Өңір басшысы Асайын Байханов облыстық қоғамдық кеңес пен мәслихат алдында есеп берді
Бүгін Достық үйінде Павлодар облысының әкімі Асайын Байхановтың, депутаттардың, мемлекеттік орган басшыларының қатысуымен облыстық қоғамдық кеңестің кеңейтілген отырысы өтті.
Күн тәртібіндегі басты мәселе - облыс басшысының «Павлодар облысының 2025 жылғы әлеуметтік-экономикалық даму қорытындылары және 2026 жылға арналған міндеттер туралы» есебі болды.
Асайын Байханов өз сөзінде Президент Қасым-Жомарт Кемелұлы Тоқаевтың бастамасымен жұмысшы мамандықтар жылы деп жарияланған 2025 жыл техникалық және кәсіптік білім беру жүйесін дамытудағы маңызды кезең болғанын атап өтті.
Өңірдегі бес колледжді заманауи жабдықтармен қамтамасыз етуге 500 млн теңгеден астам қаражат бағытталды. Тегін оқуға 6 250 студент қабылданып, 700-ден астам түлек ірі кәсіпорындарға жұмысқа орналастырылады. Студенттердің өндірістік тәжірибесі үшін төленетін төлемдердің көлемі артты, облыс командасы WorldSkills Kazakhstan чемпионатында 2-орын иеленді. Алғаш рет «Шебер асуы» сыйлығы тағайындалып, ұстаздар үшін жаңа наградалар енгізілді.
Облыстық бюджет қаражаты есебінен музыкалық колледжді күрделі жөндеу, IT колледжінің жатақханасын жаңарту және оның материалдық-техникалық базасын нығайту жоспарланған. Алдағы уақытта «мектеп - колледж - өңірлік университет - жұмыс беруші» қағидаты бойынша бес білім кластері құрылады. Сонымен қатар, жеті өңірлік колледждің базасында он жаңа мамандық бойынша шағын өндірістік алаңдар ашылады.
Өңір экономикасы тұрақты өсім көрсетіп отыр. 2025 жылы облысқа 1,2 трлн теңгеден астам инвестиция тартылды және бұл еліміз бойынша екінші көрсеткіш. Жағымды инвестициялық ахуал ірі индустриалды және аграрлық жобаларды жүзеге асыруға, жаңа жоғары жалақыға ие жұмыс орындарын құруға және қосылған құнның өсуіне мүмкіндік береді.
Өңірлік инвестициялық пулда жалпы сомасы 7,3 трлн теңгеге 107 жоба бар және бұл 16 мыңнан астам жұмыс орнын құруға мүмкіндік береді. Екібастұз қаласында екі ферроқорытпа зауыты іске қосылды. Ағымдағы жылы инвестиция көлемі 208 млрд теңгені құрайтын және 820 жұмыс орнын құратын тағы бір ірі кәсіпорын - «Mineral Product International» зауытын іске қосу жоспарлануда.
Павлодарда трансұлттық компания Қазақстандағы ең ірі «Доре» алтын қорытпасын өндіретін зауыттың құрылысын жүргізуде. Жалпы инвестиция көлемі 1 млрд АҚШ долларын құрайды. Іске қосылғаннан кейін кәсіпорын өңірдің ең ірі салық төлеушісіне айналады.
Өткен аптада Астана қаласында сингапурлық «XINFAGROUP» компаниясының өкілдерімен кездесу өтті. Онымен Павлодар облысында толық циклді өнеркәсіптік парк құру бойынша ауқымды жобаны іске асыру жоспарлануда. Инвестиция көлемі 15 млрд АҚШ долларын құрайды, 10 мыңнан астам жұмыс орнын ашу жоспарлануда. Павлодар, Екібастұз, Ақсу қалаларында және Баянауыл ауданында басқа да ірі жобалар қарастырылуда.
Павлодар облысы аграрлық секторда көшбасшылық орнын сақтап келеді. 1 млн тоннадан астам картоп жиналды, ылғал үнемдейтін суару жүйесі, қарақұмық және күнбағыс өндірісі бойынша жоғары көрсеткіштерге қол жеткізілді.
Инфрақұрылымды дамытуға да ерекше назар аударылуда. 2025 жылы халық саны 200 адамнан асатын барлық қалалар мен ауылдық елді мекендер 100% таза ауыз сумен қамтамасыз етілді. 645 км автожол жөнделді, 24 ауылдың кіреберіс жолдарына асфальт төселді, 100 км астам жылу желілері қайта жаңартылды.
