«Ана бәріне үлгереді»: Екібастұзда 8 наурыз қарсаңында «Мамандықтар шеруі» өтті

Халықаралық әйелдер күні қарсаңында Екібастұз қаласындағы №5 мектепте «Мамандықтар шеруі» атты ерекше кездесу өтті. Дәстүрлі концерттің орнына бұл жолы мектепте мамандық, өмір жолын таңдау және әйелдердің кәсіби қызмет пен отбасы өмірін қалай үйлестіретіні туралы ашық әңгіме ұйымдастырылды.

Кездесудің басты кейіпкерлері — оқушылардың аналары. Педагог, дәрігер, инженер, кәсіпкер, аспаз мамандықтарының өкілдері өздерінің еңбек жолы туралы айтып, мамандықты қалай таңдағанын, алғашқы қиындықтары мен жетістіктерін, сондай-ақ өз ісіне деген сүйіспеншілігін бөлісті.

Әңгіме жылы әрі шынайы атмосферада өтті. Оқушылар тек мамандықтардың ерекшелігі туралы ғана емес, сонымен қатар өз жолыңды қалай табуға болады, барлығына үлгеру қиын ба, күш-жігерді қайдан аласыз деген сұрақтар қойды.

Қатысушылардың айтуынша, «Мамандықтар шеруі» тек кәсіби бағдар беру шарасы ғана емес, сонымен бірге 8 наурыз мерекесінің мәнін толықтырған мазмұнды кездесу болды. Онда қоғамда еңбек етіп, отбасын қатар алып жүрген әйелдердің рөлі туралы айтылды.

Мектеп ұжымы мұндай формат оқушыларға өз аналарына жаңа қырынан қарауға мүмкіндік бергенін атап өтті. Балалар олардан тек қамқорлықты ғана емес, сонымен қатар табандылықты, жауапкершілікті және кәсіби шеберлікті көре алды.