Бурабай ауданының прокуратурасы интернет-алаяқтық жағдайлары туралы ескертеді
Соңғы уақытта аудан аумағында интернет-алаяқтық фактілері жиілеп кетті. Алаяқтар азаматтарды алдаудың түрлі тәсілдерін қолдануда: өздерін банк қызметкерлері, құқық қорғау органдарының қызметкерлері немесе басқа ұйымдардың өкілдері ретінде таныстырып, «күдікті операциялар», «ұтыс», «несие рәсімдеу» туралы хабарлап, тексеру сылтауымен SMS-хабарламалар арқылы келген кодтарды, банк карталарының деректерін айтуын немесе ақша қаражатын аударуды сұрайды.
Аудан прокуратурасы азаматтарды қырағылық танытуға шақырады.
Есте сақтаңыз:
- банктер ешқашан телефон арқылы немесе мессенджерлерде SMS-хабарламалардағы кодтарды, CVV-кодты, құпиясөздерді және басқа да құпия деректерді сұрамайды;
- полиция мен прокуратура қызметкерлері ақша қаражатын «қауіпсіз шоттарға» аударуды талап етпейді және банктік деректемелерді сұрамайды;
- бөгде адамдарға жеке деректерді, банк карталарының нөмірлерін, растау кодтары мен құпиясөздерді беруге болмайды.
Алаяқтардың құрбаны болмау үшін ұсынылады:
- күмәнді сілтемелерге өтпеу;
- ешкімге растау кодтарын және банк карталарының деректерін хабарламау;
- күмәнді қоңыраулар түскен жағдайда әңгімені тоқтатып, банкке немесе құқық қорғау органдарына өзіңіз хабарласу.
Егер сіз осындай фактілерге тап болсаңыз немесе алаяқтардың құрбаны болсаңыз, дереу құқық қорғау органдарына жүгініңіз.
Ақша қаражаттарыңызды сақтап, әрдайым сақ болыңыз!
Ақмола облысының прокуратурасы