Жыл соңына дейін өңірдегі жедел жәрдем станциясының автопаркі толық жаңартылады. Барлығы 109 жаңа реанимобиль беріледі, оның 31-і қолданыста.
Көліктердің жаппай жаңартылуы станция тарихында алғаш рет болып отыр. Павлодар облысының әкімі Әбілқайыр Сқақовтың айтуынша, бұл өңірдегі шұғыл медициналық қызмет сапасын көтеруге қатысты шаралардың бірі ғана.
- Қысылтаяң сәтте науқастың жанын аман сақтап қалу үшін барлық жағдайды жасаймыз. Бұл тек коронавирусқа қатысты емес. КВИ-мен күресеміз деп жүріп, біз басқа науқастар туралы да ұмытпауымыз керек, - деді Әбілқайыр Сқақов 26 қарашада ОКҚ-да өткен баспасөз мәслихатында.
Айта кетейік, өңірде осы жылы бірнеше жаңа медициналық нысандардың құрылысы қолға алынды. Ең ірісі – 200 орындық модульді инфекциялық госпиталь. Сонымен бірге облыстық аурухана жанына инфекциялық бөлім, ал бірінші қалалық ауруханаға қабылдау бөлімі салынып жатыр.
Павлодар облысы әкімінің баспасөз қызметі
Суретті түсірген Валерий Бугаев