерациясына кіру кезегін күтіп тұр. Мұнда полиция қоғамдық тәртіпті қамтамасыз етіп, көлік ағынын реттеп, жүргізушілерге көмек көрсетуде.
Аталған аумақтарда патрульдік экипаждар мен учаскелік инспекторлар жұмыс істеп жатыр. Олар жүргізушілерге кеңес беріп, жағдайды бақылауда ұстап, жол қозғалысы қауіпсіздігін қамтамасыз етуде.
Басқа өңірлерде жағдай тұрақты, өткізу бекеттері қалыпты режимде жұмыс істеп тұр.
Еске сала кетсек, 30 маусымнан бастап Ресей Федерациясымен шекаралас кейбір бақылау-өткізу бекеттерінде жүк көліктерінің жиналуы байқалуда. Кептелістің бір себебі – көрші елге кірудің жаңа талаптары.
Ішкі істер министрлігі жүргізушілерді сабыр сақтап, тәртіпті бұзбай, полиция қызметкерлерінің нұсқауларын орындауға шақырады.
Алматыда полиция жол қозғалысы ережесін бұзған құқық бұзушыларды анықтау бойынша жүйелі түрде жалғастыруда. Соңғы 24 сағаттың ішінде жергілікті полиция қызметкерлері, иелері бірнеше рет айыппұл төлеуден жалтарған 6 көлікті ұстады.
Азаматтардың бірінде 5 млн 500 мың теңгеден астам қарызы бар. Тағы бір Toyota Alphard көлігінің жүргізушісінде 1 миллион 086 мың теңге айыппұл. Барлық автокөлік мамандандырылған айыппұл тұрағына жеткізіліп, иелеріне көрсетілген мерзімде қарыздарын толық өтеу қажеттігі туралы ескертулер берілді.
- Жазаның бұлтартпастығы - жолдардағы тәртіпті қамтамасыз етудің негізгі қағидасы. Азаматтар айыппұлдарды жүйелі түрде елемеу - көлікті ұстаудың бір жолы екенін түсінуі керек. Алдын алу жылында біз формальды емес, заңдылықты нақты сақтауға тұрақты түрде күш салып жатырмыз, - деді, Алматы қалалық ПД жергілікті полиция қызметі басқармасы бастығының орынбасары Тимур Ноғайбаев.
Түркістан облысы ПД Есірткі қылмысына қарсы іс-қимыл басқармасының қызметкерлері, әкімдік және Кентау қаласының полиция бөлімімен бірлесіп, нашақорлықтың алдын алу бойынша "Хан Fest" жастар фестивалін ұйымдастырды.
Іс-шараның мақсаты-жастардың коммуникативтік және шығармашылық қабілеттерін дамыту, олардың өзара іс-қимылын арттыру, психикалық денсаулығын нығайту және салауатты өмір салтын насихаттау, құқық бұзушылық пен нашақорлықтың алдын алу.
Шара барысында полицейлер мен жастар ресурстық орталығының өкілдері қатысушыларға табыс тілеп, жол қозғалысы ережесін сақтау мен балалар қауіпсіздігінің маңыздылығын ескертті. Жарыс бірнеше кезеңдерде өтті.
Іс-шара қорытындысы бойынша I орынды "Қаратау" командасы, II орынды "Eco Unite" командасы, ал III орынды "Eagles" командасы жеңіп алды. Барлық қатысушылар алғыс хаттар мен бағалы сыйлықтарды иеленді.
Фестиваль соңында дарынды жастар домбыра тартып, ән шырқап, шығармашылық шеберліктерін көрсетті. Іс-шара достық атмосферасында өтті және барлық қатысушыларға ерекше көңіл-күй сыйлады.
"Жаңа өмірге жол" жобасы: сотталғандарға босату жолында көмек көрсету.
Қостанай облысы бойынша қылмыстық-атқару жүйесі департаменті "Жаңа өмірге жол" жобасын әзірледі. Бастама бостандыққа шығуға дайындалып жатқан сотталғандарды қолдауға арналған. Бұл қиын өмірлік жағдайға тап болған адамдарға қолдау көрсету және оларға бостандықтағы өмірге бейімделуге көмектесу қадамы.
