Санитариялық-эпидемиологиялық қорытындыны қайта ресімдеу, телнұсқасын беру және электрондық форматқа ауыстыру туралы

Қазақстан Республикасы Денсаулық сақтау министрінің 2020 жылғы 30 желтоқсандағы № ҚР ДСМ-336/2020 бұйрығымен бекітілген санитариялық-эпидемиологиялық қорытындылар беру жөніндегі мемлекеттік қызметтер көрсету қағидаларының 5-тарауының 33-тармағына сәйкес жеке және заңды тұлғалар объектіге тексеру жүргізбей бұрын берілген санитариялық-эпидемиологиялық қорытындыны мынадай жағдайларда қайта ресімдеуге құқылы:
1) құжаттағы қателерді анықтау;
2) Қазақстан Республикасының Азаматтық кодексінің 45-бабында көзделген заңды тұлғаны қайта ұйымдастыру;
3) объектінің орналасқан жерінің мекенжайын физикалық ауыстырмай өзгерту;
4) көрсетілетін қызметті алушының заңды тұлғаның немесе жеке кәсіпкердің атауын өзгерту;
5) объектінің нысаналы мақсатын, жүзеге асырылатын қызмет түрін, технологиялық процессін, қуаттылығын өзгертпей және объектіге құрылымдық өзгерістер енгізілмеген, басқа тұлға қолданыстағы объектіге меншік құқығын алған жағдайда.
Санитариялық-эпидемиологиялық қорытындыны қайта ресімдеу үшін көрсетілетін қызметті алушы www.egov.kz "электрондық үкіметтің" веб-порталы арқылы санитариялық-эпидемиологиялық қорытындыны қайта ресімдеуге негіз болған тиісті өзгерістер туралы растайтын құжаттармен бірге санитариялық-эпидемиологиялық қорытындылар беру жөніндегі мемлекеттік қызметтер көрсету қағидаларына 7-қосымшаға сәйкес өтініш жібереді.
Оң қорытынды болған кезде көрсетілетін қызметті беруші 4 (төрт) жұмыс күні ішінде санитариялық-эпидемиологиялық қорытындыны қайта ресімдейді не теріс қорытынды болған кезде көрсетілген мерзімдерде санитариялық-эпидемиологиялық қорытындыны қайта ресімдеуден дәлелді бас тартуды дайындайды және көрсетілетін қызметті алушыға жібереді.
Санитариялық-эпидемиологиялық қорытындылар беру жөніндегі мемлекеттік қызметтер көрсету қағидаларының 3-тарауының 22-1-тармағына сәйкес, қағаз нысанда берілген санитариялық-эпидемиологиялық қорытынды жоғалған, бүлінген кезде көрсетілетін қызметті алушының санитариялық-эпидемиологиялық қорытындының телнұсқасын алуға мүмкіндігі бар.

Железин аудандық санитариялық-эпидемиологиялық бақылау басқармасы