Павлодар қаласының коммуналдық қызметтері кешегі кештен бері жауған қардың салдарын жоюда. Түнгі уақытта қала көшелерінде 50-ден астам техника жұмыс істеді. Бұл 35 сыпыру-жинау және 17 құм шашатын арнайы көліктері. Қар тазалау таңғы сағат 6.00-ге дейін жүргізілді.
Таңғы сағат 6.00-ден бастап қала көшелерінде қарды тазалау және шығару бойынша 70-тен астам техника жұмыс істеуде. Бұл 24 тиегіш және 50 жүк машинасы.
Жолдардың жиектерін, аялдама павильондарын және жаяу жүргіншілер өткелдерін тазалауға 200-ден астам адам жұмылдырылды. Ең алдымен жаяу жүргінші жолдары, аялдамалар, баспалдақтар, еңістер мен көтерулер қардан тазартылады.
Павлодар қаласының көшелері мен айналма автожолдарын қыс мезгілінде күтіп-ұстауды «Холдинг-Транс-Павлодар» ЖШС және «Горкомхоз-Павлодар» ЖШС екі мердігерлік ұйымы жүргізеді.
Қысқы маусым басталғаннан бері полигонға 6 мың тоннадан астам қар шығарылды. Қар тазалау жұмыстары тәулік бойы жалғасатын болады.