Павлодар облыстық психологиялық қолдау орталығы өңірдегі 100-ден астам білім беру ұйымына консультациялық көмек көрсетеді

Павлодар облысында білім беру ұйымдарына психологиялық қолдау көрсету бағытында ауқымды жұмыс басталды. Өңірлік психологиялық қолдау орталығының мамандары ағымдағы жылдың наурыз–сәуір айлары аралығында облыс бойынша 100-ден астам білім беру ұйымын қамтитын көшпелі іс-шаралар өткізуде.

Бұл бастаманың басты мақсаты – мектепке дейінгі ұйымдар, жалпы білім беретін мектептер мен колледждердегі педагог-психологтардың кәсіби қызмет сапасын арттыру. Мамандар білім беру ұйымдарына әдістемелік көмек көрсетіп, заманауи тәсілдер мен тиімді тәжірибелерді енгізуге ықпал етуде.

Көшпелі кездесулер барысында психолог мамандардың қызметін ұйымдастыру, білім алушыларды психологиялық-педагогикалық сүйемелдеу, ата-аналар қауымдастығымен және педагогикалық ұжымдармен жүйелі жұмыс жүргізу мәселелеріне ерекше назар аударылуда. Бұл өз кезегінде білім беру ортасындағы қолайлы психологиялық ахуалды қалыптастыруға мүмкіндік береді.

Ұйымдастырушылардың айтуынша, мұндай форматтағы жұмыс тек нақты көмек көрсетумен шектелмей, тәжірибе алмасуға, мамандардың кәсіби төзімділігін нығайтуға және білім беру жүйесінде психологиялық қолдаудың бірыңғай тәсілін қалыптастыруға жол ашады.

Аталған бастама – өңірдегі білім сапасын арттыруға және өскелең ұрпақтың жан-жақты дамуына бағытталған маңызды қадамдардың бірі.