Жамбыл облысында прокурорлар кәмелетке толмағандарды медициналық тексеруден өткізу кезінде заң бұзушылықтар анықтады

Талас ауданының прокуратурасы міндетті әлеуметтік медициналық сақтандыру саласындағы заңдылықтың жай-күйіне талдау жүргізіп, нәтижесінде бірқатар білім беру ұйымдарында балаларға профилактикалық медициналық тексерулерді ұйымдастыру жұмыстары тиісті деңгейде атқарылмағаны анықталды.

Атап айтқанда, ағымдағы жылы ауданның 10 білім беру ұйымында 730 кәмелетке толмаған бала арнайы медициналық тексеруден өтпеген, бұл олардың кепілдендірілген медициналық көмекке құқығын шектеу болып табылады.

Прокуратураның қадағалау актісі негізінде мемлекетке аудан мектептеріндегі оқушылардың медициналық тексерулеріне бөлінген 20 млн теңге қайтарылды.

Қазіргі таңда барлық балалар толық медициналық тексеруден өтті, ал кінәлі тұлғалар тәртіптік жауапкершілікке тартылды.

Прокуратура балалардың құқықтарын қорғау бойынша жұмысын жалғастырады.

 

 

Жамбыл облысының прокуратурасы