Алаяқтардың қызметін қамтамасыз еткен тұлғаны қылмыстық жауапкершілікке тарту туралы

Павлодар облысы Ақтоғай ауданының прокуратурасы Мүткенов ауылының тұрғынына қатысты алаяқтық фактісі бойынша қозғалған қылмыстық іс бойынша мемлекеттік айыптауды қолдауды қамтамасыз етті.

Тергеу барысында анықталғандай, күдікті жалған «таксопарк» атын жамылып, күн сайын 13-ке дейін SIM-картаны іске қосып, пайдаланып отырған. Осы арқылы ол алаяқтық қоңыраулар жасауға техникалық мүмкіндік туғызған.

Аталған SIM-карталарды пайдалана отырып, ұйымдасқан алаяқтар топтары еліміздің тұрғындарымен байланысып, алдау жолымен жәбірленушілердің атына онлайн-кредиттер ресімдеген.

Оның әрекеті Қылмыстық кодекстің 213-бабы 2-бөлігі бойынша, яғни байланыс абоненттік құрылғысының сәйкестендіру кодын заңсыз өзгерту ретінде сараланған.

Қылмыстың сипатын, сотталушының жеке басын және жеңілдететін мән-жайларды ескере отырып, сот оған пробациялық бақылау белгілеумен 1 жыл мерзімге бас бостандығын шектеу жазасын тағайындады.

Прокуратура азаматтарға сақтық шараларын сақтауды, жеке деректерін ешкімге бермеуді және белгісіз абоненттердің нұсқауларын орындамауды ескертеді.

Павлодар облысы прокуратурасының сайтына сілтеме: