Балалар үшін қауіпсіз жаз: мектептердегі бассейндер маусымға әзір

Аққулы ауданында жазғы мектеп жанындағы лагерьлердің жұмысы кезеңінде ауданның 12 мектебінде қаңқалы-модульді бассейндер жұмыс істейтін болады.

Балалардың қауіпсіздігін қамтамасыз ету мақсатында суға түсу бекітілген кестеге сәйкес ұйымдастырылады: бір жаттықтырушыға бір сағат ішінде 5 баладан артық жүктелмейді.

Бассейндерге тұрақты түрде санитарлық қызмет көрсету жүргізіледі. Судың сапасы мен қауіпсіздігін сақтау үшін аптасына екі рет хлорлау жұмыстары жүргізіліп, қолданыстағы санитарлық талаптарға сәйкес қажетті профилактикалық және бақылау шаралары атқарылады.

Жазғы сауықтыру маусымына дайындық аясында бүгін мектеп қызметкерлері төтенше жағдайлар бөлімі мамандарының қатысуымен арнайы оқудан өтті. Оқу барысында судағы қауіпсіздік ережелері, бассейндерді пайдалану тәртібі, төтенше жағдайлар кезіндегі іс-қимыл алгоритмдері және жазатайым оқиғалардың алдын алу шаралары түсіндірілді.

Бассейндердің жұмысы балалардың жазғы демалысын тиімді ұйымдастыруға, олардың денсаулығын нығайтуға және қауіпсіз демалуына бағытталған. Өткізілген дайындық жұмыстары балалар үшін қолайлы әрі қауіпсіз жағдай жасауға мүмкіндік береді.