Ақтөбеде туристік қызмет көрсету желеуімен жасалған алаяқтық фактісі бойынша сотқа дейінгі тергеп-тексеру басталды

Тергеу деректеріне сәйкес, күдікті әлеуметтік желілер арқылы шетелге туристік сапарлар ұйымдастыру жөнінде хабарландырулар жариялаған. Азаматтарды туристік қызметтер көрсету мүмкіндігі бар екеніне сендіріп, турларды, әуе билеттерін және қонақүйде тұру орындарын брондау үшін төлем ретінде ақшалай қаражат алған.

Алайда алынған қаражатқа қарамастан, өзіне алған міндеттемелерін орындамаған. Туристік сапарлар ұйымдастырылмай, азаматтардың ақшалай қаражаттары күдіктінің жеке мақсаттарына пайдаланылған.

Заңға қайшы әрекеттердің салдарынан жәбірленушілерге елеулі материалдық залал келтірілген.

Аталған факті бойынша Қазақстан Республикасы Қылмыстық кодексінің 190-бабының 3-бөлігімен (алаяқтық) сотқа дейінгі тергеп-тексеру жүргізілуде.

Ақтөбе қаласының прокуратурасы азаматтарды интернет желісі мен әлеуметтік желілер арқылы туристік қызметтерді сатып алу кезінде сақ болуға шақырады. Ақша қаражатын аудармас бұрын туроператордың немесе туристік агенттіктің сенімділігіне көз жеткізіп, мемлекеттік тіркеуден өткендігін тексеру, пікірлермен танысу, шарт талаптарын мұқият зерделеу, сондай-ақ төлем жасалғанын және хат алмасуды растайтын құжаттарды сақтау қажет.

Егер сіз осындай алаяқтық әрекеттердің құрбаны болсаңыз немесе осыған ұқсас фактілер туралы ақпаратқа ие болсаңыз, дереу құқық қорғау органдарына хабарласуыңызды сұраймыз.

Ақпаратты алдын ала тексеру және қарапайым сақтық шараларын сақтау қаржылық шығындардың алдын алуға және алаяқтық схемалардың құрбаны болмауға көмектеседі.