Қазақстан Республикасы Президентінің Жарлығымен бала өмірін құтқарған Ақмола облысы ҚАЖ қызметкері марапатталды

Ақмола облысында №6 мекеменің қызметкері, режим бөлімінің ақпараттандыру және байланыс тобының бақылаушысы Рахат Байлин ерлік пен жанқиярлық танытып, өртке оранған пәтерден кішкентай баланың өмірін аман алып қалды. Өзінің батыл әрекеті үшін ол 2025 жылғы 21 қазандағы Қазақстан Республикасы Президентінің Жарлығымен жоғары мемлекеттік марапат – «Жауынгерлік ерлігі үшін» медалімен марапатталды.

Облыс орталығында болған оқиға кезінде бес қабатты үйдің терезесінен қою түтін шығып жатқан. Сол сәтте оқиға орнында болған біздің жерлесіміз – қылмыстық-атқару жүйесі қызметкері еш ойланбастан, өз өміріне қауіп төндіре отырып, өрт ошағына ұмтылды. Оның мақсаты – от тұзағында қалған адамдарға дереу көмек көрсету болды.

Өз өмірін қатерге тігіп, қызметкер өрт каптаған пәтерге кіріп, қою түтін арасынан демі үзілуге шақ қалған баланы тауып алды. Рахат Байлиннің батыл әрі жедел әрекеттерінің арқасында бала өрт ошағынан аман-есен шығарылып, оқиға орнына жеткен төтенше қызмет өкілдеріне табысталды. Оның дер кезінде жасаған ерлігі мен шешімталдығы орны толмас қасіреттің алдын алды.

Қызметкердің ерлігі жоғары бағаланды. Қазақстан Республикасының Ішкі істер министрі қызметкердің ерекше батылдығы мен кәсібилігін мойындай отырып, оған Мемлекет басшысының марапатын жеке өзі табыстады.
– Бұл оқиға біздің арамызда нағыз батырлар бар екенін және азаматтардың өмірі мен қауіпсіздігін қорғау – құқық қорғау органдары, соның ішінде ҚАЖ қызметкерлері үшін ең жоғары парыз екенін тағы бір дәлелдеді, – деп атап өтті Ақмола облысы бойынша ҚАЖ департаменті бастығының орынбасары Мерген Аргумбаев.

Астанада Қылмыстық-атқару жүйесінің мұражайы ашылды: «Тарихтың сақтаушысы, рухтың тәрбиешісі»

Астана қаласы бойынша ҚАЖ департаментінде қылмыстық-атқару жүйесінің жаңа мұражайының салтанатты ашылуы өтті. Бұл мұражай тарихи жадымызды сақтау, ағарту және қоғаммен ашық диалог орнатуға арналған алаңға айналды.
Экспозицияда қылмыстық-атқару жүйесінің қалыптасу кезеңдері, Ұлы Отан соғысы жылдарындағы қызметкерлердің ерлігі, сондай-ақ қызметтік борышын атқару кезінде ерлік көрсеткен азаматтардың есімдері бейнеленген. Мұражайда ҚАЖ-нің адамгершілік қырына, сотталғандарды қайта әлеуметтендіру және тәрбиелік мақсаттарға ерекше назар аударылған.
Ашылу рәсіміне ҚР ІІМ өкілдері, ардагерлер және Департамент қызметкерлері қатысты. Іс-шара соңында қатысушылар қылмыстық-атқару жүйесінің ардагерлерімен бірге қылқан жапырақты ағаштар отырғызды. Бұл ағаштар - төзімділік пен тұрақтылықтың, жаңару мен адалдықтың символы, құқық қорғау саласының қызметкерлеріне тән қасиеттердің көрінісі.

«Темір тордың ар жағындағы өкініші» айдары: ҚАЖ комитеті жаңа жобаны іске қосты

Қылмыстық-атқару жүйесі комитеті (ҚАЖ) «Сотталғандардың өкініші» атты жаңа айдарды іске қосты. Бұл жобаның басты мақсаты – заңды бұзудың зардаптары туралы ескерту жасау.

Сотталғандар өздерінің қылмыстық жолы, бас бостандығынан айыру орындарындағы қиындықтар және жасаған істеріне өкініп, сол әрекеттері туралы ойланған сәттері жайында әңгімелейді.

