Махамбет ауданында хоккей турнирі өтті

Махамбет ауданының прокуратурасының ұйымдастыруымен Исатай және Махамбет аудандарының командалары арасында хоккей турнирі, сондай-ақ оқушылар арасында понд-хоккейден жарыс өтті.

Іс-шара құқықбұзушылықты алдын алу, бұқаралық спортты дамыту және салауатты өмір салтын насихаттау бағытындағы жұмыстар шеңберінде өткізілді.

Турнирдің негізгі мақсаты – жастар мен аудан тұрғындарын спортпен шұғылдануға тарту, құқықбұзушылыққа, нашақорлыққа және басқа да зиянды әдеттерге теріс көзқарас қалыптастыру.

Турнирге әуесқой хоккейден 4 команда, жалпы білім беретін мектептердің 15 оқушысы, сондай-ақ жанкүйерлер қатысты.

Жарыстар спорттық әрі достық атмосферада өтіп, жастардың белсенді демалыс пен командалық спорт түрлеріне жоғары қызығушылық танытатынын көрсетті.

Ұйымдастырушылар мұндай іс-шаралар өскелең ұрпақтың бойында тәртіптілік, жауапкершілік және құқықтық сананы қалыптастыруға ықпал ететінін атап өтті.

Махамбет ауданының прокуратурасы алдағы уақытта да спортты дамытуға және халық арасында құқықбұзушылықты алдын алуға бағытталған бастамаларды қолдауды жоспарлауда.

 

 

               Атырау облысы Махамбет ауданының прокуратурасы