Абай облысында прокуратура бизнес субъектілеріне қатысты 60 заңсыз тексеруді тоқтатты

 

       Семей қаласының прокуратурасы Полиция басқармасының әкімшілік тәжірибесіне жүргізілген талдау барысында ӘҚБтК-нің 132-бабы (кәмелетке толмағандардың түнгi уақытта ойын-сауық мекемелерiнде болуына жол беру) бойынша бизнес субъектілерін әкімшілік жауапкершілікке тарту кезінде заңбұзушылықтарды анықтады.

       Анықталғандай, заңнамаға енгізілген өзгерістерге сәйкес кәмелетке толмағандардың ойын-сауық орындарында болу фактілерін тексеру міндетті түрде құқықтық статистика органдарында тіркелуге тиіс.

       Полиция қызметкерлері тексерулерді тиісті тіркеусіз жүргізіп, олардың қорытындысы бойынша 60 әкімшілік хаттама жасаған, бұл оларды тоқтатуға негіз болып табылады.

       Қала прокуратурасының қабылдаған шаралары нәтижесінде заңсыз әкімшілік істер қайта қаралып, тоқтатылды, кәсіпкерлердің құқықтары қалпына келтірілді, сондай-ақ заңбұзушылықтарға жол берген 11 қызметкер тәртіптік жауапкершілікке тартылды.

       Абай облысының прокуратурасы

#Әділдік

#ЗаңҮстемдігі