«Бостандық пен заңға бағынудың қадірін түсінген бұл адамдардың оқиғалары – жастар арасындағы құқықбұзушылықтардың алдын алуға бағытталған. Көптеген жастар өз әрекеттерінің салдарын ойламай, есірткі қолдануға, агрессияға немесе құқық бұзуға барады. Егер бұл контент бірнеше адамға болсын ескерту бола алса – бұл үлкен нәтиже», – дейді ҚАЖ комитетіндегілер.

Жеке терапия кезінде сотталғандардың көпшілігі жасаған ісіне қатты өкінетінін, бостандықтан айырылғанына қиналатынын және әсіресе жақындарына келтірген қайғы үшін уайымдайтынын айтады. Олар бұл туралы ашық айтып, басқаларға да жеткізуге келісті.

«Мен ешкімді кінәламаймын, бұл – менің қателігім. Соның кесірінен қазір осында отырмын. Курстастарым диплом алып жатыр, ал мен жоқпын... Егер бәрін уақтылы түсінгенімде, мен де қазір диплом алып жатқан болар едім», – дейді 23 жастағы сотталған. Ол тіс дәрігері болуды армандаған, бірақ басқа жолды таңдаған. Есірткі құқықбұзушылығы үшін ұсталып, 7 жылға бас бостандығынан айырылған.

Бейнероликтерде сотталғандар жастарға үндеу жасап, бостандықты қадірлеуге, болашағын ойлауға және ойланбай жасалатын әрекеттерден сақ болуға шақырады.

Бірінші видео-оқиға 20 мыңнан астам қаралым жинады, екінші – 15 мыңнан астам, ал үшінші бейнежазба – 55 мыңнан астам қаралымға ие болды.

Жаңа бейнежазбалар аптасына бір рет шығады. Жобада ер адамдар да, әйелдер де, сондай-ақ ҚАЖ мекемелерінде отырған кәмелетке толмағандар да қатысады.

Айтым Жақұпов погон таққан жандармен жүздесті

Еліміздің бас жаттықтырушысы ҚАЖ қызметкерлеріне арналған жаттығу өткізді

Айтым Жақұпов құқық қорғау органдарының қызметкерлерін төзімділікке сынады

Рекорд иесі әрі «JanaMen» әлеуметтік жобасының негізін қалаушы Айтым Жақұпов Қылмыстық-атқару жүйесі комитетіне (ҚАЖК) келіп, мекеме қызметкерлеріне ашық жаттығу өткізді. Сондай-ақ ол өзінің өмірлік тәжірибесімен және мотивациясымен бөлісті.

Бұл кездесу күштік құрылымдар арасында салауатты өмір салтын насихаттауға бағытталған бастаманың бір бөлігі болды. Рекордтарымен және бұқаралық спорттық жобаларымен танымал Жақұпов бұл жолы тек физикалық дайындық деңгейін көрсетіп қана қоймай, ҚР ІІМ ҚАЖК жеке құрамымен де ашық әңгімелесті.

– Сіз салауатты өмір салтын шынайы трендке айналдырдыңыз, – деді Қылмыстық-атқару жүйесі комитетінің төрағасы Абай Қайырбеков. – Мықты әрі дені сау ұлт қалыптастыруға қосқан үлесіңіз үшін алғыс білдіреміз. Мыңдаған адам сіздің видеоларыңыз бен оқиғаларыңыздан шабыт алады. Сіз секілді азаматтардың арқасында қоғамда өзін-өзі дамытуға деген ұмтылыс арта түсуде.

Өз кезегінде Айтым Жақұпов заң мен тәртіпті қамтамасыз етуші азаматтармен әріптестіктің маңыздылығын атап өтті:

– Мұнда болу — мен үшін үлкен мәртебе. Шақырғандарыңыз үшін және күрделі, бірақ аса маңызды қызметіңіз үшін алғыс айтамын. Сіздердің арқаларыңызда еліміздегі адамдар өздерін қауіпсіз сезінеді. Тәртіп пен заң — тұрақты қоғамның іргетасы екеніне сенімдімін. Сіздермен бірлесе жұмыс істеп, өз үлесімді қосқаныма қуаныштымын.