Жоба Қостанай қаласының № 38 қылмыстық-атқару жүйесі мекемесінде сынақтан өтеді.
Жобаның тұсаукесері мен іске қосылуына орай жергілікті атқарушы және құқық қорғау органдарының, жеке және мемлекеттік сот орындаушыларының, нотариустар мен үкіметтік емес ұйымдардың, Ш.Қабылбаев атындағы ІІМ Академиясының, сондай-ақ Қостанай облысы бойынша адам құқықтары жөніндегі уәкілдің өкілдерінің қатысуымен кеңес өткізілді.
"Жаңа өмірге жол" жобасы сотталғандарды қайта әлеуметтендірудің тағы бір құралы болмақ.
Түркістан станциясындағы желілік полиция бөлімінің қызметкерлері үйлесімді әрі жедел әрекет етіп, қайғылы жағдайдың алдын алып, жаяу жүргіншілер көпірінен секірмек болған жас жігіттің өмірін сақтап қалды.
Оқиға осы жылдың 26 маусымында болды. Түркістан станциясындағы желілік полиция бөлімшесінің патрульдік қызметінде жүрген полиция кіші сержанты Айдарбек Нұрсұлтан темір жолдардың үстінен өтетін аспалы көпірдің қоршауынан секіруге әрекет еткен азаматты байқады. Бір сәт те ұттырмай, полиция қызметкері жедел әрекет етіп, азаматтың қолынан ұстап, әңгімелесіп, оны ұстап тұруға тырысып, көмек келгенше уақытты созуға тырысты.
Көлік полицейлерінің үйлесімді және жедел әрекеттерінің, сондай-ақ Түркістан облысы төтенше жағдайлар департаментінің қызметкерлерінің арнайы өрт сөндіру техникасымен бірге атқарған жұмыстары нәтижесінде азамат көпірден аман-есен түсіріліп, жедел медициналық жәрдем бригадасына тапсырылды.
Тексеру барысында, қала тұрғынының отбасылық және тұрмыстық кикілжіңнің әсерінен ауыр өмірлік жағдайға душар болғаны анықталды. Оған қажетті моральдық-психологиялық көмек көрсетілді.
2024 жылғы қаңтардан бастап Нұрсұлтан Айдарбек ішкі істер органдарында қызмет атқарып келеді. Оның жедел әрекеттері мен кәсіби шеберлігі адамның өмірін сақтап қалуға септігін тигізді.
Ұлттық домбыра күніне орай Абай облысында ерекше флешмоб ұйымдастырылды. Іс-шара Семей қаласындағы Абай музейінің алдында өтті — бұл халқымыздың рухани құндылықтары тоғысатын қасиетті мекен.
Акцияға 200 полиция қызметкері қатысты. Құқық қорғау саласының өкілдері әйгілі Құрманғазының “Адай” күйін бір оркестр болып орындап, ұлттық мұрамызға деген құрметін көрсетті.
Домбыра үні халықтың жүрегіне жол тауып, көрермендерге ерекше әсер сыйлады. Бұл — полиция қызметкерлерінің заң мен тәртіп қана емес, ұлттың рухани болмысына да жақын екенін білдіретін жарқын белгі.
Іс-шара республикалық “Заң мен Тәртіп” акциясы аясында өтті.
Күндізгі уақытта полицияға Төле би даңғылы бойындағы үйлердің бірінің ауласында тұрған мопедтің ұрланғаны туралы хабарлама келіп түсті. Белгілі болғандай, мотоцикл дулығасын киген белгісіз екі адам оңтайлы сәтті пайдаланып, ұрлық жасаған.
Оқиға орнына дереу жедел тергеу тобы жетті. Жақын маңдағы аумақты жедел тексеру барысында Алмалы аудандық ПБ-ға қарасты полиция бөлімінің жедел уәкілі Елдар Тоқташев сипаттамалары ұқсас күдіктілерді байқады. Жолда көлік көп болғандықтан, полиция қызметкері күдіктілерді жаяу аңди бастады. Бірнеше рет тоқтауды талап еткеніне қарамастан, күдіктілердің бірі қашуға әрекеттеніп, салдарынан полиция қызметкерін бірнеше метрге сүйреп, басқа жол қозғалысына қатысушымен соқтығысқан.
