Павлодарда педагог-психологтардың IV облыстық форумы өтті

29 мамырда Павлодар қаласында педагог-психологтардың IV облыстық форумы өтті. «Педагог-психолог в системе Службы психолого-педагогического сопровождения: вызовы новой реальности и ресурсы профессионального развития» тақырыбындағы ауқымды іс-шара психологиялық-педагогикалық сүйемелдеу жүйесінің мамандарын, әдіскерлерді, тәжірибелі психологтарды және білім беру саласының сарапшыларын бір алаңға біріктірді.

Форум қазіргі білім беру ортасының өзекті мәселелерін талқылауға арналған кәсіби диалог алаңы ретінде ұйымдастырылды. Онда психологиялық қауіпсіздік, педагог-психологтардың эмоционалдық күйзелісінің алдын алу, кәсіби ресурсты дамыту және заманауи білім беру жүйесіндегі жаңа талаптарға бейімделу мәселелері қарастырылды.

Форсайт-сессиялар барысында қатысушылар мамандардың кәсіби тұрақтылығын сақтау, ата-аналармен тиімді коммуникация орнату және психологиялық қызметтің білім беру жүйесіндегі мүмкіндіктерін кеңейту бағыттарын талқылады. Сонымен қатар білім беру ұйымдарында қолайлы және қауіпсіз орта қалыптастырудың өзекті тетіктері сөз болды.

Пленарлық отырыста психологиялық-педагогикалық сүйемелдеу жүйесін дамытудың қазіргі бағыттары, отбасы мен мектеп арасындағы серіктестіктің маңызы және оқушылар үшін қолайлы психологиялық орта қалыптастыру мәселелеріне ерекше назар аударылды.

Форумның ерекше сәттерінің бірі — Экибастұз қаласындағы Қажыбек Алғамбаров атындағы мектептің 7-сынып оқушысы, облыстық «Жас психолог» байқауының жеңімпазы Жанерке Наурызбайдың баяндамасы болды. Ол оқушылар көзімен психологиялық қауіпсіздік пен балалардың эмоционалдық әл-ауқаты мәселелеріне қатысты өз көзқарасын ортаға салды.

Шара соңында Павлодар облысының психологиялық-педагогикалық сүйемелдеу жүйесінің үздік мамандарын марапаттау рәсімі өтті. Психолог-педагогтерге облыстық білім беру саласының дамуына қосқан елеулі үлестері үшін құрмет грамоталары мен алғыс хаттар табысталды.

Форум қорытындысы өңірдегі психологтар қауымдастығының жоғары кәсіби деңгейін және білім беру үдерісіне қатысушылардың психологиялық әл-ауқатын қамтамасыз ету бағытындағы жүйелі жұмыстың маңыздылығын тағы бір мәрте дәлелдеді.