Ақтөбе облысы прокуратурасының үйлестіру кеңесінде жол қауіпсіздігі мәселелері қаралды
Облыс прокуроры Марат Әбішевтің төрағалығымен өңір аумағында жол қозғалысы қауіпсіздігін қамтамасыз ету және жол-көлік оқиғаларының алдын алу мәселелері бойынша Үйлестіру кеңесінің отырысы өтті.
Жиынды аша отырып, облыс прокуроры атқарылған жұмыстарға қарамастан, өңірдегі жағдайдың әлі де өте күрделі болып отырғанын атап өтті.
Ағымдағы жылдың 10 айында 1 665 жол-көлік оқиғасы тіркеліп, салдарынан 2 535 адам зардап шеккен (2 433-жарақат алған, 102 адам қаза болған).
Баяндамаларға сәйкес, жол-көлік оқиғаларының туындауына негізінен жүргізушілердің көлік тәртібінің төмендігі себеп болып отыр. Атап айтқанда, жылдамдықты арттыру, қарсы жолаққа шығу, мас күйінде көлік жүргізу, жол қозғалысы ережелерін елемеу деректері көп тіркеледі.
Бұл құқық бұзушылықтар үшін биыл 124 адам қылмыстық жауапкершілікке тартылып, 54 адам сотталған. Әкімшілік жауапкершілікке 6,5 мыңға жуық (6496) азамат тартылған, оның ішінде 82 адамның жүргізуші куәлігі айырылған.
Сонымен қатар, апаттылыққа жол инфрақұрылымының нашар жағдайы да (әсіресе тар екі жолақты тас жолдарда) елеулі ықпал етеді.
Облыс прокуроры «Хромтау–Қарабұтақ» бағытындағы жолдың аса күрделі учаскесіне назар аударды, бұл жерде жиі өліммен аяқталатын жол-көлік оқиғалары орын алады.
Әйтеке би ауданының прокуроры ауданда 12 адамның қаза болуына әкеп соққан резонансты ЖКО бойынша қылмыстық істің тергелу барысы туралы баяндады.
Аталған ЖКО-на байланысты өңірлік көліктік прокурорларға тасымалдаушылармен профилактикалық және бақылау жұмыстарын күшейту мақсатында көліктік бақылау инспекциясын бағыттау ұсынылды.
Өз кезегінде, «ҚазАвтоЖол» ҰК АҚ облыстық филиалының басшысы А.Данағұл жолды 1-ші санат стандартына (әр бағытқа екі жолақ) дейін кеңейту жоспары туралы хабарлады.
Полицияға тас жолдарда күшейтілген патрульдік экипаждарды тарту, жасырын патрульдеу мен дрондар арқылы әуе мониторингін кеңінен пайдалану тапсырылды, себебі полицияның жолдарда тұрақты болуы жол қозғалысына қатысушыларды тәртіпке келтіреді.
Үй жануарларының қатысуымен болатын ЖКО жеке қаралды — 22 оқиғада 39 адам зардап шеккен, екеуі қаза болған.
Мәселені шешу үшін Полиция департаменті үй жануарларына жарық шағылыстыратын ленталар тағуды, «Қазавтожол» АҚ тас жолдар бойына қоршаулар орнатуды ұсынды.
Сонымен бірге, облыс прокуроры аудан прокурорларына, әкімдерге, полиция бөлімдерінің бастықтарына айтылған ескертулер мен ұсыныстарды ескере отырып, жол қауіпсіздігі жөніндегі жоспарларды өзектілендіруді тапсырды.
Жоспарлау барысында жол полициясының ұсыныстары, жол-көлік оқиғалары картасында көрсетілген мәліметтер, сондай-ақ өңір тұрғындарының жол қауіпсіздігі мәселелері бойынша шағымдары мен пікірлері ескерілуі тиіс.
Отырыс қорытындысында Үйлестіру кеңесінің қатысушылары облыс әкімдігі жанындағы ВАЖТ алаңында өзара іс-қимылды және ақпарат алмасуды нығайту қажеттігі туралы ортақ пікірге келді. Бұл жоспарланған іс-шаралар мен қабылданған бастамалардың орындалуына бақылауды күшейтуге мүмкіндік береді.
Өз кезегінде прокуратура органдары әкімшілік практикадан бастап жолдарды салу және жөндеу сапасын бақылауға дейінгі жол қауіпсіздігі саласындағы қадағалау жұмысын жалғастырады.
Прокурорлармен жинақтаған тәжірибе ВАЖТ жұмысында пайдаланылатын болады.