Павлодар қалалық №1 ауруханасы ауқымды реконструкциядан кейін заманауи медициналық инфрақұрылымға ие болды

Павлодар облысының әкімі Асайын Байханов күрделі реконструкция жұмыстары аяқталған Павлодар қалалық №1 ауруханасына барып, медициналық кешеннің жаңартылу барысымен танысты.

Аурухананың тарихы 70 жылды қамтиды - медициналық мекеме 1956 жылы жұмысын бастаған. Бұл ретте негізгі корпустар ондаған жылдар бойы кешенді жаңғыртудан өтпеген. Реконструкция жұмыстары 2022 жылы басталып, өңірдегі денсаулық сақтау саласындағы ең ірі жобалардың біріне айналды.

- Біз үшін ғимаратты жай ғана жөндеу емес, мұнда бүгінгі күннің талаптарына сай келетін заманауи аурухана құру маңызды болды. Тұрғындар сапалы медициналық көмекті жайлы әрі қауіпсіз жағдайда алуы керек, ал дәрігерлер заманауи құрал-жабдықтар мен технологияларды пайдаланып жұмыс істеуі қажет. Бүгінде біз осы ауқымды жұмыстың нәтижесін көріп отырмыз, - деді Асайын Байханов.

Аурухана кешенінің жалпы аумағы 21 мың шаршы метрді құрайды, оның ішінде 13 мың шаршы метр аумаққа реконструкция жүргізілді. 2020 жылы әзірленген жоба жергілікті және республикалық бюджет қаражаты есебінен іске асырылды. Жұмыстардың жалпы құны 12,3 млрд теңгені құрады, оның 8,8 млрд теңгесі медициналық жабдықтарды сатып алуға бағытталды.

Реконструкция аясында негізгі емдеу корпустарының қасбеттері, терезе блоктары мен инженерлік желілері толық жаңартылды. Электрмен, жылумен және сумен жабдықтау, кәріз жүйелері, медициналық газдар, өрт дабылы, телефон байланысы және жергілікті желі жүйелері 100% ауыстырылды.

Ауруханада жататын ем алушылардың да жағдайлары айтарлықтай жақсарды. Палаталар жеке санитарлық тораптармен және жуыну кабиналарымен жабдықталды. Инфекциялық қауіпсіздікті қамтамасыз ету мақсатында әр қабатқа жеке желдету жүйесі орнатылды. Әрлеу жұмыстары кезінде медициналық мекемелерге қойылатын талаптарға сәйкес келетін заманауи материалдар пайдаланылды.

Технологиялық жабдықтарға ерекше назар аударылды. Аурухана 1319 бірлік жаңа медициналық жабдыққа ие болды. Олардың қатарында рентген қондырғысы, сараптамалық деңгейдегі ультрадыбыстық зерттеу аппараттары және оңалтуға арналған жабдықтар бар. Ең маңызды жабдықтардың қатарында 7-ші буындағы ангиограф және КЧП қондырғысы бар.

Операциялық блокта нейрохирургия бөлімінің меңгерушісі Рустам Сыздықов гибридті операциялық бөлменің мүмкіндіктерін көрсетті. Жоғары технологиялық жабдық хирургиялық араласуды ота жасау барысында заманауи визуализация әдістерімен қатар жүргізуге мүмкіндік береді. Бұл әсіресе күрделі нейрохирургиялық және қан тамырларына жасалатын операциялар кезінде маңызды.

Аурухана директоры Нұрлан Жұмажанов облыс әкіміне «Б» және «В» блоктарындағы реконструкция жұмыстарының нәтижелерін таныстырды. Сондай-ақ Асайын Байханов жоспарлы хирургия және неврология бөлімдерін аралап көрді. Жаңартудан кейін бөлімшелер қажетті корпус жиһазымен, жұмсақ жиһазбен, техникамен және медициналық жабдықтармен толық қамтамасыз етілді.

Осылайша, Павлодар қалалық №1 ауруханасы жаңа инженерлік инфрақұрылымы, жоғары технологиялық жабдықтары және ем алушылар мен медицина қызметкерлері үшін жақсартылған жағдайлары бар заманауи медициналық кешенге айналды.

Ауқымды реконструкция медициналық мекеменің мүмкіндіктерін ұлғайтып, Павлодар қаласы мен өңір тұрғындарына көрсетілетін медициналық көмектің сапасын арттыруға мүмкіндік береді.

Павлодар облысы әкімінің баспасөз қызметі
Суреттерді түсірген Валерий Бугаев