Кездесу жылы әрі достық жағдайда өтті. Қатысушылардың айтуынша, мұндай іс-шаралар мотивацияны арттырып, командалық рухты нығайтады.
Қазір Айтым Жакупов тарихқа енуді және 100 000 кг салмақ тастау бойынша әлемдік рекорд орнатуды мақсат етіп отыр. Қазақстан бұл бастама арқылы бірігудің орталығына айналмақ.

Оның позитивті бастамаларының арқасында Айтым елдің сүйіктісіне айналды. Оның шоуын миллиондаған қазақстандықтар тамашалап, таңданысын білдіруде.

Түрме өндірісі жаңаша: сотталғандар жаңа өндіріс түрлерін меңгеруде

Қазақстанның қылмыстық-атқару жүйесі мекемелерінде өндірістік қызметтің жаңа көкжиектері ашылуда. ҚАЖ комитеті сотталғандардың еңбек түрлерін кеңейту туралы хабарлады. Бұл адамдарды тек жұмыспен қамту емес — түрме өндірісі нарықта барған сайын сапалы бола бастады. Мұнда басқалар жасай алмайтын дүниелерді істей алады.

Сотталғандардың басым бөлігі — еңбекке қабілетті ер адамдар. Олар тек жұмыс жасағысы келіп қана қоймай, сонымен бірге табыс табуға, талап-арыздарды өтеуге және отбасыларына көмектесуге нақты мүмкіндікке ие.

«Колонияларда 300-ден астам кәсіпкерлік нысан тіркелген, онда сотталғандар еңбек етеді. Жалақы мөлшері — 85 мың теңгеден басталады. Ал қоныс-колонияларда, әсіресе мекемеден тыс жерде жұмыс істеген жағдайда, одан да көп табыс табуға болады», — деп хабарлады Комитет.

Сонымен қатар, сотталғандарға "қолма-қол" ақша берілмейді — қаражат олардың жеке шотына түседі. Бұл ақшаны туыстарына жіберуге, сот шешімдері бойынша өтемақы төлеуге немесе түрме ішіндегі шығындарды өтеуге пайдалануға болады.

Жаңа өндірістік толқын: бәтеңкеден бастап киіз үйге дейін

Бұрын колониялардағы еңбек металл мен ағашпен шектелсе, бүгінде өндірістің географиясы мен ауқымы айтарлықтай кеңейіп келеді. Жарқын мысалдардың бірі – Жамбыл облысындағы жаңа аяқ киім цехы, онда сотталғандар ерлерге, әйелдерге және балаларға арналған аяқ киім шығарады.

«Кәсіпкерлер 27 арнайы тігін машинасын сатып алды. Табандар (табандықтар) тікелей сол жерде дайындалады. Сапасы – өте жақсы. Мұндай бәтеңкеге сұраныс бар», – деп мәлімдеді ҚАЖ комитеті.

Цехта 40-тан астам адам жұмыс істейді. Бұл тек жұмыс емес, сонымен қатар бостандықта да қажет болатын мамандықты меңгеру мүмкіндігі. Айта кетейік, мұндай жобалар сотталғандарды жұмыспен қамтуды мақсат ететін «Еңбек» РМК қолдауымен жүзеге асырылады.

Бизнеске тиімді – сотталғандар тәртіпті және ынталы

Түрме өндірісімен ынтымақтастық бизнес үшін барған сайын тартымды бола түсуде. ҚАЖ комитеті атап өткендей: колонияларда жұмыс істей біледі — тәртіп бұзушылықтар жоқтың қасы, кадрлар тұрақты, ал өндірілген өнімге тіпті өңірден тыс жерлерде де сұраныс бар.

Қазақстан бойынша сотталғандар бетон плиталарын, жиһаз, қақпа, сабын, макарон өнімдері, күнбағыс майы, шырындар, арнайы жұмыс киімі, абаттандыруға арналған орындықтар, тіпті… шынайы киіз үйлер де жасап шығарады.

Жылыжайлар, модульдер, оқыту: өндірістік алаңдар жаңартылып жатыр

Сәтті мысалдардың бірі – Екібастұздағы жылыжай шаруашылығы. Мұнда 100-ден астам сотталған жұмыс істейді. Олар жыл бойы көкөніс өсіреді. Ескі өндірістік орындар мәселесін шешу үшін бірқатар мекемеде санитарлық және технологиялық талаптарға сай заманауи модульдік ангарлар салына бастады.

