Маңғыстау облысының прокуратурасында жазаларды орындау және сотталғандарға әлеуметтік қолдау көрсету мәселелері талқыланды

«Заң мен Тәртіп» қағидатын іске асыру шеңберінде облыс прокуроры Серікқали Күшәлиевтің төрағалығымен жазаны орындау және сотталғандарды қайта әлеуметтендіру мәселелері бойынша ведомствоаралық жиналыс өткізілді.

Іс-шараға құқық қорғау және жергілікті атқарушы органдардың басшылары қатысты.

Жиналыста түзеу мекемелері мен пробация қызметінің жұмысы, сондай-ақ сотталғандарға әлеуметтік қолдау көрсету мәселелері талқыланды.

Айта кету керек, биыл облыс прокуратурасының бастамасымен Қылмыстық-атқару жүйесінің материалдық-техникалық базасын жақсарту үшін жергілікті бюджеттен 411 млн теңге бөлінді.

Аталған қаражатқа 8 жеңіл автомобиль, «Лорнет» рентгендік сканер аппараты, 100 бейнетіркегіш және 100 бейнекамера, мультимедиялық терминал, компьютерлер және т.б. сатып алынды.

«Телемедицинаны» енгізу және дәрігерлердің түнгі кезекшілігін ұйымдастыру арқылы қамаудағылардың шағымдары 30%-ға төмендеді.

Сотталғандарды әлеуметтендіруге 11 млн теңге бөлінді, сондай-ақ 93 сотталғанға жалпы сомасы 12 млн теңге біржолғы материалдық көмек көрсетілді.

Кеңес қорытындысымен сотталғандарды әлеуметтік қолдау және жұмыспен қамтамасыз ету жөнінде нақты тапсырмалар берілді.

Сондай-ақ түзеу мекемелерде тәртіпті сақтау туралы міндеті қойылды.

 

Маңғыстау облысының прокуратурасы