Үгіт-насихат кезеңінде саяси партиялардың БАҚ-та тең дәрежеде ақпараттандыруға қолжетімділігі қамтамасыз етілді

Ақпарат және қоғамдық даму вице-министрі Кемелбек Ойшыбаев сайлау алдындағы үгітті жүргізу қорытындылары және сайлау учаскелерінің дауыс беру күніне дайындығы туралы Ортсайлауком отырысына қатысты.

Кемелбек Ойшыбаев 10 желтоқсан мен 8 қаңтар аралығындағы үгіт-насихат кезеңінде мониторингпен 500-ге тарта республикалық және өңірлік БАҚ қамтылғандығын, оның ішінде 321 газет, 47 телеарна және 131 интернет-ресурс бар екендігін айтып берді.

Елімізде қоғамдық-саяси тақырыпта хабар таратып жүрген барлық БАҚ қамтылғанына тоқталған вице-министр: «Үгіт-насихат кампаниясын мониторингілеу қорытындысы бойынша Парламент Мәжілісінің және мәслихаттар депутаттарының кезекті сайлауына қатысты барлық БАҚ-та 22 мыңнан астам материал жарияланды (оның ішінде 8822-сі газетте, 6930-ы телеарнада, 6855-і интернет-ресурста). Бұл өз кезегінде азаматтар мен БАҚ тарапынан сайлауға жоғары қызығушылықты тағы да дәлелдеп отыр», - деді.

Телеарналарда «Ақ жол» мен «Ауыл» партиялары біршама басым болған, яғни эфирлік уақыт бойынша 21 пайыздан тиесілі болды. Қалған партиялар арасында эфирлік уақыт бірдей деңгейде бөлінген – 19-20 пайыздан.

Баспасөз БАҚ-тарда «Nur Otan» партиясы сәл басымырақ болғаны байқалды – 23 пайыз. Қалған партиялар бойынша материалдар ауқымының үлесі келесі деңгейде көрінді: «Adal» және «Ауыл» – 20 пайыздан, «Ақ жол» – 19%, Қазақстан халық партиясы – 18%.

Сонымен қатар, интернет-ресурстарда саяси партиялардың қызметін жариялау бірдей деңгейде қалыптасты, әр партия бойынша 20 пайыз шамасында. «Әлеуметтік желілердегі үгіт-насихатқа тоқталсақ, науқанның басталуына арналған Орталық сайлау комиссиясының отырысында атап өткенімдей, әлеуметтік желілердегі үгіт-насихатты есепке алмадық», - деді Кемелбек Ойшыбаев.

Вице министр бұл бағытта ведомство халықаралық тәжірибені, сондай-ақ заңмен тыйым салынбаған кез келген тәсілмен өзінің азаматтық ұстанымын білдіруде әр адамның конституциялық құқын назарға алғанын атап өтті. «Жалпы, мониторинг нәтижесі бойынша қазақстандық БАҚ саяси партияларға бұқаралық ақпарат құралдарына теңдей қолжетімдікті қамтамасыз етті деп мәлімдей аламыз», - деді вице-министр.