Жетісу облысының прокуратурасы студенттер мен сотталғандар арасында телемост ұйымдастырды

Жастар арасындағы қылмыстың алдын алу үшін  Жетісу облысының прокуратурасы телемост ұйымдастырып, оған 300-ден астам студент және қылмыстық-атқару жүйесі мекемелерінде жазасын өтеп жатқан азаматтар қатысты.

Прокуратура өкілдері бүгінгі таңда қылмыстардың интернеттегі «жеңіл табыс» ретінде жиі бүркемеленетінін, ол  «жасырғыш» немесе «дроппер» ретіндегі жұмыс зиянсыз қосымша табыс сияқты көрінгенімен, іс жүзінде бас бостандығынан айыруға әкелетінін атап өтті.

Кездесу барысында сотталғандар заңсыз әрекеттердің салдары және ойланбай қабылданған шешімдердің адам тағдырына тигізетін әсері туралы ашық әңгіме өрбітті.

Сонымен қатар, кездесу барысында пробация есебіндегі азаматтар сөз сөйлеп, өз өмірлік тәжірибелерімен бөлісіп, айтылған ойларды нақты оқиғалар арқылы толықтырды.

Бастаманы қолдап, әлем чемпиондары Азамат Мұқанов пен Мерей Суюнов сөз сөйлеп, тәртіп пен адал еңбектің маңызын атап өтті. Кездесу соңында «жоқ» деп айта білу – қылмыстық схемаларға тартылудан қорғанудың басты жолы екені еске салынды.

Кездесу қорытындысы оның жоғары тиімділігін көрсетті. Қатысушылар заң бұзудың салдарымен бетпе-бет келген адамдармен тікелей сөйлесу форматы - ең әсерлі тәсіл екенін мойындады. Көптеген студенттер талқылау барысында өздерін толғандырған сұрақтарға жауап алып, интернеттегі қылмыстық топтардың айла-тәсілдерін енді айқынырақ түсінетіндерін жеткізді.

Прокуратура мұндай іс-шараларды жүйелі түрде жалғастыруды жоспарлап отыр. Олар тірі диалогты жастар арасындағы құқық бұзушылықтың алдын алудың ең тиімді тәсілі деп санайды.