«Шымкент қаласының аумағында аса ірі мөлшерде есірткі саудасымен айналысқан тұлғалар құрықталды»

Мемлекет басшысы Қ.К.Тоқаевтың Қазақстан халқына Жолдауында синтетикалық есірткі тұтынатындардың көбеюі ұлт саулығына зор қауіп төндіріп отырғаны баса назарға алынған болатын.

 Қазіргі ахуал өте күрделі, соңғы үш жылда тәркіленген «синтетиканың» көлемі  10 есе артқанын, уақыт өткен сайын мұндай есірткі арзан әрі қолжетімді бола бастағанын, нашақорлар оны әлеуметтік желі мен түрлі мессенджер арқылы емін-еркін сатып алып  жатқанын, бұл – аса қауіпті әрі ауқымды әлеуметтік кесел екенін атап көрсетті.

Синтетикалық есірткіні өндіруге және таратуға қарсы күрес жалпыұлттық деңгейде жүргізілуге тиіс екенін, сондықтан, нашақорлықпен және есірткі саудасымен күресудің кешенді жоспарын әзірлеуді тапсырған болатын. 

ҚР ҰҚК Шымкент қаласы бойынша департаменті 29.11.2022ж. ҚК-тің 297-бабы 3-бөлігінің 3) тармағымен аса ірі мөлшердегі есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу фактісі бойынша сотқа дейінгі тергеп-тексеруді бастаған.

20.12.2022ж. Шымкент қаласының аумағында 2 кг. 910 гр. мефедрон – психотроптық затын заңсыз сақтау мен тасымалдау барысында «Н.С.А.» есімді тұлға ұсталды.

Шымкент қала прокуратурасы «Н.С.А.» есімді тұлғамен ынтымақтастық туралы процестік келісім жасап, нәтижесінде оның екі сыбайласы мен 3 облыс (Түркістан, Жамбыл және Алматы) аумағынан жалпы массасы 103 кг. синтетикалық есірткі заттары тәркіленіп, заңсыз айналымнан алынды.

Заңсыз айналымнан алынған синтетикалық есірткі заттарының «қара» нарықтағы бағасы 2,0 млрд. теңгеден асады және бөлшектеп сату үшін 206 000 дозаны құрауы мүмкін.

Қазіргі таңда, қылмысқа қатысы бар екі тұлғаға қатысты ҚК-тің 297-бабының 3-бөлігінің 1,3,5) тармақтарымен айып тағылып, қылмыстық іс сотқа жолданды, қарау сатысында.

ҚК-тің 297-бабы 3-бөлігінің 1,3,5) тармақтарымен қарастырылған қылмыс жасағаны үшін 10 жылдан 15 жылға дейiнгi мерзiмге бас бостандығынан айыруға және мүлкін тәркілеуге жазаланады.

Қала тұрғындары мен қонақтарынан әлеуметтік желілерде (телеграмм, WhatsUp және т.б.) есірткіні жарнамалау, сату немесе басқа да заңсыз іс-әрекеттерге итермелеу деректері белгілі болған жағдайда полиция немесе прокуратура органдарына тез арада хабарлауды сұраймыз.

 

Шымкент қаласының прокуратурасы