Маңғыстау облысының прокурорлары бір жұмыс күнін оқушылар мен студенттерге арнады

Бүгін, ағымдағы жылдың 18 қазанында прокурорлар «Прокурорлық сағат» ауқымды іс-шарасын өткізді, оның шеңберінде бір мезгілде облыс орталығының 60-тан астам мектебіне барды.

Бұл акция - өткен жылдан бері іске асырылып келе жатқан «Прокурор тәрбиесі» жобасының бір бөлігі.

​Кездесулер барысында прокурорлар оқушыларға бұзақылық, төбелес, вандализм және басқа да құқық бұзушылықтар үшін қылмыстық және әкімшілік жауапкершілік туралы түсіндірді.

Оларды әлеуметтік желілерде бейтаныс адамдармен қарым-қатынас кезінде сақ болуға, үлкендерді құрметтеуге, ата-аналары мен мұғалімдерін тыңдауға және төмен сынып оқушыларын ренжітпеуге шақырды.

​Іс-шараға облыстық және Ақтау қаласы прокуратурасының қызметкерлері қатысты.

​Акцияны облыс прокуроры Айдос Майлыбаев басқарды, ол осы күні Ш.Есенов атындағы университеттің студенттерімен кездесті.

​«Біздің қызметкерлер құқық бұзушылықтың алдын алу мақсатында үнемі мектептер мен басқа да оқу орындарына барады, ата-аналар жиналыстарына қатысады. Бірақ, бүгінгі акция бірегей, біз бір күнде облыстың орталығының барлық мектептерін қамтыдық», - деп атап өтті облыс прокуроры.

 

Маңғыстау облысының прокуратурасы