«Кейбіреулердің тәжірибесі болмауы мүмкін, бірақ ең бастысы – ынта. Қажет болған жағдайда біз үйретеміз  және адам еш қиындықсыз жұмысқа кірісіп кетеді», – дейді ҚАЖ комитетіндегілер.

Болашаққа арналған дағдылар: түрме өндірісі – жаңадан бастауға мүмкіндік

Бұл өзгерістердің басты мақсаты – адамдарды жай ғана жұмыспен қамту емес, бостандыққа шыққан соң қалыпты өмірге оралуға мүмкіндік беру. ҚАЖ комитетінде сенімді түрде айтады: металлмен, ағашпен немесе матамен жұмыс істеуді үйренген адам бостандықта жұмыссыз қалмайды. Әсіресе, жиһаз және металл өңдеу өндірісі барлық өңірлерде жоғары сұранысқа ие.

Өскемендегі колонияда шина өңдеу цехы ашылды

Өскемен қаласында ҚР ІІМ Қылмыстық-атқару жүйесі комитетінің №17 мекемесінде автомобиль шиналарын өңдейтін жаңа цех іске қосылды.

Енді сотталғандар жаңа мамандықты игеріп, резеңке плитка мен брусчатка жасауға қажетті шикізат өндіре алады.

Жеке кәсіпкерлікпен бірлесіп жүзеге асырылған бұл жоба сотталғандарды жұмыспен қамтып қана қоймай, ескі шиналарды қайта өңдеу арқылы аймақ экологиясына да үлес қосады.

Шығыс Қазақстан облысы бойынша Қылмыстық-атқару жүйесі департаменті мұндай өндірістердің сотталғандарды қоғамға қайта бейімдеуде маңызды рөл атқаратынын атап өтті.

"Жұмыс оларға өздерін қажетті сезінуге көмектеседі және бостандыққа шыққандағы өмірге дайындайды", — деп атап өтті ШҚО бойынша ҚАЖД бастығының орынбасары Дастан Санбаев.

Бүгінгі таңда ШҚО мекемелерінің өндірістік аймақтарында шағын және орта бизнестің 33 субъектісі жұмыс істейді, мұнда еңбекке қабілетті сотталғандардың шамамен 55,7%-ы жұмыспен қамтылған.

Жаңа цехта өндіріс процесі толығымен жолға қойылған. Қайта өңделген шиналардан резеңке ұнтағы алынады, ол кейін брусчатка, тротуар плиталары, балалар және спорт алаңдарына арналған жабындар жасау үшін қолданылады.

Пенитенциарлық жүйеде әлеуметтік жұмысты ҚАЖК мен «КӘӘҰ» бірлесе дамытатын болады

Астана, 2025 жылғы 26 тамыз – Қазақстан Республикасы Ішкі істер министрлігінің Қылмыстық-атқару жүйесі комитеті (ҚАЖК) мен «Ұлттық әлеуметтік жұмысшылар альянсы» республикалық қоғамдық бірлестігі (КӘӘҰ) өзара ынтымақтастық туралы меморандумға қол қойды.

Аталған құжат қылмыстық-атқару жүйесінде кәсіби әлеуметтік жұмысты дамыту мен нығайтуға бағытталған және негізгі бағыттар бойынша бірлескен іс-шараларды жүзеге асыруды көздейді:

• Сотталғандарға психологиялық және әлеуметтік қолдау көрсету – консультациялар, психологиялық жарақатпен жұмыс, отбасылық байланыстарды нығайту, қайта әлеуметтенуге жәрдемдесу және пенитенциарлық кезеңнен кейінгі қолдау;

• Білім беру бағдарламалары – ҚАЖ мекемелерінің қызметкерлеріне арналған әлеуметтік жұмыс және кейс-менеджмент бойынша тренингтер, арнайы оқу курстары мен материалдарын әзірлеу;

• Нормативтік-құқықтық бастамалар – ҚАЖ мекемелеріне «әлеуметтік қызметкер» лауазымын енгізу бойынша ұсыныстар дайындау, лауазымдық нұсқаулықтар мен өзара іс-қимыл алгоритмдерін әзірлеу, кәсіби стандарт қалыптастыру;

• Әлеуметтік осал топтармен жұмыс – бас бостандығынан айыру орындарында отырған кәмелетке толмағандар, балалы әйелдер және мүгедектігі бар адамдарды қолдау бағдарламаларын әзірлеу;

• Әлеуметтік қайта интеграция – тәлімгерлік, босатылғаннан кейін жұмысқа орналасуға және әлеуметтік қызметтерге қол жеткізуге жәрдемдесу.

