СҚО прокуратурасы инвесторға қой фермасын кеңейтуге көмектесті

ҚР БП Инвесторлардың құқықтарын қорғау Комитетінің үйлестіруімен Солтүстік Қазақстан облысының прокуратурасы қой фермасын 1000 басқа дейін кеңейту жобасын іске асыратын кәсіпкердің құқығын қалпына келтірді.

Жобаны жүзеге асыру 8 айға тоқтатылды. Мемлекеттік орган шаруашылықтың елді мекенге жақындығына және санитарлық-қорғау аймағының бұзылуына сілтеме жасай отырып, ветеринариялық-санитариялық қорытынды беруден және есептік нөмір беруден бас тартқан.

Прокуратура шектеулердің негізсіз екенін анықтады, өйткені аталған ауыл қоныстану белгілерін жоғалтқан. Оның аумағында тек бес адам тұрады, ал тұрғын үйлер мен әлеуметтік нысандар мүлдем жоқ.

Прокуратураның араласуынан кейін ветеринарлық бақылау және қадағалау Комитетінің аумақтық инспекциясы барлық рұқсат құжаттарын берді.

Қазіргі уақытта инвестор ветеринарлық-санитарлық қорытынды мен есеп нөмірін алды. Бұл шаруашылыққа жұмысты қайта бастауға және жобаны одан әрі дамыту үшін қажетті субсидияларды қоса алғанда, мемлекеттік қолдауға өтініш беруге мүмкіндік берді.

                                 Солтүстік Қазақстан облысының прокуратурасы.