Алған жарақатына қарамастан, полиция қызметкері батылдық танытып, күдіктіні ұстады. Кейіннен оның қаладағы мопед ұрлығының кем дегенде төрт эпизодына қатысы бар екендігі белгілі болды.
- Елдар Тоқташевтың батыл әрекеті қоғамдық қауіпсіздікке қатер төндіретін күдіктіні ұстауға мүмкіндік берді. Біз өз қызметкерлерімізбен мақтанамыз, олар Заң мен тәртіп жай ғана сөз емес, азаматтар үшін нағыз қалқан екенін күн сайын дәлелдеуде, - деді Алмалы аудандық ПБ-ға қарасты полиция бөлімінің бастығы Тимур Иманбеков.
Күдіктіге қатысты сотқа дейінгі тергеу амалдары жүргізілуде. Ол қамауға алынды. Полиция қызметкерлері күдіктінің осыған ұқсас басқа да қылмысқа қатысы бар-жоғын тексеріп жатыр.
Германиядан келген велошабандоздар қазақстандық полицейлерге алғыс білдірді.
Әлеуметтік желілерде Германиядан келген велошабандоздар павлодарлық полицейлерге алғыс білдірген видеосы тарады. Белгілі болғандай, Шарбақты — Астана автожолын патрульдеу кезінде автопатруль құрамындағы Абай Тыныбаев пен Мақсат Қожанбаев рұқсат етілмеген трассамен келе жатқан екі велосипедшіні тоқтатқан. Әңгіме барысында шетелдіктердің 1 мамырда Германиядан Қытайға аттанғанын, Гиннес рекордтар кітабына ену үшін сапар шегіп жүргенін білген полицейлер, олардың армандарына жетуге көмектесуге шешім қабылдаған.
– Бізге тағы 80 шақырымдай жол жүру керек болатын. Жолдың жартысында бізді полиция қызметкерлері тоқтатты. Велосипедпен бұл жолмен жүруге болмайтынын түсіндірді. Біз бұл туралы білмегенімізді айттық. Полицейлер өте мейірімді болды, айыппұл салудың орнына түскі асқа шақырды. Ас үстінде әңгімелесіп, арманымыз бен жоспарларымызды айтып бердік, ал олар полициядағы қызметі жайлы баяндады. Кейінірек бізге жолға қажетті азық-түлік сатып алып беріп, Екібастұз қаласына дейін шығарып салып, әріптестеріне табыстады. Мұндай әрекет полицейлердің мейірімділігін және адамгершілігін көрсетеді, — дейді шетелдіктер.
Полицейлердің қонақжайлылығы мұнымен аяқталған жоқ. Талбикке Томмидің айтуынша, олар кешкі уақытта Екібастұз қаласына жеткенде қайда тоқтайтынын білмеген. Сол кезде полиция аға лейтенанты Дархан Таурбаев көмекке келіп, үйіне шақырып, қонақ еткен.
Келесі күні таңғы астан кейін Дархан оларды “Богатырь” кен орнының көрініс алаңына апарды. Ондағы экскаваторлар мен көмір өндіруге арналған ірі техника шетелдік саяхатшыларға ерекше әсер қалдырды.
Шетелдік қонақтар полиция қызметкерлеріне шын жүректен алғыстарын білдіріп, сапарын жалғастырды. Қоштасар сәтте тәртіп сақшылары оларға сәтті жол, жол ережесін қатаң сақтау және қиын жағдайда полицейлерге жүгіну қажеттігін еске салды.
– Бұл жағдай полиция қызметкерлерінің мейірімділігі мен адамгершілігі шетелдік туристердің еліміз туралы оң пікір қалыптастыруына сеп болатынын тағы бір мәрте дәлелдейді, – деп атап өтті ведомство өкілдері.
Ішкі істер министрлігінде дәстүрлі түрде өткізілетін “Серт” республикалық детективтік шығармалар байқауының қорытындысы шығарылды. Жеңімпаздардың туындылары жинақталған жаңа кітаптардың да тұсауы кесілді.
