Оқушы жаңалығы: қымыздан жасалған ерекше сабын жобасы

Павлодар қаласындағы №7 жалпы орта білім беру мектебінде білім мен ғылымның, ұлттық мұра мен заманауи ізденістің үйлесімін көрсеткен ерекше жоба жүзеге асырылды. Химия пәні мұғалімі Жанаргүл Хавдылдың жетекшілігімен 7-сынып оқушысы Серікболқызы Іңкәр қымыз негізінде экологиялық таза қол сабынын әзірлеп, ғылыми ортада жоғары бағасын алды.

 

Жобаның бастауында – оқушының табиғилыққа деген сұранысы мен ізденісі жатыр. Күнделікті тұрмыста қолданылатын өнімдердің құрамына сын көзбен қараған Іңкәр өзіне толықтай сәйкес келетін табиғи сабын таба алмағанын айтып, оны өзі жасап көруге бел буды. Бұл идеяны ұстазы қолдап, ғылыми бағытқа жүйеледі.

 

Зерттеу барысында қымыздың химиялық құрамы мен оның теріге әсері жан-жақты талданды. Нәтижесінде табиғи майлармен үйлестірілген, теріні нәрлендіретін әрі қауіпсіз өнім дайындалды. Бұл жұмыс тек тәжірибелік ізденіс қана емес, ұлттық өнімді жаңа қырынан танытуға бағытталған маңызды қадам болды.

 

Аталған жоба 2023 жылы «Зерде» ғылыми жобалар байқауында ұсынылып, сарапшылар тарапынан жоғары бағаланды. Жас зерттеушінің еңбегі оның ғылымға деген қызығушылығын арттырып қана қоймай, практикалық дағдыларын дамытуға мүмкіндік берді.

 

Айта кету керек, мұндай бастамалар – өңірдегі білім беру жүйесінің сапалы дамуының, оқушылардың зерттеушілік әлеуетін қолдаудың нақты көрінісі. Жанаргүл Хавдыл өз тәжірибесінде оқушылардың идеяларын қолдап, оларды нақты нәтижеге бағыттай отырып, білімді өмірмен ұштастырудың тиімді үлгісін көрсетіп келеді.

 

Бұл жоба – тек бір мектептің жетістігі емес. Бұл – ұлттық құндылықтарды дәріптей отырып, экологиялық мәдениетті қалыптастыруға бағытталған, жас ұрпақтың ғылыми ойлауын дамытуға серпін беретін маңызды бастама.

 

Осындай ізденістер мен жаңашыл жобалар – білім беру саласының болашағын айқындайтын, ел ертеңіне сенім ұялататын жарқын қадам.