Жолданымдарды қабылдау тәртібі (қабылдау, тіркеу, қайтару және кері кайтарып алу)

      Азаматтардың жолданымдары – бұл заңдылық жағдайының ең объективті көрсеткіші.

      Қазақстан Республикасының Конституциясына сәйкес мемлекетіміздің азаматтары тікелей және өз өкілдері арқылы мемлекет ісін басқаруға қатысуға, мемлекеттік органдар мен жергілікті өзін-өзі басқару органдарына тікелей өзі жүгінуге, сондай-ақ жеке және ұжымдық өтініштер жолдауға құқығы бар.

      2021 жылғы 1 шілдеден бастап Қазақстан Республикасының Әкімшілік рәсімдік-процестік кодексі қолданысқа енгізілді (бұдан әрі-Кодекс), бұл белгілі бір тұлға мен мемлекеттік органның арасында туындаған жария-құқықтық қатынастарға бағытталған осы мемлекеттің заңымен көрсетілген функциясы.

      Жолданымдарды мемлекеттік органға және жергілікті өзін-өзі басқару органына тапсырған кезде Кодекстің кейбір заңнама нормаларына назар аударған жөн.

      Мысалға, қабылдау, тіркеу, қайтару және өтінішті кері кайтарып алу осы Кодекстің талаптарымен реттеледі.

      (2020 жылғы 29 маусымдағы №350-V Кодекстің 64 -бабы).

1. Кодексте белгіленген тәртіппен берілген жолданым міндетті түрде қабылдануға, тіркелуге, есепке алынуға және қаралуға жатады.

         Жолданымды қабылдаудан бас тартуға тыйым салынады.

2. Жолданым мемлекеттік органға, жергілікті өзін-өзі басқару органына, мемлекет жүз пайыз қатысатын заңды тұлғаға берілген жағдайда арыз иесіне күні мен уақыты, жолданымды қабылдаған адамның тегі мен аты-жөні, лауазымы көрсетілген бірегей нөмірі бар талон беріледі.
3. Жолданым келіп түскен күні тіркеледі.

         Егер жолданым жұмыс істемейтін күні келіп түскен болса, онда ол жақын уақыттағы кейінгі жұмыс күнімен тіркеледі.

4. Жалпыға қолжетімді ақпараттық жүйелер бойынша келіп түскен және Қазақстан Республикасының электрондық құжат және электрондық цифрлық қолтаңба туралы заңнамасының талаптарына сәйкес келетін жолданымдар осы Кодексте белгіленген тәртіппен қаралуға жатады.

       Ескертпе: 5-бөліктің қолданысы 01.01.2026 дейін тоқтатыла тұрады, тоқтатыла тұрған кезеңінде осы Кодекстің 175-бабының 2-1-бөлігінде берілген редакция қолданыста болады.

5. Әкімшілік рәсімге қатысушылардың мемлекеттік органдардың басшыларына және олардың орынбасарларына бейнеконференц-байланыс немесе бейнежолданым арқылы жолданым беру тәртібін ақпараттандыру саласындағы уәкілетті орган айқындайды.
6. Жолданым осы Кодекстің 63-бабындабелгіленген талаптарға сәйкес келмеген жағдайда, әкімшілік орган, лауазымды адам арыз иесіне жүгіну қандай талаптарға сай келмейтінін көрсетеді және оны талаптарға сәйкес келтіру үшін ақылға қонымды мерзімді белгілейді.
7. Егер арыз иесі жолданымды әкімшілік орган, лауазымды адам белгілеген мерзімде Қазақстан Республикасы заңнамасының талаптарына сәйкес келтірмесе, әкімшілік орган, лауазымды адам оны қайтарады.
8. Жолданымды қайтару қайта жүгінуге кедергі келтірмейді.
9. Арыз иесі әкімшілік іс бойынша шешім қабылданғанға дейін жолданымды өзінің жазбаша арызы негізінде кері қайтарып ала алады.

     Арыз иесінің жолданымды кері қайтарып алуы мерзімдер сақталған кезде, егер Қазақстан Республикасының заңдарында өзгеше көзделмесе, оны қайта жолданым беру құқығынан айырмайды.

      Осыған байланысты, жолданымдарды Астана қаласы прокуратура органдарына тапсыру кезінде жазбаша, қағаз түрінде (қолма-қол прокуратура кеңсесі немесе «Жолданымдарға арналған жәшік» арқылы Астана қаласы, Қабанбай батыр даңғылы, 31), «Қазпошта» АҚ пошта байланысы арқылы немесе электрондық түрде, «Электрондық үкіметі» Порталы («EGOV») және «Е-оtіnіsh» ақпараттық жүйесі арқылы беруге болады.

 

                                                                   Астана қаласының прокуратурасы