Әлеуметтік желілерде жеке тұлғаларды облыс аумағында заңсыз митингілер мен шерулерге қатысуға шақыратын үндеулер жиілеп кетті.
Қоғамдық қауіпсіздікті қамтамасыз ету, құқық бұзушылықтардың алдын алу және азаматтардың құқықтарын қорғау мақсатында 2020 жылдың 6 маусымынан бастап Қазақстанда «Қазақстан Республикасында бейбіт жиналыстарды ұйымдастыру және өткізу тәртібі туралы» Заң (бұдан әрі - Заң) қолданысқа енгізілді, онда жиналыстарды, митингілер мен пикеттерді ұйымдастыру және өткізу үшін хабарлама жасау тәртібі қарастырылған, яғни оларды өткізу күніне дейін ұйымдастырушы 5 жұмыс күні бұрын әкімдікке қағаз жеткізгіште немесе электрондық цифрлық қолтаңба арқылы куәландырылған электрондық құжат форматында хабарлама беруі тиіс, ол хабарлама 3 жұмыс күні ішінде қаралатынын түсіндіреміз (Заңның 10, 11-баптары).
Бұл ретте бейбіт жиналыстар тек арнайы рұқсат етілген орындарда өткізілуі тиіс (Заңның 9-бабы). Бұл үшін жергілікті өкілетті органдар (мәслихаттар) осындай орындарды, пайдалану тәртібін, шекті толтырылу нормаларын және оларды материалдық-техникалық, ұйымдастырушылық қамтамасыз ету жөніндегі талаптарды, сондай-ақ пикеттерге кіруге жол берілмейтін іргелес аумақтардың шекараларын айқындады (Заңның 8-бабы).
Сондай-ақ, «Covid-19» індетіне қарсы іс-қимыл мақсатында елде карантин қолданылуда.
Шығыс Қазақстан облысының бас мемлекеттік санитарлық дәрігерінің 2021 жылғы 04 маусымдағы №6-2 қаулысымен карантин кезеңінде жабық үй-жайларда да, ашық жерлерде де адамдар көп жиналатын орындарда іс-шараларды, оның ішінде бейбіт жиналыстарды өткізуге тыйым салынды.
Шығыс Қазақстан облысының прокуратурасы азаматтарды қолданыстағы заңнама нормаларын мүлтіксіз сақтауға, арандатушылыққа бой алдырмауға және заңсыз акцияларға қатысудан бас тартуға шақырады.
ШҚО прокуратурасы