Прокурорлық сүзгі: Қазақстанда инвесторларды қорғауды қамтамасыз ету

Мемлекет басшысының тапсырмасымен заңнаманың сақталуын қамтамасыз етуге және инвестициялар саласындағы заңсыз әрекеттердің алдын алуға бағытталған «инвесторларды қорғау жөніндегі прокурорлық сүзгі» жобасы іске асырылуда.

Осы бағытта Қызылорда облысының прокуратурасы Табиғи монополияларды реттеу департаментінің «ШалқияЦинк ЛТД» АҚ инвесторына қатысты әкімшілік құқық бұзушылық туралы істерді заңсыз қозғау фактісін анықтады.

Департамент Кәсіпкерлік кодекстің 144-2-бабын (бақылау және қадағалау субъектісіне (объектісіне) бару арқылы профилактикалық бақылау) сақтамай, профилактикалық бақылаумен инвесторға әкімшілік іс қозғаған.

Бұл жағдайда Департаменттің әрекеті заңға қайшы, себебі әкімшілік іс жүргізу тек тексеру қорытындысы негізінде басталуы қажет.

Прокуратурамен қабылданған жедел шаралардың нәтижесінде заңсыз істер тоқтатылып, кінәлі қызметкер тәртіптік жауапкершілікке тартылды.

Инвестор жалпы сомасы 112 миллион теңге құрайтын айыппұл төлеуден босатылды.

Бұл бағыттағы жұмыстар жалғасуда және қатаң бақылауда.