Прокурорлар мектепті жөндеуге арналған қаражаттың ұрланғанын анықтады

Облыс прокуратурасы мемлекеттік бағдарламалар шеңберінде пайдаланылатын бюджет қаражатының тиімді жұмсалуына талдау жүргізді.

Талдау көрсеткендей, 2017 жылы Ғ.Мүсірепов атындағы №5 орта мектепте күрделі жөндеу жүргізілген.

279 млн. теңге көлемінде бөлінген қаражатқа қарамастан, ағымдағы жылдың наурыз айында ауа-райының салдарынан мектеп ғимаратының қаптауы бұзылған.

Тәуелсіз сарапшының қорытындысына сәйкес, сәулет-құрылыс нормаларын сақтамау, сондай-ақ жұмыстарды орындамау салдарынан мемлекетке жалпы сомасы 25 млн.теңгеге залал келтірілген.

Жиналған материалдарды қалалық прокуратура сыбайлас жемқорлыққа қарсы қызметке жіберді, бюджет қаражатын жымқыру фактісі бойынша сотқа дейінгі тергеп-тексеру басталды (ҚР ҚК 189-б.3-б.).