ҚАЖ комитеті мен Ұлттық әлеуметтік жұмысшылар альянсы арасындағы ынтымақтастық пенитенциарлық жүйеде әлеуметтік жұмыста құқық қорғау тәсілін енгізуге ықпал етпек. Бұл – адамның қадір-қасиетіне құрмет көрсету, адам құқықтарын сақтау және сотталғандармен гуманистік қарым-қатынас жасау үшін жағдай жасауға баса назар аударуды білдіреді.

Мұндай көзқарас қайта әлеуметтендіру жүйесін нығайтып, қайталап құқық бұзушылық жасау тәуекелін төмендетуге және бұрын сотталған адамдардың қоғамға табысты бейімделуіне мүмкіндік береді.

Конституцияның мерейтойын Қарағанды облысы колониясының қызметкерлері велошерумен атап өтті

Қарағанды облысы бойынша және Ұлытау облысы бойынша ҚАЖД №36 мекемесінің қызметкерлері Қазақстан Республикасы Конституциясының 30 жылдығын ерекше түрде-велошерумен атап өтті.

Ұзындығы 30 шақырымдық маршрут символдық түрде таңдалды — елдің Негізгі Заңы қабылданған күннен бастап өткен жылдар санына орай.

Қатысушылар Конституция мемлекеттіліктің берік іргетасы, азаматтардың құқықтары мен бостандықтарының кепілі екенін атап өтті. Велошеру қылмыстық-атқару жүйесі қызметкерлерінің патриотизмді нығайтуға және салауатты өмір салтын насихаттауға өз үлесін қосуға деген ұмтылысының көрінісі болды.

"Велошеру тек спорттық іс-шара ғана емес, сонымен қатар ұжымды біріктіруге, командалық рухты арттыруға және қылмыстық — атқару жүйесі қызметкерлері арасында белсенді бос уақытын танымал етуге арналған алаң болды", - деп атап өтті мекеме бастығының орынбасары әділет подполковнигі Арман Ермекбайұлы Кошкинов.

Мұндай іс-шаралар корпоративтік құндылықтарды нығайтуға, дене белсенділігін қолдауға және қоғамдағы ҚАЖ органдарының оң имиджін қалыптастыруға ықпал етеді.

Қызылорда облысы бойынша ҚАЖ департаменті сотталғандарды еңбекпен қамту және олардың қоғамға қайта бейімделуіне жағдай жасау бағытында жүйелі жұмыстар атқаруда. Бүгінгі таңда облыс мекемелерінде жазасын өтеушілердің 70 пайызы еңбекке тартылған. Бұл көрсеткішті 100 пайызға жеткізу мақсатында бірқатар жаңа өндіріс орындары ашылды.

Қызылорда облысы прокуратурасының және ҚАЖ департаментінің қолдауымен, Байқоңыр әлеуметтік кәсіпкерлік корпорациясы акционерлік қоғамы арқылы «Ален» жеке кәсіпкерлігіне Республикалық иновациялық бағдарламасы бойынша қайтарымды несие берілді. Бұл қаржыға брусчатка өндіретін заманауи құрылғы орнатылып, 15 сотталған тұрақты жұмыспен қамтылды.
Сонымен қоса «Смартблок» жауапкершілігі шектеулі серіктестігі– полистирол блок өндіретін және «BAI-M TREND GROUP» жауапкершілігі шектеулі серіктестігі – пескаблок шығару бойынша екі цех ашылып, 16 сотталғанды жұмыспен қамтыды.
Бүгінгі таңда №60 мекеменің өндірістік аймағында 15 жеке кәсіпкер сотталғандарды жұмыспен қамтып және босап шыққаннан кейін тұрақты жұмыс табуға мүмкіндік беріп отыр.