Жамбыл облысының прокуроры Қордай ауданындағы су құбыры құрылысы барысымен танысты

Қордай ауданында заңсыз активтерді қайтару бойынша жұмыс шеңберінде мемлекетке қайтарылған қаражат есебінен сатылатын су құбырының құрылысы жалғасуда.

Жобаның іске асырылу барысымен танысу мақсатында Жамбыл облысының прокуроры Жандос Әбдібаев құрылыс алаңына барып, жұмыстардың орындалу қарқынын тексеріп, жауапты лауазымды тұлғаларды тыңдады.

Бүгінгі таңда нысанның құрылыс дайындығы 65% құрайды. Жоба аясында ішкі су құбыры желілерін төсеу аяқталды, әрқайсысының сыйымдылығы 500 текше метр болатын екі таза су резервуары салынды. Су жинау аумағы толығымен қоршалған, объектінің сақталуын қамтамасыз ету үшін тәулік бойы күзет бекеті ұйымдастырылған.

Жобаны іске асыруға көзделген 2,4 млрд теңгенің 75%-ы игерілді. Құрылыс-монтаждау жұмыстары бекітілген кестеге сәйкес орындалуда.

Нысанның құрылысын аяқтау және пайдалануға беру ағымдағы жылдың соңына дейін жоспарланған.

Жобаны іске асыру Қордай ауданының тұрғындарын сапалы және үздіксіз ауыз сумен қамтамасыз етуге мүмкіндік береді.

Жалпы Жамбыл облысы бойынша 15 ауыз су нысанының құрылысы аяқталып, Тараз қаласы мен жеті ауданның 28 мың тұрғыны сапалы ауыз сумен қамтамасыз етілді.

 

 

                                                                                                                    Жамбыл облысының прокуратурасы