Қаламгерлер додасы биыл үшінші рет өткізілді. Жарысқа өз шығармаларын республиканың әр аймағынан журналистер, жазушылар, әдебиетшілер жолдаған болатын. Одан бөлек, биыл бәйгеге аумақтық полиция департаменттерінің қызметкерлері де қосылды.
- Заң мен тәртіп және полиция тақырыбына осындай қызығушылық бізді қуантады. Жалпы детектив жанрының өзі оқырмандарға өте қызықты. Керемет туындылар кең аудиторияға жетуі тиіс деп есептейміз, - деді Ішкі істер министрі Ержан Саденов.
Байқау қорытындысы бойынша Атырау облысы полиция департаментінің баспасөз хатшысы Мейірім Ердәулет “Үздік шығарма” номинациясымен, Түркістан облысынан келген Сейдулла Садықов “Қарымды қаламгер” номинациясымен марапатталды. Сонымен қатар кітап беттерін тиісті картиналармен әрлеген Динара Баржаксина алғысқа ие болды. Үшінші орынды Мұхтар Анарбекұлы, екінші орынды Владимир Бычков, бірінші орынды Жадыра Шамұратова қанжығасына байлады.
Одан бөлек, бұл күні “Біздің полиция” фотобайқауының жүлдегерлеріне марапаттар табысталды. "Заң мен Тәртіп" номинациясы бойынша Бекарыс Нұртіллә, "Қасымыздағы қаһармандар" номинациясы бойынша жеңімпазы Жанболат Кенжеғұл, "Балалық шақтың қорғаны" номинациясы бойынша Камиль Аллаяров, "Жол – қауіпсіздік аймағы" номинациясы бойынша Байтас Исмурзенов, "Шұғыл! Шақыру!" номинациясы бойынша Бақтияр Ғабдулов озық шықты. суретте Байтас Исмурзенов - "Жол - қауіпсіздік аймағы"
- Мен алғыс білдіргім келеді. Осында келгеніме өте қуаныштымын, - деді фотограф Камиль Аллаяров.
Ішкі істер министрлігінің бастамасымен жасалған бұл байқаулар әдебиет пен мәдениетті дамытуға, азаматтардың құқықтық санасын арттырып, құқық қорғау органдары қызметімен жақынырақ таныстыруға бағытталған.
ІІМ Басқару академиясының базасында құқық қорғау органдарының басшылық лауазымдағы қызметкерлеріне арналған алғашқы ведомствоаралық біліктілікті арттыру курсы сәтті аяқталды.
Бағдарламаға ІІМ, Бас прокуратура, Сыбайлас жемқорлыққа қарсы іс-қимыл агенттігі және Экономикалық тергеу қызметінің өкілдері қатысты.
Оқу ерекше форматта алғаш рет өткізілді және бұл Мемлекет басшысы Қасым-Жомарт Тоқаевтың "Заң мен Тәртіп" қағидатын іске асыру жөніндегі тапсырмасын орындау аясында маңызды қадам болды. Курстың басты мақсаты – ведомствоаралық өзара іс-қимылды нығайту, озық тәжірибе алмасу, құқықтық тәртіпті, заңдылықты және сыбайлас жемқорлыққа қарсы саясатты қамтамасыз етудің бірыңғай тәсілін қалыптастыру.
Салтанатты жабылу рәсімінде ішкі істер министрі Ержан Саденов тыңдаушыларға оқу курсын аяқтағаны туралы сертификаттар табыс етті.
– Құқық қорғау органдары арасындағы өзара іс-қимыл мен үйлестіру – заңдылықты тиімді қамтамасыз етудің кілті. Мұндай бастамалар осы бағыттағы мемлекеттік басқарудың тиімділігін арттыруда септігін тигізеді, – деді министр.
Осындай форматтағы курстарды өткізу азаматтардың құқықтары мен бостандықтарын қорғауға, елдегі құқықтық тәртіпті нығайтуға бағытталған кадрларды даярлау және олардың біліктілігін арттыру жүйесінің маңызды элементін құрайды.