Тамыз айында Павлодар әуежайының ұшу-қону жолағын қайта жөндеу жұмыстары аяқталады. Қоғамдық көлікті жаңарту жалғасуда: биыл жергілікті бюджет есебінен 10 энергия үнемдейтін трамвай сатып алынатын болады. Соңғы екі жылда 272 жаңа автобус сатып алынып, автобустар паркі 90%-ға жаңартылды.
Қалалық ортаны абаттандыруға көп көңіл бөлінуде. Екібастұз қаласындағы «Шахтер» саябағын қайта жаңарту жұмыстары жалғасуда, Ақсуда ERG компаниясының демеушілігімен орталық саябақ салынып жатыр. 20 ауылдық елді мекенде 31 саябақ абаттандырылды.
Баяндаманың жеке бөлімі экология мәселелеріне арналды. Облыста зиянды шығарындыларды автоматты түрде бақылау жүйесі енгізілуде, ол қазір 11 кәсіпорында жұмыс істеп тұр, 2026 жылдың соңына дейін тағы төрт объектіде орнатылады. Павлодарда жылына 150 мың тоннаға дейін қалдықтарды өңдейтін заманауи қоқыс сұрыптау кешені салынуда. Соңғы екі жылда шамамен 40 мың түп ағаш пен көшеттер отырғызылды.
Әлеуметтік сала да басты бағыттардың бірі болып қалады. 1 800 орындық екі мектеп пайдалануға берілді, инвесторлардың көмегімен үш ауыл мектебі салынды, биыл тағы екі мектеп ашылады. Ауылдық денсаулық сақтау саласын жаңғырту аясында 30 медициналық нысан іске қосылды. Спорт кешендері мен бассейндер ашылуда, кітапханалар жаңартылуда.
Облыс әкімі 2026 жылдың жоспарларымен де бөлісті. Асайын Байханов Мемлекет басшысы Қасым-Жомарт Тоқаевтың «Қазақстан жаңғырудың жаңа кезеңіне қадам басты» мақаласында 2026 жылы ауқымды саяси өзгерістердің жаңа кезеңі басталып, экономикалық реформалар жалғасын табатынын атап өткенін еске салды. Биыл цифрландыру және жасанды интеллект жылы деп жарияланды.
Биыл Торайғыров университетінің базасында IT және ЖИ саласына қызығушылық танытқан студенттер мен 18 жастан асқан барлық ниет білдірушілерге арналған «Tomorrow School» білім беру бағдарламасы іске қосылады.
«Қолжетімді интернет» жобасы аясында облыстың 207 ауылына талшықты-оптикалық байланыс желілері тартылады (2026 жылы - 141 ауылдық елді мекен, 2027 жылы - 66 елді мекен).
Биыл Павлодарда бес ірі әлеуметтік маңызды нысанның құрылысы басталады: екі корты және керлинг алаңдары бар Мұз сарайы, 1 500 орындық екі залы бар көпфункционалды Конгресс-холл, бассейні мен көркем гимнастика залы бар спорт кешені, 25 мың орындық жаңа футбол стадионы. Бесінші нысан - Екібастұз қаласында салынатын мұз аренасы мен бассейні бар көпфункционалды спорт кешені.
Күзде Павлодардағы аквапарктың құрылысы аяқталады. Сондай-ақ Усолка шағын ауданында 1 200 орындық мектеп, Баянауыл ауылында 140 орындық балабақша, Майқайың кентінде 500 орындық өнер мектебі салынады.
Үш жаңа медициналық нысан салу, жеті денешынықтыру-сауықтыру кешенінің, Ертіс ауылындағы бассейннің және Мичурино ауылындағы мәдениет үйінің құрылысын аяқтау жоспарланған. Жол инфрақұрылымын жақсарту үшін 173 км автожолды жөндеу бойынша 54 жоба жүзеге асырылады. 150 км инженерлік желілерді қайта жаңарту жұмыстары жалғасады, 38 әлеуметтік нысан күрделі жөндеуден өтеді.
Отырыста облыстық мәслихаттың төрағасы Илья Теренченко мен облыстық қоғамдық кеңестің төрағасы Бәкір Демеуовтың есептері тыңдалды. Талқылауға бейінді комиссиялар төрағалары мен қоғамдық кеңес мүшелері қатысты.
Кездесу қорытындысы бойынша облыстық қоғамдық кеңес мүшелері Павлодар облысы әкімінің 2025 жылғы жұмысына оң баға беріп, оның есебін бірауыздан мақұлдады.
Павлодар облысы әкімінің баспасөз қызметі
Суреттерді түсірген Валерий Бугаев