Мемлекеттік органдардың баспасөз хатшылары өз біліктіліктерін арттырды

ҚР Ақпарат және қоғамдық даму министрлігі Астана мемлекеттік қызмет хабымен бірге жергілікті атқарушы орган және орталық мемлекеттік органдардың баспасөз хатшыларына арнап «Әлеуметтік желілер – мемлекеттік органдар мен жұртшылықты байланыстырушы тиімді платформа» тақырыбында семинар ұйымдастырды.

Семинарға қатысушылар мемлекеттік секторда әлеуметтік желілерді пайдаланудың озық тәжірибесін және халықпен өзара іс-қимылдың цифрлық әдістерін зерделеуге мүмкіндік алды.

Семинарда Мемлекет пен қоғам коммуникациясын дамыту департаментінің директоры Бекзат Рахимов Қазақстанның ақпараттық кеңістігінде әлеуметтік желілердің рөлі айтарлықтай өсіп келе жатқанын айтты. «Интерньюс-Қазақстан» жүргізген зерттеуде медиа тұтынуды зерттеу нәтижелері бойынша, теледидар, баспасөз, радио және веб-сайттар сынды дәстүрлі ақпарат көздері үлесі төмендегенін атап өтті. Сонымен қатар, зерттеу деректері бойынша халықтың ресми ақпарат көздеріне деген сенім деңгейі екі есе төмендеп, 4,5% құрады.

Грузияның сарапшылары Ани Сирбиладзе мен Иракли Джинианидзе әлемдегі және аймақтағы цифрлық үрдістерді ескере отырып, мемлекеттік органдарды әлеуметтік медиада ілгерілету бойынша өз тәжірибелерімен бөлісті.

Іс-шара барысында баспасөз хатшылары түрлі кейстерді талдады және халықпен тиімді байланыс орнату мақсатында контент түрлерін пайдалану мен цифрлық қарым-қатынас орнатуды талқылады. Сонымен қатар, олар түрлі арналарға, пайдаланушылардың мінез-құлық реакцияларына, сондай-ақ әлеуметтік желілердегі стратегиялық жоспарлау мәселелеріне сараптама жасады.