Ақтөбе облысының табиғат қорғау прокуратурасы Ақтөбе қаласында атмосфералық ауаның ластануына мониторинг жүргізу жөніндегі шаралардың жеткіліксіздігін анықтады.
Бүгінгі күні облыс орталығындағы ауа жағдайын Қазгидромет қызметі 6 бақылау және қоспаларды анықтау бекеттерінің көрсеткіштері бойынша бағалап отыр.
Бас жоспарға сәйкес Ақтөбе қаласы Орал-Қобда және Орск-Хромтау бағытында салынуда.
Бұл ретте, көрсетілген аудандарда атмосфераның жай-күйін бақылайтын бірде-бір бекет жоқ.
Қолданыстағы заңнаманың талабы бойынша атмосфераның жай-күйін бақылау пункттерінің саны халық санымен, жер бедерімен және ластанудың нақты деңгейімен айқындалады.
Прокуратура шараларымен Ақтөбе қаласы үшін қосымша тағы 2 автоматты мониторинг станциясы сатып алынуда.
Бұл қоршаған ортаның неғұрлым сапалы мониторингін және экологиялық жағдайды жақсарту бойынша нақты шаралар қабылдауды қамтамасыз етеді.